Dtiicanĩ cĩg ꞌThooyyiahu 18
18
Paaulo ꞌtaaũnaa cĩ Korinthia
1Baa ũtũngeek Paaulo ꞌtaaũn cĩ Aathẽnĩ nẽ ũũk ꞌtaaũnaa cĩ Korinthia, 2ngaatĩ baa õmmõtõõnĩ hĩ eet ꞌcĩ haĩ Akwila ꞌcĩ baa ĩĩn ꞌJudeeinit cĩ looc cĩ Pontu. Baa nga au Akwila hĩ ngaa cĩnnĩ Piriciilla looccaa cĩ Itali thõng, hĩnĩngĩtĩ baa aduhaak habuui ꞌcĩ haĩ Kalaudio eet cĩg ꞌJudeei hũtũrũũr, hũtũngteek ꞌRooma. Ma ho, ĩtĩnga Paaulo ũũk ĩcĩn Akwila hĩ Piriciilla, 3nĩngĩtĩ õkõ ammũdaanĩ ĩhõõggõ ngaatĩ ĩĩnnĩ eet ꞌcĩg ẽhẽnyta maccamẽẽta. Baa ĩĩn Paaulo buúk eet ꞌcĩ ẽhẽnyta maccamẽẽta. Nĩngĩtĩ arũmẽẽnĩ Paaulo hĩ ĩhõõggõ nẽ idticattõõ hõdẽĩ. 4Korrioohĩĩ cĩg ꞌYiommaanak, baa õkõ Paaulo ꞌCieethaa cĩ Laiitto nẽ ũũk ĩttĩman ngaatĩ alũllũũmanĩ eet cĩg ꞌJudeei hĩ ꞌGirik.
5Ma baa au ꞌThĩĩla hĩ Timotteeo looccaa cĩ Maccedoonia, ikia aala Paaulo illiman eet cĩg ꞌJudeei thõõth baa ĩĩnnĩ Yeesu Krĩstõ. 6Ma baa iita ũtũbũrĩt eet cĩg ꞌJudeei Paaulo nẽ odoomito ĩnõõnnõ thõng, ikia utuddung nẽẽ tuduhaac ceremwaanĩĩ cĩgĩnnĩg nẽ ĩĩnnĩk ĩhõõggõ, “Eheellu hatĩ niig ꞌgii ꞌcĩ hatĩ alubaakuung ngagiit ẽmmẽn! Hõllõngaa hatĩ addangaaka eet umwaa nganĩĩta. Iꞌthianaanĩ ꞌyioko kõr nicci, hũũk hillimmana naa eet ꞌcĩg hõllõngaa ĩĩn ꞌJudeei.”
7Ma ho, ũũk Paaulo halangatõõ cĩ eet umwa ꞌcĩ haĩ Tiito Juutto. Baa ala ẽẽtĩ ciee Nyekuc nẽ baa õlõman nẽẽ ngaatĩ õbõhõõ hĩ ꞌCieeth cĩ Laiitto. 8Baa ĩĩn eet umwa ꞌcĩ haĩ Kirithpo makayyioohit cĩ ꞌCieeth cĩ Laiitto. Ma ho, iita elemit nẽẽg hĩ halang cĩnnĩ vẽlẽk Makayyioohit Yeesu. Nĩngĩtĩ au athĩknĩ eeta ũgẽẽgĩ ꞌcĩg mẽẽlĩg cĩg Korinthia nyeemuut icci nẽ eeta vẽlẽk ꞌcĩg baag elemit Makayyioohit, iita aggamit baattithimo.
9Ma baalin umwa, ikia uduhaak Makayyioohiti Paaulo honoothittatõõ ĩĩnnĩk, “Ma hiteelli, thõõth nẽẽ nii noho, ma hĩjjaaki. 10Hĩnĩngĩtĩ haaĩ naa hĩ nganiita nẽ aitiõõ ẽẽtĩ ꞌcĩ uuki nganiit tõõ. Mẽẽlĩg eeta cĩgannĩg ꞌtaaũnaa cĩ gẽrrẽẽt.” 11Nĩngĩtĩ aayyi Paaulo nĩngaata irkit hõdẽĩ hĩ nyĩlõhĩ tõrkõnõn, ꞌcĩg allimanẽẽkĩ eet thõõth cĩ Nyekuci.
