Luugithõõ 10
10
Ĩꞌthõõa Nyekuci ꞌgirooc
1Ma ho, uduhaak Makayyioohiti Mũũꞌtha ĩĩnnĩk, “Mũdoothĩk habu cĩ Ijjibi, hĩnĩngĩtĩ haaꞌnyĩha naa ĩnõõnnõ hĩ makayyiook cĩgĩnnĩg hilloorito, hátĩ hidtican naa thooꞌthiok ꞌcĩg ĩnaat eeta hõrggẽẽnaa cĩnĩĩng, 2hátĩ uduktaak lõhõlĩ cugguung hĩ lõhõlĩ cĩg lõhõlĩ cugguung, thõõth ꞌcĩ huuki naa eet cĩg Ijjibi nẽ hidticana thooꞌthiok ꞌcĩg ĩnaat eeta hõrggẽẽnaa cĩnĩĩng, nẽ agayyu ngaatĩ hĩĩnnĩ naa Makayyioohit.”
3Nĩngĩtĩ õõ ammũdõõthĩkĩ Mũũꞌtha hĩ Arõõnẽ habu cĩ Ijjibi nẽ ĩĩttĩk, “Thõõth ꞌcĩ aduha Makayyioohiti Nyekuci cĩ Ebereei cieeni, ‘Aburi hatĩ nii ngaatĩ athĩkna nganĩĩt ĩꞌthõng ningina? Lahaneeka eet cĩgannĩg hõõt halayyia nganĩĩta. 4Má aburi ngaatĩ alahanẽẽekĩ ĩhõõggõ hõõt, hĩꞌthõõahi hatĩ looc cunni ꞌgirooc lohotha. 5Ammũlũũnyan hatĩ ꞌgirooc looc vẽlẽk hiittiõõ hõllõngaa edeeꞌnyia ꞌthẽẽma. Au hatĩ aduheek hẽlẽggĩ hĩ hẽẽn ꞌcĩg nga abĩlĩ ꞌcĩg baag anyiꞌthia tammu cĩ telleenu manẽẽnĩtõõ cugguung hĩĩ dtĩng. 6Abbĩꞌthĩĩ hatĩ ꞌgirooc ꞌcieethi cugunnig hĩ cĩg makayyiook cugunnig, hĩ cĩg eet cĩg Ijjibi vẽlẽk, ꞌgirooc ꞌcĩ nga hĩcĩnĩt maajihu hode hĩbaangĩ cugguung nganĩngĩtĩ õlõmanĩ looc icci.’ ” Nĩngĩtĩ ũũnnĩkĩ Mũũꞌtha habu cĩ Ijjibi.
7Ma ho, uduktaak habu cĩ Ijjibi makayyiooha cĩgĩnnĩg ĩĩttĩk, “Ehecceet hatĩ ẽẽtĩ ciee ngagĩĩt ĩꞌthõng ningina? Lahaneek eet cĩg Ĩꞌthĩraẽlĩ hõõt, hátĩ halaacõ Makayyioohit Nyekuc cĩnĩĩng. Aitiõõ ꞌthẽk nii hõllõngaa adtuuha ngaatĩ ẽꞌthẽcanõõĩ lõõcĩ cĩ Ijjibi ho?”
8Nĩngĩtĩ aꞌnyakiaanĩ Mũũꞌtha hĩ Arõõnẽ hiita hĩ habu cĩ Ijjibi. Ma ho, ĩĩnnĩk habuui cĩ Ijjibi ĩhõõggõ, “Hõlõ, õõt alaac Makayyioohit Nyekuc cunuung. Nẽẽthĩ, hĩ nganĩ hatĩ dẽẽdẽ ꞌcĩg õõ ho?”
9Ẽdẽcĩ Mũũꞌtha anneek, “Hooyyia ꞌthẽk naag vẽlẽk hĩ nyakangaaꞌnya hĩ morwak lõhõlẽẽnĩĩ cĩggaang noho nẽ hiꞌngiddia hẽlẽggĩ cĩggaang vẽlẽk, hĩnĩngĩtĩ haĩ ꞌthẽk hoottia hadakta karrama cĩ Makayyiookto.”
