ꞌThianaattõ 29
29
Õdõlan Yakobo õlõ cĩ maalõnĩ
1Ma baa ẽdẽcaak Yakobo ngaatĩ adduutĩkĩ ngõõrrõ biyyia ho, ikia ũũk nẽẽ ĩĩcĩ uruto cĩ looc baa akuuni ngaannia. 2Ma hĩdĩĩkoothong, udtuuha wĩĩtaneec#29:2 Wĩĩtaneec: Baa gõõng ada eeta wĩĩtanĩ ꞌcĩg uuthik korrioohĩĩ baag Yakobo ꞌcĩg ẽẽlĩkĩ hẽlẽggĩ huhuddi. umwa hĩ nyalõmaarwa iyyio cĩg aꞌthaannu hĩ ẽẽtha ꞌcĩg ẽẽlĩ ngadiiha nĩngaata, hĩnĩngĩtĩ baa eelĩk eeta hẽlẽggĩ wĩĩtaneecaa tĩho. Baa nga aꞌnyũũgĩ wĩĩtanẽẽcĩ biyyiaa ꞌcĩ ꞌthabalĩ. 3Ma baa ũllũngattaa hẽlẽggĩ vẽlẽk geyyia, baa gõõng au eꞌnyeehĩk tũhayyiooha bẽẽ nicci ngadiiha nẽ eellik aꞌtha. Nẽẽthĩ, ma uhuddi aꞌtha ẽlẽk, iita oboddiẽẽhĩ tũhayyiooha bẽẽ nicci hũꞌnyũũg wĩĩtaneec.
4Nĩngĩtĩ ajini Yakobo tũhayyiook annẽẽkĩ, “Auunnu ĩĩna hõlõ?”
Ẽdẽcĩ tũhayyiooha aĩ, “Haaunna Haraana.”
5Nẽ ijin nẽẽ ĩhõõggõ tarĩ ĩĩnnĩk, “Agayyu occa eet umwa ꞌcĩ haĩ Laban, loholeec cĩ ngeertĩ Naahõrĩ?”
Ẽdẽcĩ hatĩ eeta niccieeg aĩ, “Eei, hagayya.”
6Nẽ ijin ĩhõõggõ tarĩ ĩĩnnĩk, “Ma acinnu aaĩ occa lõꞌngõõc?”
Ẽdẽcĩ tũhayyiooha anneek, “Eei, aaĩ lõꞌngõõc. Bũhaanyĩnĩ ꞌcĩ haĩ Rakĩlẽ caa aꞌngĩda aꞌtha hata.”
7Nĩngĩtĩ annẽẽkĩ Yakobo tũhayyiook, “Ma nga waathĩn lõõcĩ ho, eellik aꞌtha nẽ nõõ iꞌngiddieehu geyyia tarĩ.”
8Ẽdẽcĩ hinnia tũhayyiooha aĩ, “Hõllõngaa aaĩ nohotaa, nga nõõ hẽrẽẽyya nyalõmaarwa cĩg aꞌthaannu vẽlẽk hiita ngaati, nẽẽthĩ, hẽꞌnyẽẽkta bẽẽ.”
9Ma baa nga õthõõthõõ Yakobo hĩ ĩhõõggõ, uppwaanna Rakĩlẽ aꞌngĩda aꞌtha cĩg maacõnĩ. 10Ma baa adtuuha Yakobo Rakĩlẽ tĩnaatĩ Labanĩ ho, ukul ũũk ubbuuk wĩĩtaneec nẽ eelĩk aꞌtha cĩg maalõnĩ ho. 11Ma baa uhuddi aꞌtha ẽlẽk, ikia ĩꞌtha nẽẽ Rakĩlẽ taliitta, 12nẽ uduhaak ĩĩnnĩk, “Hĩĩnĩ naa ngeerathonu ngeertĩ Rẽbẽka, ngõõnĩ maaconu.” Nĩngĩtĩ akannĩ ulwa. Ma athĩhĩ Rakĩlẽ thõõth icci ho, ukul ũũk uduhaak maaꞌnyĩ.
