Dtiicanĩ cĩg ꞌThooyyiahu 17

Pĩĩrnanĩt ꞌtaaũnaa cĩ Tẽꞌthaloonika

1Ma baa õõt uduhunit Paaulo hĩ ꞌgõõnõgĩ ꞌtaaũn ꞌcĩ haĩ Amvipoli hĩ ꞌcĩ haĩ Apollonia, õõt edeccieek ĩꞌthõng ꞌtaaũn cĩ Tẽꞌthaloonika, ngaatĩ baa aayyi ꞌCieeth cĩ Laiitto cĩ eet cĩg ꞌJudeei. 2Hĩgõõng hõdõõkõthĩ, ũũk uduhun Paaulo ꞌCieeth cĩ Laiitto nẽ Korrioohĩĩ cĩg ĩĩn iyyio ĩcĩg ꞌYiommaanak, irrioonĩk nẽẽ eet nẽ uduhaak thooꞌthiok ꞌcĩg au ꞌBuuhaa cĩ Nyekuci, 3ẽddẽẽbak eet pĩĩrnanĩt cĩ Krĩstõ hĩ ngaatĩ ũrũgaaĩ nẽẽ daahĩtha. Baa õthõõth Paaulo aĩ, “Ĩĩn Yeesu ꞌcĩ haduhaakuung naa ngagiit ko Krĩstõ.” 4Iita elemit eeta cĩg ꞌJudeei ũgẽẽgĩ thõõth cĩ Paaulo hĩ ꞌThĩĩla hĩ baa ẽlẽmĩ eeta ꞌcĩg mẽẽlĩg cĩg ꞌGirihi, ꞌcĩg itieelli Nyekuc hĩ ngaaĩ ũgĩ ꞌcĩg mẽẽlĩg ꞌcĩg obbitig.

5Ma nĩngaata, ĩlĩĩllẽẽcõ makayyiooha cĩg ꞌJudeei, nĩngĩtĩ alũtaanĩ ꞌloorriak ꞌcĩg alatan ngaatĩ tũũõ, hiita hiꞌthiattaaĩ jore ꞌtaaũnatõõ. Ma ho, ukullioothĩk õlõ cĩ eet ꞌcĩ haĩ ꞌJaathon hõõt hidiimta Paaulo hĩ ꞌThĩĩla haꞌnyaktaak lothippit. 6Ma baa hõllõngaa ammũda loorriaha cieeg ĩhõõggõ ho, utugurria ꞌJaathon hĩ nuyyiook ũgĩ cĩg Makayyiooktak. Baa agurreek nẽẽg ĩhõõggõ makayyiook cĩg ꞌtaaũnaak nẽ awacahit ĩĩtõ, “Iita eeta cieeg aa gõõng ahacaakeet bathi looc nicci vẽlẽk ko ngaati, 7nẽ ikia aarĩk ꞌJaathonĩ ĩhõõggõ õlõõ cĩnnĩ. Ẽꞌthẽcan nẽẽg vẽlẽk nyattalliook cĩg habu cobbi cĩ ꞌRooma#17:7 Habu cobbi cĩ ꞌRooma: Baa aggam habuui cobbi cĩ ꞌRooma habuẽẽt cĩg loonyin mẽẽlĩg nẽ aggam eet cĩg ꞌJudeei ꞌcĩg aattĩg ꞌJudeea hĩ ꞌcĩg aattĩg ꞌGalileea buúk. Eetinii cĩg ꞌRooma, avvĩ eeta habu cobbi anneek ꞌCẽẽthẽrẽ. ngaatĩ aĩnnĩ, aaĩ eet umwaa ꞌcĩ ĩĩn habu ꞌcĩ haĩ Yeesu.” 8Nĩngĩtĩ au alĩĩllĩ makayyiooha hĩ eet vẽlẽk gẽrrẽẽt baa iita ĩthĩhĩt thõõth icci. 9Ma ho, uduktaak ꞌJaathon hĩ nuyyiook hũdũmanit ꞌrabbẽẽt ꞌcĩg ooggianĩ nga halahatteek ĩhõõggõ hõõt.