10Ẽdẽcĩ hinnia habuui cĩ Ijjibi Mũũꞌtha anneek, “Aaĩ thĩ mĩĩ Makayyioohiti hĩ ngagiit, hatĩ mĩĩ nẽẽ hẽlẽmaakuung naa ookorit hĩ ngaaĩ lõhõlẽẽnĩ noho! Hittiamani ꞌyioko nẽ hudtuuha ngaatĩ ogolleekaangu muhẽẽttaa ꞌcĩ abathĩ. 11Aitiõõ tõõ! Aꞌnyĩĩk eet ꞌcĩg maacĩg dioo hõõt halaacõ Makayyioohit, hĩnĩngĩtĩ thõõth ꞌcĩ adiimmu niig ko niccia.” Nĩngĩtĩ agurroothĩkĩ Mũũꞌtha hĩ Arõõnẽ battaali hũtũngteek habu cĩ Ijjibi.
12Ma nĩngaata, uduhaak Makayyioohiti Mũũꞌtha ĩĩnnĩk, “Dongeek aꞌthiit cunni looc cĩ Ijjibi, hátĩ hikia hũmmũlũũnyan ꞌgirooc looc cĩ Ijjibi nẽ adak ꞌgii vẽlẽk baa nga anyiꞌthia tammu cĩ telleenu manẽẽnĩtõõ hĩĩ ꞌthĩĩ.”
13Ma nĩngaata, odongeek Mũũꞌtha looc cĩ Ijjibi ho hĩbahĩt cĩnnĩ, nĩngĩtĩ aaꞌnyĩkĩ Makayyioohiti ngõõt cĩ uruto huuhan looc waathĩn hĩ baalin vẽlẽk. Ma baa ngerrenita, ĩtĩgĩra ngõõtĩ ꞌgirooc; 14hĩꞌthanothoothĩk looc cĩ Ijjibi hũtũrũũr nẽ ikia õlõman lokor cĩ Ijjibi vẽlẽk hĩbbĩt haaga. Baa nga haau ꞌgirooc ꞌcĩ ĩĩn noho looccaa cĩ Ijjibi ũdũt nẽ hõllõngaa hatĩ aku tarĩ. 15Ammũlũũnyan ꞌgirooc looc vẽlẽk hĩĩ holittup. Adak ꞌgii vẽlẽk ꞌcĩ anyiꞌthia tammu cĩ telleenu hĩĩ dtĩng. Ẽgĩ ꞌgii vẽlẽk manẽẽnĩtõõ nẽ adahit hẽẽn ꞌcĩg abbiiri hĩĩ ꞌthĩĩ. Uduktoothĩk bõllõõha cĩg heenu Ijjiba hũtũrũũr hĩĩ lõõcĩ ꞌthĩĩ.
16Nĩngĩtĩ avvaanĩ habuui cĩ Ijjibi Mũũꞌtha hĩ Arõõnẽ hĩdĩĩkoothong nẽ ĩĩnnĩk, “Hõlõ hẽꞌthẽcana naa muumaa cĩ Makayyioohit Nyekuc cunuung hĩ muumaa cunuung. 17Nẽẽthĩ ꞌyioko, atamaattihaangu tarĩ nẽ alayyiooyyiaangu hĩ Makayyioohit Nyekuc cunuung, hittik ꞌthẽrẽt icci abathĩ ho battaala hĩ nganĩĩta.”
18Nĩngĩtĩ ũũnnĩkĩ Mũũꞌtha habu cĩ Ijjibi nẽ ũũk ala Makayyioohit. 19Ma ho, ũtũhũ Makayyioohiti ngõõt hikia ĩĩ gõõng õkõlõõthĩkĩ kõrra, huuhanneek ꞌgirooc Bũlũcatõõ ꞌcĩ Marihi.#10:19 Bũlũc ꞌcĩ Marihi: Haĩ bũlũc icci ꞌthaar ũgĩ, “Bũlũc cĩ Ĩhaoonnu.” Baa nẽ iittiõõ ꞌgirooc ꞌcĩ idiongan looccaa cĩ Ijjibi tarĩ tõõ. 20Ma ngaati, aaꞌnyĩk hinnia Makayyioohiti habu cĩ Ijjibi hĩllõõr tarĩ nẽ iittiõõ hõllõngaa alahaaneek eet cĩg Ĩꞌthĩraẽlĩ hõõt.