13Ma baa athĩhĩ Labanĩ nyeemuut cĩ ngeerĩngõõnõnĩ ho, ukul nẽ buúk õõt ommottio hĩ Yakobo ꞌgõõla, nĩngĩtĩ ĩꞌthaaĩ ĩnõõnnõ taliitta nẽ ũũhĩ ĩĩcĩ olu, nĩngĩtĩ aduhaakĩ Yakobo ĩnõõnnõ thooꞌthiok vẽlẽk. 14Ma nĩngaata, ĩĩnnĩk Labanĩ ĩnõõnnõ, “Ĩĩnĩ nii ngeerĩngoonona dẽẽdẽ.”
Ũꞌthũwan Yakobo lõhõlĩ cĩg Labanĩ
Ma baa aau Yakobo nyĩlõk hõdẽĩ õlõõ cĩ maalõnĩ, 15ikia uduhaak Labanĩ ĩnõõnnõ ĩĩnnĩk, “Occa hõllõngaa adticanoothĩkaa nii nganĩĩt haaga, hĩnĩngĩtĩ ittiẽẽꞌthĩt. Duhaahaa dako ꞌgiimwa ꞌcĩ occa hadumanniina.”
16Baa aꞌnyak Labanĩ lõhõlĩ ꞌramma ꞌcĩg ĩĩn buheeci. Baa haĩ cobbi Lẽẽa, nẽ hĩĩtõ ꞌcĩ hidici Rakĩlẽ. 17Baa ẽllẽẽmĩth Rakĩlẽ hĩllõõan Lẽẽa, hĩnĩngĩtĩ baa aꞌnyak Rakĩlẽ hẽbẽrĩ ꞌcĩg õõppẽr nẽ ĩĩ mũrra thõng buúk. 18Baa ammĩnan Yakobo Rakĩlẽ, nĩngĩtĩ aduhaakĩ Laban annẽẽkĩ, “Hatabi hadticanoothikii irkiꞌnyia tũrkĩramma nẽ aaꞌnyaa hũꞌthũwan Rakĩlẽ.”
19Ẽdẽcĩ Labanĩ aĩ, “Abũnnaa, hatabi ꞌthẽk naa buúk õkõõĩ nii dẽẽdẽ ĩnõõnnõ hĩllõõan ngaatĩ occa õkõõĩ ẽẽtĩ umwaa haaga. Hũrũmtĩ hĩ nganĩĩt ngaati.” 20Nĩngĩtĩ adtũhanniini Yakobo irkiꞌnyia tũrkĩramma. Baa aattĩg irkiꞌnyia ꞌcĩg ĩĩn tũrkĩramma ho, hĩ ĩnõõnnõ hĩ waathinniooha haaga, hĩnĩngĩtĩ baa ammĩnan Yakobo Rakĩlẽ gẽrrẽẽt.
21Ma urutaa cĩ irkiꞌnyia ꞌcĩg ĩĩn tũrkĩramma ho, uduhaak Yakobo Laban ĩĩnnĩk, “Aꞌnyaa thiggia hĩꞌngĩdõ, ũũppanit mĩĩ irkiꞌnyia ꞌcĩg hadtũhaniini.”
22Nĩngĩtĩ alũtaanĩ Labanĩ eet cĩg olu vẽlẽk nẽ aarĩk nyahũũta. 23Ma baa õõt eeta ũꞌnyaahĩ, anĩhẽẽkĩ hinnia Labanĩ Lẽẽa bũhaanyĩnĩ cobbi hõõt hatagguutho hĩ Yakobo. 24Baa aaꞌnyĩk Labanĩ dticciannioohit cĩnnĩ ꞌcĩ haĩ ꞌThĩlpa hittioon Lẽẽa.
25Ma baa ngerrenita, adtuuha hinnia ẽẽtĩ Lẽẽa! Ma ho, ĩĩnnĩk Yakobo Laban, “Adĩmannaa occa hoti inni? Baa hadtũhannii naa, hĩnĩngĩtĩ Rakĩlẽ. Inni ꞌgõõlaa ho?”
26Ẽdẽcĩ Labanĩ anneek, “Aꞌngirannii nyattaalaa cĩnaang ngaatĩ aꞌthũwaniini loholeec ꞌcĩ uruto hatĩ nga hũꞌthũwanĩ ꞌcĩ oou. 27ꞌRẽẽõ nõõ waathinniook tũrkĩramma, hedeccia kõrra cĩ nyahũũtaaõ, nẽẽthĩ hatĩ haaꞌnyii Rakĩlẽ buúk nẽ õdtõhanõ irkiꞌnyia tũrkĩramma tarĩ.”
