2 Korinthia 6
6
1Hĩcĩ hadticanni naag hõdẽĩ hĩ Nyekuci, halayyuung naag ngagiit haĩnna, idticattõõĩ bũnnai cĩ Nyekuci ꞌgõõlaa ꞌcĩ abũnnaa. 2Aduha ꞌBuuhi cĩ Nyekuci aĩ,
“Ma ikia kõrra baa haccamanaa naana, hikia hatĩ hĩthĩhuunga
nẽ ma kõr ꞌcĩ adiimmu eliinit, hakuu hatĩ heelluunga.”#Tigiil ꞌBuuk cĩ Iꞌthaia 49:8
Nẽ ꞌyioko, haduhaakuung dĩdĩ, ikia kõrra ꞌcĩ eelluung Nyekuci ngagiita.
ꞌCannan ꞌcĩ ammũda Paaulo
3Baa hõllõngaa hõhõõrranna naag ꞌgõõl cĩ eet umwa, hátĩ hiittiõõ bathi ꞌcĩ ammuddiaa dtiicaa cĩnaang ko tõõ, ĩnõõ ꞌcĩ hattĩmanna gẽrrẽẽt ngaatĩ hõllõngaa hahĩĩnanna thõõth umwa ꞌcĩ abathĩ. 4Nẽẽthĩ, hẽlẽggẽẽnnĩ hĩ ꞌgoolliohĩ vẽlẽk, hadiim hẽtẽrꞌtha naag haĩ hĩĩgĩn appahacaaꞌnya cĩg Nyekuci. Baa gõõng hẽmmẽẽthĩ naag pĩĩrnanĩt hĩ ꞌcannan, tananga baa hummuddia mothiinit. 5Baa huuktea naag nẽ haarrihoothĩha baabuuthatõõ nẽ uukeet lothippiti ngagĩĩt tabattĩ mẽẽlĩg. Hidticattooa naag gẽrrẽẽt nẽ hacĩneenna haal hiꞌthihi ꞌgẽẽn. 6Hadiim hẽtẽrꞌtha naag haĩ hĩĩgĩn appahacaaꞌnya cĩg Nyekuci, ngaatĩ hĩĩgĩnnĩ tẽllĩg nẽ hagaacõ thõõth cĩ Nyekuci dĩdĩ, hĩ ngaatĩ hẽmmẽẽꞌthĩ ꞌcannan nẽ hĩĩtõ tarbalĩg. Aau Lorii ꞌcĩ Ẽllẽẽmĩth hĩ ngagĩĩta nẽ baa ĩĩn mĩnnanĩ cĩnaang thõõth dĩdĩ. 7Hadiim hẽtẽrꞌtha naag haĩ, hĩĩgĩn appahacaaꞌnya cĩg Nyekuci, ngaatĩ hõthõõthĩ thõõth ꞌcĩ ĩĩn dĩdĩ nẽ ikia idticanõõ ꞌtirriani cĩ Nyekuci hĩ ngagĩĩta. Nẽ ꞌgõõlaa ꞌcĩ hoꞌngonyoonna hĩ dtiic cĩnaang, hiita hidticatta thõõth ꞌcĩ aũlan athĩnĩĩ ꞌrammaattĩg. 8Tananga baa hitingollieet eeta ũgẽẽgĩ ngagĩĩta, hode hõllõngaa iꞌngoliinneeta, hode abuluꞌtheeta, hode accĩĩnneeta, hode aĩ hĩĩgĩnna naag oloꞌngiaak, aalla hõthõõꞌtha naag hõdõõkõthĩ thõõth cĩ eleeti cĩggaang ꞌcĩg ĩĩn dĩdĩ ho noho. 9Hõllõngaa agayyeet ngagĩĩt eeta ũgẽẽgĩ nẽ agayyieetu niig ngagĩĩt jurrung. Haautta naag hĩcĩ hadaakta ẽlẽk, aalla nga harũgna noho. Baa huuktea naag nẽ nga hurukteea, 10nẽ haccamanoothĩka ooo tananga korrioohĩĩ cĩg pĩĩrnattaak. Nẽ tananga hĩĩgĩnna naag hullaha, haanytĩha naag eet ꞌcĩg mẽẽlĩg gẽrrẽẽt baliinit, tananga hiꞌthihi ꞌgii ꞌcĩ haꞌnyaka naaga, ĩĩn hẽlẽggĩ vẽlẽk cĩggaang.