12Baa nga ĩĩn eet ꞌcĩ haĩ ꞌGallio makayyioohit ꞌcĩ aggam looc cĩ Acaia, ĩtĩngaacõ eeta cĩg ꞌJudeei ũgẽẽgĩ aggamit Paaulo nẽ ootti lokihooa, 13nẽ ĩĩtõ, “Adiim ẽẽtĩ ciee ũũhũ eet cĩggaac halaacõ Nyekuc, ꞌgõõlaa ꞌcĩ abũrĩ nyattalĩ cĩnaang!”
14Ma baa nga hõthõõth Paaulo, ĩꞌngaathĩ hinnia ꞌGallio nẽ ĩĩnnĩk eet cĩg ꞌJudeei, “Má abillu niig eet icci ꞌthẽccanẽẽtĩ hode thooꞌthiohĩĩ ũgẽẽgĩ ĩcĩg abathĩ, hathiknuung thĩ hatĩ naa ngagiita. 15Nẽẽthĩ, hĩnĩngĩtĩ ĩĩn jinẽẽnĩtĩ ciee cĩ thooꞌthiok hĩ ꞌthaarriok hĩ nyattal cunuung, agayyieek niig ẽmmẽn. Haburi naa ngaatĩ hẽttẽẽdĩ thooꞌthiok ꞌcĩg aattĩg hoti.” 16Nĩngĩtĩ iiggiaẽẽkĩ ꞌGallio ĩhõõggõ lokihooa battaala. 17Ma ho, ĩtĩnga lothippiti aggam eet umwa ꞌcĩ haĩ Thõõthẽnẽ, ꞌcĩ baa ĩĩn makayyioohit cĩ ꞌCieeth cĩ Laiitto nẽ uukito muumaa cĩ lokihoo. Baa nẽẽ tarĩ, hõllõngaa aallak ꞌGallio thõõth icci ũdũt.
Ittioonito Piriciilla hĩ Akwila Paaulo
18Baa aaĩ Paaulo ꞌtaaũnaa cĩ Korinthia waathinniook ꞌcĩg mẽẽlĩg. Ma ho, ĩtĩnga nẽẽ õtõd haahũl ũũk looccaa cĩ Thiiria. Baa ittioon Piriciilla hĩ Akwila ĩnõõnnõ. Ma baa nga hõtõd nẽẽ haahũl, ikia ũtũhũũc nõõ õõ cĩnnĩ ꞌtaaũnaa ꞌcĩ haĩ Cencerea, hĩnĩngĩtĩ lõbũtĩ ꞌcĩ baa abũtaneek nẽẽ Nyekuc. 19Iita õdõlanit nẽẽg Eevvetho, ꞌtaaũn ꞌcĩ baa aku ũũnnĩkĩ Paaulo Akwila hĩ Piriciilla. Ma ho, ikia ũũk nẽẽ dioo ꞌCieethaa cĩ Laiitto nẽ õõt othooꞌthio hĩ eet cĩg ꞌJudeei. 20Ma baa ĩĩlallieek eeta Paaulo hũrũmtĩ nõõ hĩ ĩhõõggõ waathinniook ũgĩ, baa hinnia abũrĩ nẽẽnĩ. 21Ma baa ĩtĩnga nẽẽnĩ, uduhaak ĩhõõggõ ĩĩnnĩk, “Má ẽlẽmaaka Nyekuci, hõbõda hatĩnĩ.” Nĩngĩtĩ aggamĩ Paaulo haahũl Eevvetho nẽ ũũha.
Heeroni cĩ Paaulo ꞌcĩ ĩĩn iyyio
22Ma baa ikia õdõlan Paaulo ꞌtaaũn cĩ Caetharea, ũũk nõõ ĩꞌtha lothippit cĩ lemmioohu, nẽẽthĩ, edeceek ĩcĩ ꞌtaaũn cĩ Antiohĩ. 23Ma urutaa ꞌcĩ aavvi nĩngaata hĩdĩhĩdĩĩc, ikia eheronoothĩk loonyin ꞌcĩg mẽẽlĩg ꞌGalaaꞌthia hĩ Virigia. Baa õkõ ẽẽl nẽẽ nuyyiook huꞌthuutti lemiinit cĩnĩĩng jurrung.