Muguur
21Ma ho, uduhaak Makayyioohiti Mũũꞌtha ĩĩnnĩk, “Dongeek aꞌthiit cunni hẽẽtahujjieen, hátĩ hũmmũlũũnyan muguuri Ijjib.#10:21 Ũmmũlũũnyan muguuri Ijjib: Baa aaꞌnyĩk Nyekuci looc hĩĩ muguur, hẽtẽrẽtha ngaatĩ aꞌnyahĩ nẽẽ makaaꞌthĩt ꞌcĩ ĩllõõanĩ nyekuꞌnya cĩg Ijjibi. Baa gõõng ala eeta cĩg Ijjibi kõr aar hĩĩ nyekuc umwa cĩnĩĩng. Muguur umwa ꞌcĩ holittẽr ꞌcĩ occa ahumi attia.” 22Nĩngĩtĩ õdõngĩ Mũũꞌtha aꞌthiit cĩnnĩ hẽẽtkujjieen nẽ ikia muguuuri ꞌcĩ ũdaan looc cĩ Ijjibi vẽlẽk waathinniook iyyio. 23Baa aitiõõ eet ꞌcĩ occa acĩn ꞌgõõnĩ tõõ hode nẽẽ occa ũũnnĩk ẽẽtĩ nĩngĩtĩ ꞌcĩ aayyi waathinnioohĩĩ ꞌcĩg ĩĩn iyyio ho. Nẽẽthĩ nẽẽ, baa aara lõõcĩ hĩ eet cĩg Ĩꞌthĩraẽlĩ ngaatĩ baa aattiyyi nẽẽgĩ.
24Ma ho, ũtũvvũ habuui cĩ Ijjibi Mũũꞌtha nẽ ĩĩnnĩk, “Ẽlẽ, õõt alaac Makayyioohit. Ookorit hĩ ngaaĩ cugguung lõhõlẽẽnĩ noho, nẽẽthĩ, ma hangiddu hẽlẽggĩ buúk.”
25Ẽdẽcĩ hinnia Mũũꞌtha habu cĩ Ijjibi ho anneek, “Abũnnaa alahaneekeet nii ngagĩĩt hoottia hibboorriha ꞌgaarriẽẽn Makayyioohit Nyekuc cĩnaang. 26Hadiimma ꞌthẽk haꞌngĩdda hẽlẽggĩ cĩggaang buúk, occa nõõ hõllõngaa hũũnnĩka maccĩhĩlleenit haaga uruta. Hadiimma hõõ hẽbẽraanna ꞌgaarriẽẽn ꞌcĩg halayya Makayyioohit Nyekuc cĩnaang, hẽlẽggẽẽnnĩ ĩcĩg, hatĩ hõdõlatta ĩĩca. Nẽ hõllõngaa hagayyĩa hõõ hatĩ halayyia Makayyioohit hutuno, ĩꞌthõng hõdõlatta ĩĩca.” 27Ma ho, aaꞌnyĩk hinnia Makayyioohiti habu cĩ Ijjibi hĩllõõr hiittiõõ hõllõngaa ẽlẽmaakĩ eet hõõt. 28Ma nĩngaata noho, ĩĩnnĩk habuui cĩ Ijjibi Mũũꞌtha, “Maꞌnyanĩ muumaa caannĩ! Ma huppwaanna ngaatĩ haayyi naa tarĩ! Kõr ꞌthẽk ꞌcĩ uppwaannanĩĩ ngaati tarĩ, adaahi ꞌthẽk hatĩnĩ.”
29Ẽdẽcĩ Mũũꞌtha anneek, “Hĩcĩ aduha nii hataa, iittiõõ hatĩ hõllõngaa hõmmõtõõ tarĩ.”
Currently Selected:
Luugithõõ 10: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