11Niig ꞌgotoonoga hĩ ngoonoga cĩg ꞌtaaũn cĩ Korinthia, baa hothoothikuung naag ngagiit cũrũmũũm ꞌthinneetinii ꞌcĩg tẽllĩg dĩdĩ. 12Hõllõngaa hĩcaaccuung naag ngagiit mĩnnan cĩnaang nẽ ngagiit dioo ꞌcĩg ĩcaacceetu ngagĩĩt mĩnnan cunuung. 13Hothoothikuung naa ngagiit hĩcĩ hothoothihi lõhõlĩ cĩgannĩg nẽ haini ubbuuktĩheetu ngagĩĩt ꞌthinneeti cugguung.
ꞌCieeth cĩ Nyekuc ꞌcĩ arũgĩ
14Iliittia eet ꞌcĩg hõllõngaa ĩĩn lemmiook cĩg Krĩstõ. Occa gõõng õõkõrõõ eeta ꞌcĩg abũnnaa hĩ eet ꞌcĩg abathĩ? Hode aduhõõ gõõng lanyit hĩ muguur? 15Ganõn iina ꞌcĩ occa aꞌnyak Krĩstõ hĩ Belial?#6:15 Belial: Ĩĩn cieeg ꞌthaar ũgĩ cĩg ꞌThĩttaan ꞌcĩ ĩĩn habu cĩ loriẽẽt ꞌcĩg abathĩ. Hode ne gõõng ꞌcĩ õthõl lemmiooha cĩg Krĩstõ hĩ eet ꞌcĩg hõllõngaa ĩĩn lemmiook? 16Ganõn iina ꞌcĩ aꞌnyak ꞌCieeth cĩ Nyekuci hĩ hẽlẽggĩ ꞌcĩg aar eeta hĩĩtõ nyekuꞌnya ho? Hĩnĩngĩtĩ hĩĩgĩn naag ꞌCieeth cĩ Nyekuc ꞌcĩ arũgĩ. Hĩcĩ aduha ꞌBuuhi cĩ Nyekuci aĩ, “Haaĩ hatĩ naa hĩ ĩhõõggõ nẽ hookorria hĩ ĩhõõggõ. Hĩĩnĩ hatĩ naa Nyekuc cĩnĩĩng nẽ ĩĩtõ nẽẽg eet cĩgannĩg.”#Tigiil ꞌBuuk cĩ Levitiko 26:12; ꞌJeremia 32:38; Eꞌthekiele 37:27 17Nẽẽthĩ hoti ho, “Aĩ Makayyioohiti nẽẽ,
“Ũtũngteek niig eet ꞌcĩg hõllõngaa ĩĩn lemmiook
eꞌngerrio hĩ ĩhõõggõ,
ma hahummu hẽlẽggĩ ꞌcĩg ĩĩn ꞌriiring
nẽ hatĩ helemuung naa ngagiita.”#Tigiil ꞌBuuk cĩ Iꞌthaia 52:11; Eꞌthekiele 20:34, 41
18“Hĩĩna hatĩ naa Maaꞌnyu cunuung
nẽ iittu hatĩ niig lõhõlĩ cĩgannĩg,
haduha naa Makayyioohiti ꞌTirriannioohiti ꞌcĩ hĩllõõani vẽlẽk.”#Tigiil ꞌBuuk cĩ ĩĩn 2 Thamueele 7:8; 7:14
Currently Selected:
2 Korinthia 6: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