Elemit eeta cĩg ꞌtaaũn cĩ Berea nyeemuut

10Ma baa baalin niccia noho, ĩꞌthõõcõ nuyyiooha cĩg Makayyiooktak Paaulo hĩ ꞌThĩĩla hõõt ĩĩcĩ ꞌtaaũn ꞌcĩ haĩ Berea. Ma baa õdõlanit ĩĩca, õõt uduhunit ꞌCieeth cĩ Laiitto cĩ ꞌJudeei. 11Baa abũnnaa eeta cĩg Berea hĩllõõanit cĩg Tẽꞌthaloonika nẽ baa accamana nyeemuut gẽrrẽẽt. Korrioohĩ vẽlẽk, agiil nẽẽg ꞌBuuk cĩ Nyekuci, hátĩ hummuddia hatĩ ĩĩn thooꞌthioha ꞌcĩg aduha Paaulo ho dĩdĩ. 12Baa iita elemit eeta cĩg ꞌJudeei ꞌcĩg mẽẽlĩg hĩ baa ꞌthẽk ẽlẽmĩ eeta cĩg ꞌGirihi ꞌcĩg obbitig ngaaĩnĩ noho hĩ eet ꞌcĩg maacĩg Makayyioohit.

13Ma baa ĩthĩhĩt eeta cĩg ꞌJudeei ꞌtaaũnaa cĩ Tẽꞌthaloonika ngaatĩ allimanĩ Paaulo eet thõõth cĩ Nyekuci ꞌtaaũnaa cĩ Berea ho, õõt nẽẽg buúk ĩĩcĩ ꞌtaaũn tĩho hõõt hulluuthito lothippit hĩdĩmanit Paaulo ꞌbuth. 14Ma ho, ĩꞌthõõcõ nuyyiooha Paaulo hũũk dẽmẽtaa cĩ bũlũcõ hidionganit Timotteeo hĩ ꞌThĩĩla dioo Berea. 15Nẽ eeta ꞌcĩg baag ittioon Paaulo, aꞌnyakta ĩnõõnnõ ĩꞌthõng ꞌtaaũn ꞌcĩ haĩ Aathẽn nẽ oboddiõõthĩ hõõt huduktaak ꞌThĩĩla hĩ Timotteeo hiita hummuddieek ĩnõõnnõ hĩdĩĩkoothong.

Paaulo ꞌtaaũnaa cĩ Aathẽnĩ

16Ma baa nga ẽrẽ Paaulo ĩhõõggõ ꞌtaaũnaa cĩ Aathẽnĩ, baa hõllõngaa accamanoothĩk nẽẽ, hĩnĩngĩtĩ acĩn ꞌthoourẽẽt ꞌcĩg mẽẽlĩg cĩg hẽlẽggĩ ꞌcĩg aar eeta hĩĩtõ nyekuꞌnya ngaatĩ abbĩꞌthẽẽnĩ ꞌtaaũn hũtũrũũr. 17Nĩngĩtĩ õkõõĩ Paaulo ꞌCieethaa cĩ Laiitto hõõt hothooꞌthio hĩ eet ꞌJudeei hĩ cĩg ꞌGirik ꞌcĩg itieelli Nyekuc. Waathinniook vẽlẽk, õõ õthõõthõõ nẽẽ hĩ eet vẽlẽk ꞌcĩg aattĩg ngaatĩ tũũõ buúk. 18Baa ĩĩn eeta ũgẽẽgĩ cĩg anũ ꞌlimman cĩ Epikurio#17:18 Epikurio: Baa allimaneek Epikurio eet thõõth ꞌcĩ aĩ, aitiõõ nyekuꞌnya tõõ nẽ ꞌgõõl ꞌcĩ tiiri rũgẽta dioo ꞌcĩ haccamanõõthĩkĩ thõng. nẽ ĩĩtõ ũgẽẽgĩ ꞌcĩg anũ ꞌlimman cĩ eet cĩg Toihi,#17:18 Tooik: Baa ĩĩn cieeg eet ꞌcĩg anũ ꞌlimman cĩ eet ꞌcĩ haĩ ꞌThẽẽnõ, ꞌcĩ baa allimaneek eet hĩdĩmanit thooꞌthiok ꞌcĩg abũnnaa nẽ uꞌthuutti eleeti jurrung. nĩngĩtĩ iꞌthianaanĩ ẽppẽhanõõnĩ hĩ ĩnõõnnõ. Baa õthõõth ũgẽẽgĩ aĩ, “Ne ꞌyioko ꞌthẽk ꞌcĩ aĩ huduhaaheet ẽẽtĩ ciee aĩ haga thõõth vẽlẽk ko?”

