ꞌGalaaꞌthia 2

Elemit ꞌthooyyiaha Paaulo

1Ma baa urutaa cĩ irkiꞌnyia õmmõtõ hĩ ꞌwec, hikia hobodootha ꞌJeruꞌthalẽma. Kõr niccia, hiita hookorria hĩ Baarnaba nẽ baa haggameehi Tiito buúk aꞌthiit. 2Baa hõkõ naa ĩĩca, hĩnĩngĩtĩ baa uppulanaaha Nyekuci heeroni niccia hũũhõ. Ma baa hõdõlana ꞌJeruꞌthalẽm, hõõt hutuhatta thõõth hĩ makayyiook ꞌcĩg obbitig ꞌcĩg baag ĩĩn ꞌJudeei nĩngaata, nyeemuut ꞌcĩ abũnnaa cĩ Yeesu, tuhan umwa ꞌcĩ baa haꞌnyaka ngadiiha. Nĩngĩtĩ hẽdtẽbanaanĩ thõõth cĩ Yeesu ꞌcĩ hallimaneehi eet ꞌcĩg hõllõngaa ĩĩn ꞌJudeei ho. Baa hõkõ haduhaahi ĩhõõggõ, hĩnĩngĩtĩ baa hõllõngaa hadiimi naa ꞌlimman icci hõꞌthõdanoothĩk haaga. 3Nẽ tananga Tiito baa haggameehi aꞌthiit buúk, nga hĩttĩnganoothĩk ngaatĩ ẽttẽẽdĩ ẽlẽ,#2:3 ꞌTeedinit cĩ ẽlẽ cĩ eet ꞌcĩ maacĩ: Baa aduhaak Nyekuci Abũrahaamõ anneek ꞌtẽẽda rucci cĩg eleeti cĩg eet ꞌcĩg maacĩg lõhõlẽẽnĩĩ ꞌcĩg maacĩg urutaa cĩ waathinniook turkiyyio, ĩnõõ ꞌcĩ ẽttẽẽdĩ nẽẽ eleeti cĩg lõhõlĩ ꞌcĩg maacĩg, hátĩ hiita hĩĩtõ lõhõlĩ cĩg Nyekuci. ꞌBuuk cĩ ꞌThianaattõ 17:10-14. tananga baa ĩĩn nẽẽ ꞌGiriheenit. 4Baa hooyyia naag ꞌJeruꞌthalẽma, hĩnĩngĩtĩ eet ꞌcĩg õõlõng aĩ, hĩĩgĩnna lemmiook nẽ ĩnĩktaaheet hĩ hoppoccwaana ꞌcĩg au orootteet aĩ, haggamtaeetu thõõth ꞌcĩ haattiyyia lõꞌngõõc thõõthaa cĩ Yeesu Krĩstõ, adiim aarreet hĩĩtta appahacaaꞌnya cĩggĩĩng. 5Baa hõllõngaa hedecoothĩka naag ĩhõõggõ, tananga hĩdĩhĩdĩĩc haaga buúk, hĩnĩngĩtĩ haĩnna haala nyeemuut ꞌcĩ abũnnaa ꞌcĩ ĩĩn dĩdĩ ho hõrggẽẽnaa cunuung.

