2 Yõaannẽ 1
1
ꞌThaainit hĩ laiinit
1Waraga ꞌcĩ aku hĩ nganĩĩt Yõaannẽ makayyioohit cĩ lothippit cĩ lemmioohu cieeni.
Hẽhẽẽdahi naa waraga ngaa ꞌcĩ baa ẽbẽra Nyekuci hĩ lõhõlĩ cĩgĩnnĩg vẽlẽk ꞌcĩg hammĩnani naa thõõthaa ꞌcĩ ĩĩn dĩdĩ, haau hĩcĩ ammĩnan ĩnõõnnõ eeta vẽlẽk ꞌcĩg aga thõõth ꞌcĩ ĩĩn dĩdĩ. 2Hammĩnannuung naag ngagiit, hĩnĩngĩtĩ aau thõõth ꞌcĩ ĩĩn dĩdĩ ꞌthinneetinitõõ cĩggaac nẽ aala hatĩ gõõng hĩ ngagĩĩt ooo.
3Halayyi naa, hátĩ hĩĩtõ Nyekuci Baangẽẽtĩ hĩ Ngeerĩnĩ Yeesu Krĩstõ tarbalĩg nẽ atamaattiheet ngagĩĩta! Aꞌnyĩĩk nuun haanyteet ngagĩĩt ganõn, hĩ thõõth ꞌcĩ ĩĩn dĩdĩ, hĩ mĩnnan.
Thõõth ꞌcĩ ĩĩn dĩdĩ hĩ mĩnnan
4Baa haccamanoothihi naa gẽrrẽẽt ngaatĩ hathĩknĩ aĩ, anũ lohollia cugguung ũgẽẽgĩ thõõth ꞌcĩ ĩĩn dĩdĩ, hĩ baa aduhaakeet Baangẽẽtĩ cĩnaac hĩdĩmanit. 5Nẽẽthĩ ꞌyioko, ꞌgoonoga cĩgannĩg, hõllõngaa hẽhẽẽdakuung naa tilooinit ꞌcĩ ĩĩn ngeju, hẽhẽẽdakuung thõõth baa hillimaneehuung baa ĩĩcĩ oou ẽlẽk. 6Aĩ thõõth ꞌcĩ haĩ mĩnnan ko nẽẽ, hĩdĩmanit thõõth baa aduhaakeet Nyekuci ngagĩĩta. Baa aduhaakeet nẽẽ anneekeet hĩmmĩnanit ꞌgoonogeet, haau hĩ baa hathĩhĩ naag ĩĩcĩ oou.
7Haduhaakuung naa ngagiit thõõth icci, hĩnĩngĩtĩ ĩĩ mẽẽlĩg oloꞌngiaaha ꞌcĩg aauto looccaa nĩĩcĩ gẽrrẽẽt. Ẽppẽhan nẽẽg aĩ, baa hõllõngaa aꞌnyak Yeesu Krĩstõ ẽlẽ cĩ eet ꞌcĩ holli õõ. Ĩĩn eeta ꞌcĩg aattĩg noho, oloꞌngiaak nẽ ĩĩn mĩrõk cĩg Krĩstõ. 8Ĩcĩnĩt jurrung, hátĩ hiittiõõ hõllõngaa ammanyannu thõõth baa hadticaniini gẽrrẽẽt haĩ hummuddiaaĩ dũman ko. Idticattõ gẽrrẽẽt, hátĩ ummudia dũman hũtũrũũr. 9Ma arayyu uuhuyyu thõõth cĩ Krĩstõ baa allimanoothikuung ngagiita, occa hinnia hatĩ hõllõngaa aaĩ Nyekuci hĩ ngagiit tarĩ. Nẽẽthĩ, má aꞌthũũnnu thõõth baa Krĩstõ baa allimanoothikuunga, aattĩg thĩ hatĩ Baangẽẽtĩ hĩ Ngeerĩnĩ hĩ ngagiita. 10Má uppwannakuung eet umwaa lothippitaa cunuung nẽ hõllõngaa allimman thõõth ꞌcĩ ĩĩn dĩdĩ cĩ Krĩstõ, ma haaꞌnyĩku eet tĩho huduhuna halaꞌngiõõhĩĩ cugguung, hode ma hakũtannu thõng. 11Ẽẽtĩ ꞌcĩ akũtan eet ꞌcĩg aattĩg noho, õthõl nẽẽ hĩ ĩhõõggõ thooꞌthiok cĩggĩĩng ꞌcĩg abathĩ ho hõdẽĩ.
ꞌThaainit ꞌcĩ adtuurna
12Haꞌnyahi naa thõõth ꞌcĩ maka gẽrrẽẽt ꞌcĩ haĩ huduhaahuunga, nẽẽthĩ, hõllõngaa hadiimi heheedi waragaawa. Hadiimi hakuu hacinnuung hĩdĩĩkoothong nẽ hiita hothooꞌthioo jurrung, nẽẽthĩ hátĩ haccamattoothĩk dĩdĩ.
13Ĩꞌthaayyi lohollia cĩg ngoonu baa ẽbẽra Nyekuci gẽrrẽẽt.
Currently Selected:
2 Yõaannẽ 1: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
