Luugithõõ 19
19
Muuraa cĩ ꞌThĩnaĩ
1Ma baa urutaa cĩ nyĩlõhĩ iyyio, iita ũtũngteek eeta cĩg Ĩꞌthĩraẽlĩ Ijjib, kõr niccia dẽẽdẽ nẽ õõt õdõlanit horu ꞌcĩ õdõhõhĩĩ kak ꞌcĩ haĩ ꞌThĩnaĩ. 2Nẽ tarĩ urutaa ꞌcĩ ũtũngtẽẽhĩ eeta cĩg Ĩꞌthĩraẽlĩ ꞌRevidim, iita uduhunit horu ꞌcĩ õdõhõhĩĩ kak cĩ ꞌThĩnaĩ nẽ etteedito tuggẽẽt muura uruta nĩngaata.
3Ma ho, õtõd Mũũꞌtha ũũk ĩĩcĩ aayyi Nyekuci, nĩngĩtĩ avvaanĩ Makayyioohiti ĩnõõnnõ muura nẽ ĩĩnnĩk, “Thõõth ꞌcĩ occa õkõ aduhaahi nii halang cĩ Yakobo hĩ eet cĩg Ĩꞌthĩraẽlĩ cieeni, 4‘Baa udtuuktau niig hẽbẽrẽẽnnĩĩ cugguung thooꞌthiok baag hadĩmani naa Ijjiba, hĩ ꞌgõõl baa haꞌnyahaannuung hĩ ꞌthuuti ꞌcĩ attiran ꞌcĩ irriongan lõhõlĩ cĩgĩnnĩg havvuutõnĩ. 5Nẽẽthĩ ꞌyioko, má athĩknaangu nganĩĩt jurrung nẽ uꞌthuuttu lõhõt caannĩ, iiginnu hatĩ eet cĩgannĩg dẽẽdẽ eetini vẽlẽk. Hĩnĩngĩtĩ, ĩĩn lõõcĩ vẽlẽk caannĩ, 6iiginnu hatĩ niig habuccieet caannĩ cĩ paadĩrꞌnyaannu, eet cĩgannĩg ꞌcĩg ẽllẽẽmĩthĩ.’ Nyeemuut ꞌcĩ adiim aduhaahi nii eet cĩg Ĩꞌthĩraẽlĩ ho cieeni.”
7Nĩngĩtĩ õbõdõõꞌthĩ Mũũꞌtha nẽ ũũk ũtũvva makayyiook cĩg eetuk nẽ ẽddẽẽbak ĩhõõggõ thooꞌthiok aag aduhaak Makayyioohiti ĩnõõnnõ. 8Baa ẽdẽca eeta vẽlẽk aĩ, “Hadĩmanna hatĩ thooꞌthiok vẽlẽk ꞌcĩg aduha Makayyioohiti ho.” Nĩngĩtĩ õbõdõõꞌthĩ Mũũꞌtha ĩĩcĩ aayyi Makayyioohiti hũũk huduhaak ĩnõõnnõ thõõth ꞌcĩ aduha nẽẽg ko.
9Ma ho, uduhaak Makayyioohiti Mũũꞌtha tarĩ ĩĩnnĩk, “Hõkõ hatĩ hakuu naa hĩ nganiit loduruatõõ cobbi gẽrrẽẽt, hátĩ hĩthĩhĩt eeta ngaatĩ hõthõõthõnĩ naag hĩ nganiit nẽ hatĩ gõõng aarrik nẽẽg lemiinit cĩnĩĩng hĩ nganiita.” Nĩngĩtĩ aduhaakĩ Mũũꞌtha Makayyioohit thõõth ꞌcĩ baa aduha eeta.
10Nẽ tarĩ uduhaak Makayyioohiti Mũũꞌtha ĩĩnnĩk, “Bodooth bĩĩt kũmmaneek eet hiita homottiooa hĩ nganĩĩta. Aꞌnyĩĩk ĩhõõggõ kõr nicci hũtũũnyĩtõ ceremwa cĩggĩĩng, 11nẽ ũkũmattoothihu jurrung kõrraa ꞌcĩ ĩĩn iyyio, hĩnĩngĩtĩ kõr niccia, alluuccia hatĩ Makayyioohiti Muuraa cĩ ꞌThĩnaĩ hĩcĩnĩt eeta vẽlẽk. 12Etteedit lõkõõrĩ hatawan muur hũtũrũũr. Uduktaak eet anneek, ‘Uꞌthuutti eleeti! Ma hotoddu muur hode nẽẽ hahummu lõkõõrĩ cĩnnĩ haaga. Aruhi hatĩ ẽẽtĩ ꞌcĩ õtõd muur hadaak nĩĩcĩ noho. 13Ohoddia eet ꞌcĩ ẽttẽẽd lõkõõrĩ hode ĩccaac lĩꞌthaanĩtĩ nẽ ma hahummu ĩnõõnnõ. Tananga ĩĩn eet hode ꞌgii ꞌcĩ aballi õlõ, hõllõngaa occa ũũnnothoothĩk hũrũg.’ Occa õtõd eeta muur hatĩ adtahĩ illieeri ꞌcĩ adĩmanniaa ottoonaa cĩ merkeco diooni.”