6Nẽ eeta ꞌcĩg baag aattĩg hĩ makayyiooha, baa hõllõngaa haallahi naa ĩhõõggõ, hĩnĩngĩtĩ etteedĩk Nyekuci eet thõõth ꞌgoolliohĩĩ ꞌcĩg aattiyyi nẽẽgĩ nẽ hõllõngaa ĩttoorĩk nẽẽg thõõth umwa ꞌlimmaanaa caannĩ. 7Iita ĩcĩnĩt ꞌthooyyiaha aĩ, baa ꞌthẽk aaꞌnya Nyekuci nganĩĩt dtiic ꞌcĩ hallimanẽẽkĩ eet ꞌcĩg hõllõngaa ĩĩn ꞌJudeei nyeemuut ꞌcĩ abũnnaa cĩ Yeesu Krĩstõ, haau hĩ baa aaꞌnyĩk nẽẽ Pẽẽtũrũ hillimaneek eet cĩg ꞌJudeei. 8Nyekuc ꞌcĩ aaꞌnya nganĩĩt ꞌtirrian ꞌcĩ hĩĩnnĩ ꞌthooyyiahit cĩ eet ꞌcĩg hõllõngaa ĩĩn ꞌJudeei, hĩ baa aaꞌnyĩk nẽẽ Pẽẽtũrũ hĩĩ ꞌthooyyiahit cĩ eet cĩg ꞌJudeei. 9Nẽ dĩdĩ, baa agayyi ꞌJeemithi hĩ Pẽẽtũrũ hĩ Yõaannẽ, ngaatĩ ĩĩnnĩ hitiirrwa cĩg lothippit cĩ lemmioohu. Baa agaoothi nẽẽg ꞌbaaninit baa aaꞌnya nganĩĩt Nyekuci nẽ ẽlẽmta nẽẽg nganĩĩt hĩ Baarnaba hidticattooa hõdẽĩ. Ma ho, iita ũkũtatteet nẽẽg ngagĩĩt hoottia hillimatta eet ꞌcĩg hõllõngaa ĩĩn ꞌJudeei nẽ õõt illimanit nẽẽg eet ꞌcĩg ĩĩn ꞌJudeei. 10Nẽ uduktaaheet thõõth hõdẽẽthõng ꞌcĩ aĩ, uꞌthuutti eet ꞌcĩg ĩĩn pĩĩrnattiaak hõrggẽẽnaa cunuung, thõõth ꞌcĩ baa hadiimi harrĩcanaa naa dẽẽdẽ ho niccia.

Ẽppẽhattõõ Paaulo hĩ Pẽẽtũrũ

11Ma baa ẽhẽẽrõna Pẽẽtũrũ ikia Antioha, baa happulanaahi naa ĩnõõnnõ thõõth cĩnnĩ ꞌcĩ abathĩ lothippita cũrũmũũm, haduhaahi thõõth ꞌcĩ õkõmĩ thõõthaa ꞌcĩ adtican nẽẽnĩ, hĩnĩngĩtĩ baa adtican nẽẽ thõõth ꞌcĩ abathĩ gẽrrẽẽt. 12Ma baa nga õdõlan Pẽẽtũrũ thõng, iita udukto hĩ Kristiaanĩt ꞌcĩg hõllõngaa ĩĩn ꞌJudeei. Ma urutaa ĩbaa iitaaĩ ꞌgõõnõgĩ ꞌJeemithi, iittiõõ Pẽẽtũrũ hõllõngaa aduhi hĩ eet ꞌcĩg hõllõngaa ĩĩn ꞌJudeei tarĩ. Baa iꞌngolli nẽẽ ꞌgõõnõgĩ ꞌJeemithi ꞌcĩg baag ara õthõõth aĩ, adiim Kristiaanĩt ꞌcĩg hõllõngaa ĩĩn ꞌJudeei hetteeddi eleeti.#2:12 Adiim Kristiaanĩt ꞌcĩg hõllõngaa ĩĩn ꞌJudeei hetteeddi eleeti: Tigiil thõõth icci ꞌBuuhaa cĩ Dtiicanĩ cĩg ꞌThooyyiahu 15:1-35. 13Ma baa adtuuha eeta cĩg ꞌJudeei ũgẽẽgĩ ꞌcĩg baag aattĩg nĩngaata Pẽẽtũrũ ngaatĩ adĩmanĩ hoti ho, iita ĩthahithit nẽẽg buúk ĩnõõnnõ, Baarnaba buúk nĩngaata ataddaanĩ haaga, nĩngĩtĩ anũĩ nẽẽ buúk ꞌgõõl cĩnĩĩng ko.#2:13 ꞌJudeei ũgẽẽgĩ: Eeta cĩg ꞌJudeei ꞌcĩg anũ nyattal cĩ Mũũꞌtha, hõllõngaa aduk ꞌgẽẽn cĩ eet ꞌcĩg hõllõngaa ĩĩn ꞌJudeei, hĩnĩngĩtĩ baa hõllõngaa ẽlẽmaakĩ nyattalĩ ĩhõõggõ huduhit ꞌgẽẽn ꞌcĩ aĩ nyattalĩ ĩĩn ꞌriiring. Tigiil ꞌBuuk cĩ Ditoronomi 14:1-21, Dtiicanĩ cĩg ꞌThooyyiahu 10:9-15.

