1 Yõaannẽ 1

Thõõth ꞌcĩ rũgẽtõ

1Haduhaakuung naa ngagiit eet ꞌcĩ baa aaĩ baa ꞌthianaattaa cĩ lootu, baa hathĩkna nẽ hĩcĩtta ĩnõõnnõ hẽbẽrẽẽnnĩĩ cĩggaang nẽ huhumta athĩnĩĩ cĩggaang dẽẽdẽ. Ĩĩn nẽẽ Thõõth cĩ rũgẽt ꞌcĩ hirrioonna naag ko. 2Baa uppwannakeet ẽẽtĩ ciee ĩĩn rũgẽt ko ngagĩĩt nẽ hĩcĩtta ĩnõõnnõ. Nẽ ꞌyioko, hĩĩtta naag ꞌcĩg haduhaakuung ngagiit thõõth cĩnnĩ ho, hẽbẽrĩ cĩgĩnnĩg ꞌcĩg hanneekuung, ĩĩn nẽẽ rũgẽt ꞌcĩ aalla ooo. Baa arũmĩ nẽẽ hĩ Maaꞌnyĩ nẽ uppwaannaheet ngagĩĩta. 3Haduhaakuung naag ngagiit thõõth ꞌcĩ hĩcĩtta nẽ hĩthĩkta, hátĩ iita hũrũmtĩ hĩ ngagĩĩt hõdẽĩ. Nẽ hũrũmtĩ hõdẽĩ hĩ Baangeet hĩ Ngeerĩnĩ Yeesu Krĩstõ. 4Hẽhẽẽdakuung naag thooꞌthiok iccig, hátĩ haccamattoothĩha naag dĩdĩ.

Haaut lanyita

5Nyeemuut baa hathĩkna naag hĩ Yeesu cieeni nẽ ꞌyioko, huduktaahuung ngagiit hĩĩttĩhuung, ĩĩn Nyekuci lanyit nẽ aitiõõ muguuri umwaa hĩ ĩnõõnnõ tõõ ũdũt. 6Má haĩ naag hõthõl rũgẽt hĩ Nyekuc nẽ aalla nga haattĩg muguuratõõ noho, hõõlõng naag thõng nẽ hõllõngaa haattĩg thõõthaa ꞌcĩ ĩĩn dĩdĩ. 7Má haattĩg naag lanyita hĩcĩ aaĩ Nyekuci, hõthõl naag rũgẽt hĩ ꞌgoonogeet thõng. Nẽ ũtũũnyĩtõ biyyieeta cĩg Yeesu ꞌthẽccanẽẽt cĩggaac vẽlẽk.

8Má haĩ naag nga hẽꞌthẽcattõ, hĩggõõl naag eleeti cĩggaac thõng, nẽ aitiõõ thõõth ꞌcĩ ĩĩn dĩdĩ ꞌthinneetinii cĩggaac tõõ. 9Nẽ má haduhaak ꞌthẽccanẽẽt cĩggaac Nyekuc, haga ngaatĩ haarĩkĩ ꞌthinneeti cĩggaac hĩ ĩnõõnnõ haĩnnĩ, aũlan nẽẽ ngaatĩ ammaannĩkeet ngagĩĩt ꞌthẽccanẽẽt cĩggaac nẽ ũtũũnyeet thooꞌthiohĩĩ ꞌcĩg abathĩ vẽlẽk. 10Má haĩ naag nga hẽꞌthẽcattõ, haaꞌnyĩk naag Nyekuc haau hĩ oloꞌngiaahiti, nẽ aitiõõ nyeemuut cĩnnĩ ꞌthinneetinii cĩggaac tõõ.

Currently Selected:

1 Yõaannẽ 1: did

Highlight

Copy

Compare