14Ma baa ũllũũcĩ Mũũꞌtha muura ũũk loota, ũũk uduhaak nẽẽ eet hũtũũnyĩtõ eleeti cĩggĩĩng hĩĩtõ tẽllĩg nẽ ũcũũrĩtõ ceremwa cĩggĩĩng buúk. 15Ma ho, uduhaak nẽẽ eet ĩĩnnĩk, “Hõlõ, ũkũmatteek eleeti cugguung, hĩnĩngĩtĩ kõr ꞌcĩ ĩĩn iyyio. Nẽẽthĩ, ma nõõ hooginnu hĩ ngaaĩ.”
16Ma baa loohoth cĩ kõr ꞌcĩ ĩĩn iyyio, ikia ammad lõõcĩ nẽ ĩccaaõ habath dtẽc nẽ edeeꞌnyia loduruui muura hujjieen nẽ ẽggẽrẽny tũũrĩ hĩdĩĩtĩ lõõcĩ pĩd. Nĩngĩtĩ abarti eeta tuggẽẽtĩ tõõ habath lõõcĩ dtẽc. 17Ma nĩngaata, uduhunaaĩ Mũũꞌtha eet tuggẽẽtĩ tõõ battaala nẽ ũũhĩ ĩhõõggõ hõõt homottio hĩ Nyekuc nẽ õõt ĩbĩlĩt eeta muura uruta. 18Baa ammũt Muur cĩ ꞌThĩnaĩ ho bũrrẽtĩ, hĩnĩngĩtĩ baa alluuccia Makayyioohiti haau hĩ ꞌgwaa. Baa aburrut bũrrẽtĩ haau hĩ gõõng akannĩ eeta looc ꞌgwoo nẽ õtõmõ muur ꞌbuth, 19nẽ ẽggẽrẽny tũũrĩ gẽrrẽẽt hĩdĩĩtĩ lõõcĩ pĩd. Ma ho, õthõõth Mũũꞌtha nẽ ẽdẽc Nyekuci ĩnõõnnõ moloohaa cobbi gẽrrẽẽt.
20Ma ho, ulluucciak Makayyioohiti Muur cĩ ꞌThĩnaĩ nẽ ũtũvvũ Mũũꞌtha hõtõd muura hujjieen. Nĩngĩtĩ õtõdĩ Mũũꞌtha õkõõĩ, 21nẽ ũũk ĩĩnnĩk Makayyioohiti ĩnõõnnõ, “Bĩĩt duhaak eet hiittiõõ hõllõngaa ẽꞌngẽrkẽẽthana lõkõõrĩ, hatĩ au acĩn Makayyioohit, má ẽꞌngẽrkẽẽthatta, adaahĩ hinnia hatĩ eeta ꞌcĩg mẽẽlẽẽgĩ. 22Tananga paadĩrꞌnya ꞌcĩg au õbõhõõ hĩ Makayyioohit, adiim nõõ hũtũũnyĩtõ ꞌthẽccanẽẽt ꞌthinneetinii cĩggĩĩng, má aitiõõ, aruk hinnia hatĩ Makayyioohiti ĩhõõggõ hĩĩ dtĩng.”
23Anneek hinnia Mũũꞌtha Makayyioohit, “Aitiõõ eeta hõllõngaa occa õtõda Muur cĩ ꞌThĩnaĩ ho hiita lokora, hĩnĩngĩtĩ baa eggerꞌnyeekeet nii ngagĩĩt aini, ‘Etteedit lõkõõrĩ hirriaman muur hũtũrũũr nẽ aanytĩhu hiꞌngiranĩ haawua ꞌrẽẽna.’ ”
24Ẽdẽcĩ Makayyioohiti Mũũꞌtha anneek, “ꞌLũũcĩ õõt ookorria hĩ Arõõnẽ. Nẽẽthĩ, ma haaꞌnyihi paadĩrꞌnya hĩ eet hĩrrĩĩnyta hiita hõbõktõ hĩ Makayyioohit, má ĩrrĩĩnyta dẽẽdẽ, acũda hinnia hatĩ Makayyioohiti ĩhõõggõ hĩĩ lõõcĩ ꞌthĩĩ!”
25Nĩngĩtĩ allũũcẽnĩ Mũũꞌtha nẽ ũũk uduhaak eet thõõth icci.
Currently Selected:
Luugithõõ 19: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