14Ma baa hacini ngaatĩ arahanĩ Pẽẽtũrũ thõõthaa ꞌcĩ ĩĩn dĩdĩ ĩcĩ nyeemuut ꞌcĩ abũnnaa ho, hikia heggerenyeeha ĩnõõnnõ hõrggẽẽnaa cĩ eet vẽlẽk hĩĩnnĩha, “Ĩĩnĩ nii ꞌJudeeinit nẽ aau hĩ ẽẽtĩ ꞌcĩ hõllõngaa ĩĩn ꞌJudeeinit. Inni gõõng nii ꞌtĩnganeek eet ꞌcĩg hõllõngaa ĩĩn ꞌJudeei hũnnẽẽcõ nyattalliook cĩg ꞌJudeei ho?

15“ꞌTirriaatta, hĩĩgĩn naag ꞌJudeei nẽ hõllõngaa hĩĩgĩn ꞌthẽccanniook hĩ eeta ꞌcĩg hõllõngaa ĩĩn ꞌJudeei. 16Haga naag ngaatĩ ẽlẽmmĩ Nyekuci eet ꞌcĩg ẽlẽmĩ Yeesu Krĩstõ diooni, aitiõõ ẽẽtĩ ꞌcĩ occa aaꞌnyĩk Nyekuc haccamanoothĩk tõõ, hatĩ athĩhĩ thooꞌthiok cĩg nyattaalak diooni. Hẽlẽmĩ naag Yeesu Krĩstõ, hĩnĩngĩtĩ athĩhĩ nẽẽ Nyekuc, ĩnõõ ꞌcĩ elemeet Nyekuci ngagĩĩt, hĩnĩngĩtĩ lemiinit cĩnaac ko.#Tigiil ꞌBuuk cĩ Tegellwaanu 143:2; ꞌRooma 3:20-22

17“Má baa nga hadiim naag ꞌJudeei hummuddia ꞌgõõl ꞌcĩ elemmeet Krĩstõ ngagĩĩta, hiita hummuddia naag buúk ngaatĩ hĩĩgĩnnĩ ꞌthẽccanniook. Aĩ occa thõõth ciee Krĩstõ ꞌcĩ aaꞌnyeet hĩĩtõ ꞌthẽccanniook ko? Aitiõõ ũdũt! 18Má occa hĩꞌthaan naa ꞌgiimwa baa hũtũngeeha ẽlẽk nẽ hẽtẽhẽnya tarĩ, hammuddia hinnia hĩĩnĩ eet ꞌcĩ hẽꞌthẽcanõ baa ĩĩcĩ oou. 19Nyattal ꞌcĩ baa aruka nganĩĩt hadaak ko nẽ õõgawaa nganĩĩt, hátĩ hũrũg naa hĩ Nyekuc. 20Baa hadaakta naag hĩ Krĩstõ hurucceea ẽlẽk nẽ ꞌyioko, ĩĩ ĩnõõnnõ dioo ꞌcĩ arũgĩ ẽllaa caannĩ. Nẽ rũgẽtĩ ꞌcĩ haꞌnyahi naa ẽllaa caannĩ ho, harugi naa hĩnĩngĩtĩ lemiinit cĩ Ngeertĩ Nyekuc baa ammĩnannaa nganĩĩt nẽ adaak, hĩnĩngĩtĩ nganĩĩta. 21Nga hũtũbũr naa bũnnai cĩ Nyekuci. Má helemit naag ngaatĩ heellianĩ ꞌgõõlaa ꞌcĩ hanũĩ nyattal, ĩko thĩ mĩĩ baa adaak Krĩstõ haaga!”

Currently Selected:

ꞌGalaaꞌthia 2: did

Highlight

Copy

Compare