Dtiicanĩ cĩg ꞌThooyyiahu 3

Aaꞌnyĩk Pẽẽtũrũ tuhuulliahit hũbũna

1Kõr umwa, baa õõ Pẽẽtũrũ hĩ Yõaannẽ ꞌCieethaa cĩ Nyekuci ꞌthaa cĩ laiitto, baa ꞌthaa iyyio cĩ ꞌjiaatinu. 2Baa aaĩ eet umwaa ꞌcĩ ahuuli nganĩngĩtĩ arrittiaanĩ, ꞌcĩ irrionganoothĩk hattũũgaa cĩ ꞌCieeth cĩ Nyekuci, ꞌcĩ anneek eeta Hattũũg ꞌcĩ Ẽllẽẽmĩthĩ. Gõõng aarĩhoothĩk tuhuulliahiti tĩho hõdõõkõthĩ hikia hala eet ꞌcĩg aduhun ꞌCieeth cĩ Nyekuci. 3Ma baa adtuuha nẽẽ Pẽẽtũrũ hĩ Yõaannẽ õbõktĩ uduhunit ꞌCieeth cĩ Nyekuci ĩĩttõõ, ikia ala ĩhõõggõ ꞌrabbẽẽta. 4Nĩngĩtĩ acĩnĩ Pẽẽtũrũ hĩ Yõaannẽ ĩnõõnnõ. Ma ho, ĩĩ Pẽẽtũrũ, “Cĩneet da ngagĩĩta!” 5Ma nĩngaata, ĩcĩn ẽẽtĩ ꞌcĩ ahuuli ho ĩhõõggõ muhẽẽttaa ꞌcĩ aĩ, aaꞌnya hatĩ ꞌgiimwa.

6Ma ho, ĩĩnnĩk Pẽẽtũrũ ĩnõõnnõ, “Ẽlẽ, aitioonna maccĩrẽẽna hode ꞌdaabĩ tõõ. Nẽẽthĩ nẽẽꞌthẽk, occa haaꞌnyii ꞌgiimwa ꞌcĩ haꞌnyahi. ꞌThaarĩĩ cĩg Yeesu Krĩstõ cĩ Naaꞌtharẽtĩ, tĩnga bĩtõ.” 7Nĩngĩtĩ aggamĩ Pẽẽtũrũ aꞌthiit cobbi cĩ tuhuulliaktõ nẽ õdõng hĩbĩl ꞌjieena. Ma ho, okomit eet ꞌthoona hĩ hẽbẽrĩ cĩg ꞌthoonu noho. 8Ma nĩngaata, ĩꞌngõth tuhuulliahiti hĩbĩl ꞌjieena, nĩngĩtĩ õvvõõĩ. Nẽ iita ookorit hĩ Pẽẽtũrũ hĩ Yõaannẽ, uduhunit halang cĩ ꞌCieeth cĩ Nyekuci, iꞌnyiahanoothi nẽ atalõõthĩ Nyekuc ꞌjieena. 9Baa adtuuha eeta vẽlẽk ĩnõõnnõ ngaatĩ õvvõõĩ nẽ ĩdĩhĩth Nyekuc. 10Ma nĩngaata, agaacõ ngaatĩ ĩĩnnĩ tuhuulliahit gõõng ala eet hattũũgaa ꞌcĩ Ẽllẽẽmĩth ĩĩcĩ halang cĩ ꞌCieeth cĩ Nyekuci, nĩngĩtĩ akulẽẽkĩ eeta ꞌjieen gẽrrẽẽt. Baa hõllõngaa aga ne ꞌcĩ aaꞌnyĩk ĩnõõnnõ haau noho ho.

Irrioon Pẽẽtũrũ ꞌCieethaa cĩ Nyekuci

11Ma baa nga odoknoothĩk tuhuulliahiti Pẽẽtũrũ hĩ Yõaannẽ, iita eeta vẽlẽk ꞌcĩg baag acĩn thõõth ꞌcĩ ĩnaatti ho ivvirroothĩk ĩhõõggõ ngaatĩ haĩ ꞌThĩĩm cĩ ꞌThõlõmõõnẽ. 12Ma adtuuha Pẽẽtũrũ lothippit ko, ĩĩnnĩk, “Niig eeta cĩg Ĩꞌthĩraẽlĩ, akuleeku ꞌjieen inni? Akanneetu ngagĩĩt hẽbẽrĩ haautta hĩcĩ ĩĩn ꞌtirrian cĩnaang ꞌcĩ haaꞌnyĩka tuhuulliahit icci hõtõ ho inni? 13Nyekuc cĩ Abũrahamĩ#3:13 Abũrahaamõ: Baa avvĩ Nyekuci Abũrahaamõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. hĩ cĩ Iꞌthaako#3:13 Iꞌthaako: Baa ĩĩn Iꞌthaako ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. hĩ cĩ Yakobo,#3:13 Yakobo: Baa ĩĩn Yakobo ngeertĩ loholeec cĩ Abũrahamĩ ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eeta cĩg ꞌJudeei. Tigiil thõõth cĩnnĩ ꞌBuuhaa cĩ ꞌThianaattõ 25-50. Nyekuc cĩ hĩbaangĩ cĩggaac ꞌcĩ aggatan dticciannioohit cĩnnĩ Yeesu baa õhõppõõcannu niig huruhi. Baa aburru niig Yeesu hẽbẽrẽẽnnĩĩ cĩg Pĩlaatõ, tananga baa adiim alahaneek Pĩlaatõ ĩnõõnnõ hũũk. 14Aburru hinnia Eet ꞌcĩ Ẽllẽẽmĩth ꞌcĩ Abũnnaa ꞌcĩ ĩĩn hõdẽẽthõng nẽ ĩttĩngatteehu Pĩlaatõ hõõgahuung ꞌloorriahit ꞌcĩ aruk eeta. 15Uruktu eet ꞌcĩ aaꞌnyeet rũgẽt, nẽẽthĩ, baa ũrũgũtha Nyekuci ĩnõõnnõ daahĩtha. Hĩĩgĩnna ꞌyioko naag hẽbẽrĩ cĩg thõõth ꞌcĩ adtican nẽẽ ho. 16Icittu niig tuhuulliahit icci nẽ agayyu ĩnõõnnõ. Aaꞌnyĩk lemiiniti ꞌcĩ ẽlẽmmĩ nẽẽ Yeesu ĩnõõnnõ hikia hũbũna, haau hĩcĩ ꞌyioko acinnu niig vẽlẽk ko.