Appoolo ꞌtaaũnaa cĩ Eevvetho
24Baa aku eet umwaa ꞌcĩ ĩĩn ꞌJudeeinit ꞌcĩ haĩ Appoolo ꞌtaaũnaa cĩ Eevvetho. Baa arrittiaa Appoolo ꞌtaaũnaa cobbi ĩĩcĩ Alethandria. Ĩĩn nẽẽ eet ꞌcĩ aganeek thothi nẽ aganeek thõõth cĩ ꞌBuuk cĩ Nyekuci gẽrrẽẽt. 25Baa allimanoothĩk ĩnõõnnõ thõõth cĩ ꞌgõõl cĩ Makayyiookto nẽ baa õthõõth nẽẽ komiitta nẽ illiman thõõth cĩ Yeesu jurrung, tananga aga nẽẽ baattithimo cĩ Yõaannẽ diooni. 26Baa arrĩcana Appoolo ngaatĩ õthõõthĩ ꞌCieethaa cĩ Laiitto. Ma baa athĩhĩ Akwila hĩ Piriciilla ho, iita ootti Appoolo õlõõ cĩnĩĩng nẽ eelito ĩnõõnnõ hĩthĩk ꞌgõõl cĩ thõõth cĩ Nyekuci jurrung.
27Nĩngĩtĩ adiim õkõõĩ Appoolo looccaa cĩ Acaia. Ma ho, eteheedito nuyyiooha cĩg Makayyiooktak waraga ꞌcĩ aduhaakĩ nuyyiook ũgĩ hiita hommottio hĩ ĩnõõnnõ. Ma baa urutaa ꞌcĩ õdõlanĩ Appoolo Acaia, ikia ĩĩ nẽẽ ellioohit cobbi hĩ eet ꞌcĩg baag ẽlẽmĩ Makayyioohit Yeesu, hĩnĩngĩtĩ tarbalꞌthẽẽt cĩ Nyekuci. 28Baa ẽppẽhanõõ nẽẽ hĩ eet cĩg ꞌJudeei nẽ lothippita, adticaniini nẽẽ thooꞌthiok ꞌcĩg au ꞌBuuhaa cĩ Nyekuci, huduha dĩdĩ ngaatĩ ĩĩnnĩ Yeesu Krĩstõ.
Currently Selected:
Dtiicanĩ cĩg ꞌThooyyiahu 18: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
Dtiicanĩ cĩg ꞌThooyyiahu 18
18
Paaulo ꞌtaaũnaa cĩ Korinthia
1Baa ũtũngeek Paaulo ꞌtaaũn cĩ Aathẽnĩ nẽ ũũk ꞌtaaũnaa cĩ Korinthia, 2ngaatĩ baa õmmõtõõnĩ hĩ eet ꞌcĩ haĩ Akwila ꞌcĩ baa ĩĩn ꞌJudeeinit cĩ looc cĩ Pontu. Baa nga au Akwila hĩ ngaa cĩnnĩ Piriciilla looccaa cĩ Itali thõng, hĩnĩngĩtĩ baa aduhaak habuui ꞌcĩ haĩ Kalaudio eet cĩg ꞌJudeei hũtũrũũr, hũtũngteek ꞌRooma. Ma ho, ĩtĩnga Paaulo ũũk ĩcĩn Akwila hĩ Piriciilla, 3nĩngĩtĩ õkõ ammũdaanĩ ĩhõõggõ ngaatĩ ĩĩnnĩ eet ꞌcĩg ẽhẽnyta maccamẽẽta. Baa ĩĩn Paaulo buúk eet ꞌcĩ ẽhẽnyta maccamẽẽta. Nĩngĩtĩ arũmẽẽnĩ Paaulo hĩ ĩhõõggõ nẽ idticattõõ hõdẽĩ. 4Korrioohĩĩ cĩg ꞌYiommaanak, baa õkõ Paaulo ꞌCieethaa cĩ Laiitto nẽ ũũk ĩttĩman ngaatĩ alũllũũmanĩ eet cĩg ꞌJudeei hĩ ꞌGirik.