Nẽ ĩĩtõ ũgẽẽgĩ, “Aaĩ hinnia hĩcĩ õthõõth Paaulo ꞌlimman cĩ hẽlẽggĩ ꞌcĩg aar eeta hĩĩtõ nyekuꞌnya ꞌcĩg ꞌrĩĩng!” Baa aduha nẽẽg thooꞌthiok iccig, hĩnĩngĩtĩ baa alliman Paaulo thõõth cĩ nyeemuut ꞌcĩ abũnnaa cĩ Yeesu hĩ thõõth ꞌcĩ arũgnaanĩ daahĩtha. 19Nĩngĩtĩ õõyyĩ nẽẽg Paaulo hĩ makayyiook cĩg lokiho ꞌcĩ haĩ Areopagu nẽ ĩĩtõ, “Duhaaheet da, aĩ ꞌlimmanĩ cunni ꞌcĩ ĩĩn ngeju ho ne? 20Hĩthĩkta ngaatĩ õthõõthĩ nii hẽlẽggĩ ꞌcĩg nga hĩcĩtta ũdũt nẽ ꞌyioko, hadiimma hathĩkna aĩ thooꞌthioha cieeg neegi.” 21Hĩllõõan hẽlẽggĩ ũgĩ vẽlẽk, baa aattĩg eeta cĩg Aathẽnĩ hũtũrũũr hĩ eet cĩg looc cĩrrĩĩng nẽ accamatta ngaatĩ athĩknĩ nẽ othoothito ꞌgiimwa ꞌcĩ ĩĩn ngeju.

22Nĩngĩtĩ ĩꞌngaannĩ Paaulo hĩbĩl muumaa cĩ makayyiook cĩg lokiho cĩ Areopagu nẽ õthõõth ĩĩ, “Niig eeta cĩg Aathẽnĩ, hudtuuha naa ngaatĩ ĩĩgĩnnu niig eet ꞌcĩg amĩnayyu thooꞌthiok cĩg nyekuꞌnyaannu. 23Ma hõvvõõĩ naa ꞌtaaũn cunuung nẽ hudtuuha hẽlẽggĩ ꞌcĩg alayyu niiga, hammũda hinnia nĩngĩtĩ ĩbboorini ꞌgaarrieeniti ꞌcĩ eheedothoothĩk thooꞌthioha ꞌcĩg aĩ, ‘Cĩ Nyekuc ꞌcĩ hõllõngaa agayyi.’ Alayyu niig nyekuc icci, nẽẽthĩ hinnia, hõllõngaa agayyu ĩnõõnnõ. Nẽ hadiimi ꞌyioko haduhaakuung naa ngagiit thõõth cĩnnĩ.

