Luugithõõ 17

Maam ꞌcĩg ariha lõbaraba

1Baa ikia ũtũngeek lothippiti cĩ eet cĩg Ĩꞌthĩraẽlĩ horu ꞌcĩ ꞌThĩnĩ nẽ õtõõcõ lõkõrẽẽt vẽlẽk hĩ baa aduha Makayyioohiti. Baa ẽttẽẽd nẽẽg tuggẽẽt cĩggĩĩng ngaatĩ haĩ ꞌRevidim, nẽẽthĩ hinnia, baa hiꞌthihi maam ꞌcĩg occa ahũd eeta. 2Ma nĩngaata, iita ongoongoyyieek eeta cĩg Ĩꞌthĩraẽlĩ Mũũꞌtha ĩĩttĩk, “Aaꞌnyeet maam huhuddia.”

Ẽdẽcĩ hinnia Mũũꞌtha ĩhõõggõ anneek, “Inni eggerenyteehaangu niig nganĩĩt ko? Inni ĩttĩmanit niig Makayyioohit ko?”

3Nẽẽthĩ, baa aam eet kõrra nĩngaata gẽrrẽẽt, nĩngĩtĩ õngõõngõẽẽkĩ Mũũꞌtha. Baa anneek nẽẽg Mũũꞌtha, “Aluuganneet baa nõõ ꞌthẽk nii ngagĩĩt Ijjiba nẽ ꞌyioko, ĩĩnanaaeet hikia hõhõdaaeet kõrra hĩ lõhõlĩ hĩ tĩĩn cĩggaang vẽlẽk ko inni?”

4Nĩngĩtĩ ĩĩlalẽẽkĩ Mũũꞌtha Makayyioohit annẽẽkĩ, “Hogooni occa ꞌthẽk naa eet iccig hutuno? Õbõktĩ nẽẽg ngaatĩ õhõdaanna nganĩĩt biyyiẽẽnĩ.”

5Ma nĩngaata, ẽdẽc Makayyioohiti Mũũꞌtha ĩĩnnĩk, “Tuanẽẽhĩ nẽẽ nii eet ĩĩcĩ oou. Thõhõt makayyiook ũgĩ cĩg eet cĩg Ĩꞌthĩraẽlĩ nẽ othohotuu hĩbahĩt baa uuki nii hidioo cĩ Naaĩlĩ buúk attiaa cunni nẽ oottu. 6Habili hatĩ naa muumaa cunni lõbaraba ngaatĩ haĩ Horeb. Uuk lõbarab hĩbahĩta, hátĩ hirikta maama ꞌcĩg ahũd eeta.” Nĩngĩtĩ adĩmanĩ Mũũꞌtha thõõth icci hẽbẽrẽẽnnĩĩ cĩg makayyiook cĩg eet cĩg Ĩꞌthĩraẽlĩ. 7Ma nĩngaata, akateek Mũũꞌtha nĩngĩtĩho ꞌthaarriok ꞌcĩg haĩ Maaꞌtha hĩ Meriba;#17:7 Maaꞌtha: Aĩ ꞌthaara ꞌcĩg haĩ Maaꞌtha ho Ebereeiyyi, “ꞌtĩmman” nẽ ĩĩtõ ꞌcĩg haĩ Meriba, “ꞌgẽrẽnyõõn.” hĩnĩngĩtĩ baa ẽggẽrẽny eeta cĩg Ĩꞌthĩraẽlĩ nẽ ĩttĩmanit Makayyioohit ĩĩtõ, “Aaĩ ꞌthẽk Makayyioohiti hõrggẽẽnaa cĩnaac hode aitiõõ?”

Ĩllõõanit eeta cĩg Ĩꞌthĩraẽlĩ eet cĩg Amalẽhĩ

8Ma ho, iita urukto eeta cĩg Amalẽhĩ hĩ eet cĩg Ĩꞌthĩraẽlĩ ꞌRevidima. 9Nĩngĩtĩ annẽẽkĩ Mũũꞌtha ꞌJooꞌthua, “Bẽra eet ũgĩ hõõt hurukto hĩ eet cĩg Amalẽhĩ. Habili hatĩ naa lohotha muura lokora, haggami hĩbahĩt cĩ Nyekuci athĩnĩĩ cĩgannĩg.”

10Ma nĩngaata, urukto ꞌJooꞌthua hĩ eet cĩg Amalẽhĩ, hĩ baa aduha Mũũꞌtha, baa nẽ õõt Mũũꞌtha hĩ Arõõnẽ hĩ Hur muura lokora. 11Ma baa õdõng Mũũꞌtha athĩn cĩgĩnnĩg ꞌjieena, ĩllõõan eeta cĩg Ĩꞌthĩraẽlĩ mĩrõk, má aarĩk nẽẽ athĩn cĩgĩnnĩg loota, ĩllõõan hinnia eeta cĩg Amalẽhĩ. 12Ma baa ippiirria athĩna cĩg Mũũꞌtha, itikta Arõõnẽ hĩ Hur bẽẽ umwa nẽ aanytĩk Mũũꞌtha hiccioloonganĩ loota. Ma ho, odongit Arõõnẽ hĩ Hur athĩn cĩg Mũũꞌtha ꞌjieena, baa õdõng Arõõnẽ aꞌthiit umwa nẽ õdõng Huri buúk umwa, hátĩ haallattia athĩna cĩgĩnnĩg ꞌjieena ĩꞌthõng hokoloothĩk kõrra. 13Nĩngĩtĩ ĩllõõanĩ ꞌJooꞌthua athegereeꞌnya cĩg Amalẽhĩ jora.

14Ma ho, uduhaak Makayyioohiti Mũũꞌtha ĩĩnnĩk, “Tẽhẽẽd thõõth icci waragaawa hĩĩ ꞌgii ꞌcĩ hatĩ ammuhaannu nẽ dĩdĩ, aꞌnyĩĩk ꞌJooꞌthua hĩthĩk thõõth icci, hĩnĩngĩtĩ hacũda hatĩ naa eet cĩg Amalẽhĩ loota nĩnga hĩĩ dtĩng.”

15Nĩngĩtĩ aku ẽhẽnytĩ Mũũꞌtha nĩngĩtĩ ĩbbõõrĩ ꞌgaarrieenit nẽ akateek ꞌthaar ꞌcĩg haĩ, “Aaꞌnya Makayyioohiti ꞌtirrian hĩllõõan mĩrõk.” 16Baa aĩ nẽẽ, “Hĩnĩngĩtĩ baa odongoothĩk athĩna dtaaba cĩ Makayyiookto. Aruhõõ hatĩ gõõng Makayyioohiti hĩ eet cĩg Amalẽhĩ irkiꞌnyia hĩ irkiꞌnyia.”

Currently Selected:

Luugithõõ 17: did

Highlight

Copy

Compare