5Ma baa au ꞌThĩĩla hĩ Timotteeo looccaa cĩ Maccedoonia, ikia aala Paaulo illiman eet cĩg ꞌJudeei thõõth baa ĩĩnnĩ Yeesu Krĩstõ. 6Ma baa iita ũtũbũrĩt eet cĩg ꞌJudeei Paaulo nẽ odoomito ĩnõõnnõ thõng, ikia utuddung nẽẽ tuduhaac ceremwaanĩĩ cĩgĩnnĩg nẽ ĩĩnnĩk ĩhõõggõ, “Eheellu hatĩ niig ꞌgii ꞌcĩ hatĩ alubaakuung ngagiit ẽmmẽn! Hõllõngaa hatĩ addangaaka eet umwaa nganĩĩta. Iꞌthianaanĩ ꞌyioko kõr nicci, hũũk hillimmana naa eet ꞌcĩg hõllõngaa ĩĩn ꞌJudeei.”
7Ma ho, ũũk Paaulo halangatõõ cĩ eet umwa ꞌcĩ haĩ Tiito Juutto. Baa ala ẽẽtĩ ciee Nyekuc nẽ baa õlõman nẽẽ ngaatĩ õbõhõõ hĩ ꞌCieeth cĩ Laiitto. 8Baa ĩĩn eet umwa ꞌcĩ haĩ Kirithpo makayyioohit cĩ ꞌCieeth cĩ Laiitto. Ma ho, iita elemit nẽẽg hĩ halang cĩnnĩ vẽlẽk Makayyioohit Yeesu. Nĩngĩtĩ au athĩknĩ eeta ũgẽẽgĩ ꞌcĩg mẽẽlĩg cĩg Korinthia nyeemuut icci nẽ eeta vẽlẽk ꞌcĩg baag elemit Makayyioohit, iita aggamit baattithimo.
9Ma baalin umwa, ikia uduhaak Makayyioohiti Paaulo honoothittatõõ ĩĩnnĩk, “Ma hiteelli, thõõth nẽẽ nii noho, ma hĩjjaaki. 10Hĩnĩngĩtĩ haaĩ naa hĩ nganiita nẽ aitiõõ ẽẽtĩ ꞌcĩ uuki nganiit tõõ. Mẽẽlĩg eeta cĩgannĩg ꞌtaaũnaa cĩ gẽrrẽẽt.” 11Nĩngĩtĩ aayyi Paaulo nĩngaata irkit hõdẽĩ hĩ nyĩlõhĩ tõrkõnõn, ꞌcĩg allimanẽẽkĩ eet thõõth cĩ Nyekuci.
12Baa nga ĩĩn eet ꞌcĩ haĩ ꞌGallio makayyioohit ꞌcĩ aggam looc cĩ Acaia, ĩtĩngaacõ eeta cĩg ꞌJudeei ũgẽẽgĩ aggamit Paaulo nẽ ootti lokihooa, 13nẽ ĩĩtõ, “Adiim ẽẽtĩ ciee ũũhũ eet cĩggaac halaacõ Nyekuc, ꞌgõõlaa ꞌcĩ abũrĩ nyattalĩ cĩnaang!”
14Ma baa nga hõthõõth Paaulo, ĩꞌngaathĩ hinnia ꞌGallio nẽ ĩĩnnĩk eet cĩg ꞌJudeei, “Má abillu niig eet icci ꞌthẽccanẽẽtĩ hode thooꞌthiohĩĩ ũgẽẽgĩ ĩcĩg abathĩ, hathiknuung thĩ hatĩ naa ngagiita. 15Nẽẽthĩ, hĩnĩngĩtĩ ĩĩn jinẽẽnĩtĩ ciee cĩ thooꞌthiok hĩ ꞌthaarriok hĩ nyattal cunuung, agayyieek niig ẽmmẽn. Haburi naa ngaatĩ hẽttẽẽdĩ thooꞌthiok ꞌcĩg aattĩg hoti.” 16Nĩngĩtĩ iiggiaẽẽkĩ ꞌGallio ĩhõõggõ lokihooa battaala. 17Ma ho, ĩtĩnga lothippiti aggam eet umwa ꞌcĩ haĩ Thõõthẽnẽ, ꞌcĩ baa ĩĩn makayyioohit cĩ ꞌCieeth cĩ Laiitto nẽ uukito muumaa cĩ lokihoo. Baa nẽẽ tarĩ, hõllõngaa aallak ꞌGallio thõõth icci ũdũt.