28Ma urutaa ꞌcĩ ũrũmtõõĩ Yakobo hĩ Lẽẽa waathinniook tũrkĩramma, ittiha Labanĩ Rakĩlẽ buúk aaꞌnyĩk Yakobo hĩĩ ngaa cĩnnĩ. 29Baa nẽ aaꞌnyĩk Labanĩ dticciannioohit cĩnnĩ ꞌcĩ haĩ Bĩlha hũũk hidticanoothĩk Rakĩlẽ. 30Nĩngĩtĩ arũmẽẽnĩ Yakobo hĩ Rakĩlẽ buúk hĩĩ ngaa cĩnnĩ nẽ ĩmmĩnan ĩnõõnnõ gẽrrẽẽt hĩllõõan Lẽẽa. Nĩngĩtĩ õdtõhaniini Yakobo irkiꞌnyia tũrkĩramma tarĩ.
Lõhõlĩ cĩg Yakobo
31Ma baa acĩn Makayyioohiti Nyekuci ngaatĩ hõllõngaa ammĩnanĩ Yakobo Lẽẽa ho, ikia aaꞌnyĩk Nyekuci Lẽẽa haꞌnyak lõhõlĩ nẽ aau Rakĩlẽ haaga. 32Nĩngĩtĩ aku aꞌnyahiini Lẽẽa nẽ ũtũhũa loholeec ꞌcĩ maacĩ. Ma ho, akateek Lẽẽa loholeec ꞌthaar ꞌcĩg haĩ ꞌRuuben, hĩnĩngĩtĩ aĩ nẽẽ, “Ĩcĩna Makayyioohiti pĩĩrnanĩt caannĩ nẽ kõr icci, ĩmmĩnanaa thĩ hatĩ gõõng maac caannĩ nganĩĩta.” Nĩngĩtĩ akannẽẽkĩ loholeec ꞌthaar ꞌcĩg haĩ ꞌRuuben.#29:32 ꞌRuuben: Aĩ ꞌthaara ꞌcĩg haĩ ꞌRuuben ho Ebereeiyyi, ĩcĩn Nyekuci pĩĩrnanĩt caannĩ.
33Ma urutaa cĩ irkit niccia, ikia aꞌnyahõ Lẽẽa tarĩ nẽ ũtũhũa loholeec ꞌcĩ maacĩ nẽ õthõõth ĩĩ, “Aaꞌnya Makayyioohiti loholeec icci buúk, hĩnĩngĩtĩ ĩthĩk nẽẽ ngaatĩ aaburreeka maac caannĩ nganĩĩta.” Nĩngĩtĩ akannẽẽkĩ loholeec ꞌthaar ꞌcĩg haĩ ꞌThimiõõnẽ.#29:33 ꞌThimiõõnẽ: Aĩ ꞌthaara ꞌcĩg haĩ ꞌThimiõõnẽ ho Ebereeiyyi, eet ꞌcĩ athĩknĩ.
34Ma ho, ikia aꞌnyak Lẽẽa loholeec umwa tarĩ ꞌcĩ maacĩ nẽ ikia ummuk ĩĩ, “Ikia aattĩ hatĩ ĩmmĩnanaa maac caannĩ, hĩnĩngĩtĩ hittiraaha buul iyyio.” Nĩngĩtĩ akannẽẽkĩ loholeec ꞌthaar ꞌcĩg haĩ ꞌLeevi.#29:34 ꞌLeevi: Aĩ ꞌthaara ꞌcĩg haĩ ꞌLeevi ho Ebereeiyyi, ĩmmĩnanaanĩ.
35Ma nĩngaata, ikia aꞌnyahõ tarĩ nẽ ũtũhũwa loholeec ꞌcĩ maacĩ nẽ õthõõth ĩĩ, “Hadihithi hatĩ Makayyioohit gẽrrẽẽt, hĩnĩngĩtĩ loholeec icci.” Nĩngĩtĩ akannẽẽkĩ ꞌthaar ꞌcĩg kaĩ ꞌJuuda.#29:35 ꞌJuuda: Aĩ ꞌthaara ꞌcĩg haĩ ꞌJuuda ho Ebereeiyyi, dĩhĩthẽẽnĩt. Ma nĩngaata, ikia ĩbĩl ngaatĩ aꞌnyahĩ lõhõlĩ.
Currently Selected:
ꞌThianaattõ 29: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