24“Baa ẽhẽnyta Nyekuci ciee looc hĩ hẽlẽggĩ vẽlẽk ꞌcĩg aattiyyi looc. Ĩĩn nẽẽ Makayyioohit cĩ hẽẽtkujjieen hĩ cĩ lootu nẽ hõllõngaa aaĩ ꞌcieethinii ꞌcĩg ẽhẽnyta ẽẽtĩ ꞌcĩ holli õõ. 25Aitiõõ Nyekuci hõllõngaa adiim eliinit cĩ eet umwa. Aaꞌnyĩk nẽẽ eet vẽlẽk rũgẽt hĩ udahi hĩ hẽlẽggĩ ũgĩ vẽlẽk buúk. 26Baa ẽhẽnyta Nyekuci loonyin ꞌcĩg ꞌyioko aattiyyi eeta loota nĩnga ho vẽlẽk, eeta hõdẽẽthõng nẽ ummuk authet hĩ ꞌgõõl ꞌcĩ aattiyyi. 27Adĩman Nyekuci thooꞌthiok iccig vẽlẽk, hátĩ hidiimito eeta nẽ ummuddia ĩnõõnnõ. Aitiõõ nẽẽ hõllõngaa ꞌrẽẽn hĩ ngagĩĩt hõdẽĩ hõdẽĩ, 28‘nẽ aaꞌnyeet nẽẽ ngagĩĩt ꞌtirrian ꞌcĩ harũgnĩ hĩ ꞌcĩ hõvvõõyyĩ hĩ ꞌcĩ hĩĩgĩnnĩ eet ko. Hĩĩgĩn naag lõhõlĩ cĩgĩnnĩg,’ haau hĩcĩ aduha teheeddioha cugguung cĩg dteellenu.

29“Nẽẽthĩ, hĩcĩ ꞌyioko hĩĩgĩn naag lõhõlĩ cĩg Nyekuci ho, occa hõllõngaa hĩthakꞌtheek ĩnõõnnõ ꞌdaab hode maccĩrẽẽn hode bẽẽ. Hõllõngaa aaĩ Nyekuci hĩ ꞌgiimwaa ꞌcĩ ammuk ẽẽtĩ nẽ ẽtẽhẽnya. 30Baarkit, baa ũtũngeek Nyekuci ꞌgiithẽnĩt ꞌcĩ alaĩ eeta nyekuꞌnya ꞌcĩg hõllõngaa ĩĩn dĩdĩ, hĩnĩngĩtĩ baa hõllõngaa aga eeta thooꞌthiok ꞌcĩg baag adĩman nẽẽgĩ. Nẽẽthĩ ꞌyioko, uduhaak Nyekuci eet loonyini vẽlẽk hũtũngteek ꞌthẽccanẽẽt cĩggĩĩng. 31Aarĩk nẽẽ kõr ꞌcĩ hatĩ ẽttẽẽdĩ thooꞌthiok cĩg lootu ꞌgõõlaa ꞌcĩ aũlan, eetaa ꞌcĩ ẽbẽra nẽẽnĩ. Baa eteretheek Nyekuci eet ngaatĩ arũgthaanĩ eet tĩho daahĩtha.”

32Ma baa athĩhĩ eeta thõõth ꞌcĩ arũgnaanĩ ẽẽtĩ daahĩtha ho, iꞌthiattaaĩ ũgẽẽgĩ atararit nĩĩcĩ noho. Baa aĩ ũgẽẽgĩ nẽẽ, “Hadiim hatĩ hau hathĩkna thõõth icci hĩ nganiit tarĩ kõr umwa.” 33Ma urutaa ꞌcĩ ẽdẽcaahĩ Paaulo ꞌrioon, ikia ĩtĩnga ũtũngeek lothippit. 34Baa iita elemit eeta ꞌcĩg abadtẽc thõõth cĩ Paaulo. Hõrggẽẽnaa cĩnĩĩng, baa aaĩ eet umwaa ꞌcĩ haĩ Dionithio. Baa ĩĩn nẽẽ eet cĩ eet cĩg Areopagu. Nẽ baa aaĩ ngaa umwaa buúk ꞌcĩ haĩ Damarith, hĩ ngaaĩ ũgĩ ꞌcĩg mẽẽlĩg buúk ꞌcĩg baag au ẽlẽmĩ Makayyioohit Yeesu.

Currently Selected:

Dtiicanĩ cĩg ꞌThooyyiahu 17: did

Highlight

Copy

Compare