17“ꞌGotoonoga hĩ ngoonoga, hammuhi occa erekuung ngagiit ꞌgii baa adticannu hĩ baa makayyiooha cugguung. 18Nẽẽthĩ, ĩĩn ciee ꞌgõõl ꞌcĩ aku ẽdẽẽnyanĩ Nyekuci thooꞌthiok baag aduha põrõvẽtaaꞌnya ngaatĩ aĩnnĩ, appĩĩrna hatĩ Krĩstõ. 19Ũtũngteek ꞌthẽccanẽẽt nẽ elemtu Nyekuc, hátĩ hũtũngtoothĩk ꞌthẽccanẽẽta, hátĩ haaꞌnyuung Makayyioohiti ꞌyiomman, 20nẽ hátĩ hĩꞌthõõahuung Yeesu baa ẽbẽra nẽẽ hĩĩ Krĩstõ. 21Nẽẽthĩ, adiim aalla Yeesu hẽẽtahujjieen ĩꞌthõng hikia kõrra ꞌcĩ aaꞌnyĩkĩ Nyekuci hẽlẽggĩ vẽlẽk hĩĩtõ ngeju, hĩ baa aduha põrõvẽtaaꞌnya baag ẽllẽẽmĩth baarkit. 22Hĩnĩngĩtĩ baa aĩ Mũũꞌtha,#3:22 Mũũꞌtha: Urutaa cĩ daahĩth cĩ Yothebo, iita ĩĩtõ lohollia cĩg Ĩꞌthĩraẽlĩ appahacaaꞌnya Ijjiba irkiꞌnyia ꞌmiiaꞌnya ꞌwec. Baa adticaniini Nyekuci Mũũꞌtha hõõgaĩ eet cĩg Ĩꞌthĩraẽlĩ appahacẽẽꞌthĩta. Baa aaꞌnyĩk Nyekuci lõhõlĩ cĩg Ĩꞌthĩraẽlĩ nyattal, hĩnĩngĩtĩ Mũũꞌtha. Ĩnõõ ꞌcĩ haĩnnĩ nyattal icci nyattal cĩ Mũũꞌtha ho. Baa arũgĩ Mũũꞌtha irkiꞌnyia aalib hõdẽĩ hĩ ꞌmiiaꞌnya ꞌwec, baa nga hittirria Yeesu. Tigiil thõõth cĩnnĩ ꞌBuuhaa cĩ Luugithõõ 2-24. ‘Ĩꞌthõõakuung hatĩ Makayyioohiti Nyekuci cunuung ngagiit põrõvẽtaac ꞌcĩ haduhoonna hĩ nganĩĩt eetinii cugguung. Ĩthĩhĩt thõõth vẽlẽk ꞌcĩ aduhaakuung nẽẽ ngagiita. 23Ẽẽtĩ ꞌcĩ hõllõngaa athĩhĩ thõõth cĩ Yeesu, aitiõõ hatĩ ẽẽtĩ tĩho hõllõngaa ĩĩn eet cĩ Nyekuci tarĩ.’#Tigiil ꞌBuuk cĩ Ditoronomi 18:15-19

24“Baa udukta Thamueele hĩ põrõvẽtaaꞌnya baag au uruta buúk, thõõth ꞌcĩ ꞌyioko acinnu niig ko. 25Nẽ iiginnu niig lõhõlĩ cĩg põrõvẽtaaꞌnyanu hĩ cĩg lõhõt baa adak Nyekuci hĩ maajihu. Baa anneek nẽẽ Abũrahaamõ, ‘Ammũda hatĩ eeta cĩg loonyinu vẽlẽk ꞌgattan lõhõlẽẽnĩĩ cugunnig.’#Tigiil ꞌBuuk cĩ ꞌThianaattõ 22:18; 26:4 26Ma baa ũrũgũtha Nyekuci dticciannioohit cĩnnĩ, baa nõõ ĩꞌthõõa nẽẽ ĩnõõnnõ hikia haggatanuung ngagiit hõdẽĩ hõdẽĩ ũtũngteek ꞌthẽccanẽẽta.”

Currently Selected:

Dtiicanĩ cĩg ꞌThooyyiahu 3: did

Highlight

Copy

Compare