Ittioonito Piriciilla hĩ Akwila Paaulo
18Baa aaĩ Paaulo ꞌtaaũnaa cĩ Korinthia waathinniook ꞌcĩg mẽẽlĩg. Ma ho, ĩtĩnga nẽẽ õtõd haahũl ũũk looccaa cĩ Thiiria. Baa ittioon Piriciilla hĩ Akwila ĩnõõnnõ. Ma baa nga hõtõd nẽẽ haahũl, ikia ũtũhũũc nõõ õõ cĩnnĩ ꞌtaaũnaa ꞌcĩ haĩ Cencerea, hĩnĩngĩtĩ lõbũtĩ ꞌcĩ baa abũtaneek nẽẽ Nyekuc. 19Iita õdõlanit nẽẽg Eevvetho, ꞌtaaũn ꞌcĩ baa aku ũũnnĩkĩ Paaulo Akwila hĩ Piriciilla. Ma ho, ikia ũũk nẽẽ dioo ꞌCieethaa cĩ Laiitto nẽ õõt othooꞌthio hĩ eet cĩg ꞌJudeei. 20Ma baa ĩĩlallieek eeta Paaulo hũrũmtĩ nõõ hĩ ĩhõõggõ waathinniook ũgĩ, baa hinnia abũrĩ nẽẽnĩ. 21Ma baa ĩtĩnga nẽẽnĩ, uduhaak ĩhõõggõ ĩĩnnĩk, “Má ẽlẽmaaka Nyekuci, hõbõda hatĩnĩ.” Nĩngĩtĩ aggamĩ Paaulo haahũl Eevvetho nẽ ũũha.
Heeroni cĩ Paaulo ꞌcĩ ĩĩn iyyio
22Ma baa ikia õdõlan Paaulo ꞌtaaũn cĩ Caetharea, ũũk nõõ ĩꞌtha lothippit cĩ lemmioohu, nẽẽthĩ, edeceek ĩcĩ ꞌtaaũn cĩ Antiohĩ. 23Ma urutaa ꞌcĩ aavvi nĩngaata hĩdĩhĩdĩĩc, ikia eheronoothĩk loonyin ꞌcĩg mẽẽlĩg ꞌGalaaꞌthia hĩ Virigia. Baa õkõ ẽẽl nẽẽ nuyyiook huꞌthuutti lemiinit cĩnĩĩng jurrung.
Appoolo ꞌtaaũnaa cĩ Eevvetho
24Baa aku eet umwaa ꞌcĩ ĩĩn ꞌJudeeinit ꞌcĩ haĩ Appoolo ꞌtaaũnaa cĩ Eevvetho. Baa arrittiaa Appoolo ꞌtaaũnaa cobbi ĩĩcĩ Alethandria. Ĩĩn nẽẽ eet ꞌcĩ aganeek thothi nẽ aganeek thõõth cĩ ꞌBuuk cĩ Nyekuci gẽrrẽẽt. 25Baa allimanoothĩk ĩnõõnnõ thõõth cĩ ꞌgõõl cĩ Makayyiookto nẽ baa õthõõth nẽẽ komiitta nẽ illiman thõõth cĩ Yeesu jurrung, tananga aga nẽẽ baattithimo cĩ Yõaannẽ diooni. 26Baa arrĩcana Appoolo ngaatĩ õthõõthĩ ꞌCieethaa cĩ Laiitto. Ma baa athĩhĩ Akwila hĩ Piriciilla ho, iita ootti Appoolo õlõõ cĩnĩĩng nẽ eelito ĩnõõnnõ hĩthĩk ꞌgõõl cĩ thõõth cĩ Nyekuci jurrung.
27Nĩngĩtĩ adiim õkõõĩ Appoolo looccaa cĩ Acaia. Ma ho, eteheedito nuyyiooha cĩg Makayyiooktak waraga ꞌcĩ aduhaakĩ nuyyiook ũgĩ hiita hommottio hĩ ĩnõõnnõ. Ma baa urutaa ꞌcĩ õdõlanĩ Appoolo Acaia, ikia ĩĩ nẽẽ ellioohit cobbi hĩ eet ꞌcĩg baag ẽlẽmĩ Makayyioohit Yeesu, hĩnĩngĩtĩ tarbalꞌthẽẽt cĩ Nyekuci. 28Baa ẽppẽhanõõ nẽẽ hĩ eet cĩg ꞌJudeei nẽ lothippita, adticaniini nẽẽ thooꞌthiok ꞌcĩg au ꞌBuuhaa cĩ Nyekuci, huduha dĩdĩ ngaatĩ ĩĩnnĩ Yeesu Krĩstõ.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.