2 Korinthia 2

1Ĩnõõ ꞌcĩ hũũhũĩ naa muhẽẽnĩt caannĩ hiittiõõ hõllõngaa aꞌnyahaakuung heeroni caannĩ huciith umwa tarĩ haau hĩ baalẽẽnĩ. 2Má ĩĩn nganĩĩt dẽẽdẽ ꞌcĩ haaꞌnyuung ngagiit aaut mothiitta, nganĩ hatĩ ꞌcĩ aku aaꞌnya nganĩĩt haccamanoothĩk? Ngagiit ꞌcĩg haaꞌnyuung naa mothiinit ko? Ngagiit ꞌthẽk dẽẽdẽ ꞌcĩg hatĩ aaꞌnyaangu nganĩĩt haccamanoothĩk. 3Baa hẽhẽẽda waraga baalĩ, hátĩ ma hikia, hiittiõõ eeta ꞌcĩg aaꞌnya haccamanoothĩk, hõllõngaa aaꞌnya hõmõthĩ. Baa õkõmĩ nganĩĩt ꞌthĩnĩt, hĩnĩngĩtĩ ngagiit vẽlẽk ꞌcĩg hatĩ othollu taliinit caannĩ. 4Hĩnĩngĩtĩ hẽhẽẽdakuung pĩĩrnatta hĩ mothiitta, cobbi hĩ tilaalõnĩ, hátĩ hiittiõõ hõllõngaa haaꞌnyuung naa ngagiit huciith, hátĩ agaac ĩĩtõ, maka mĩnnanĩ caannĩ hĩ ngagiit gẽrrẽẽt.

Atamaattik eet ꞌcĩ ĩĩn ꞌthẽccannioohit

5Má adĩman ẽẽtĩ umwaa eet umwa ꞌbuth, nga hĩdĩmanaa nẽẽ nganĩĩt ꞌbuth hĩcĩ adĩmaneekuung nẽẽ ngagiit vẽlẽk. Ahummuung ꞌthẽccanĩ cĩnnĩ ngagiit gẽrrẽẽt hĩllõõan. 6Mẽẽlĩg eeta hõrggẽẽnaa cunuung ꞌcĩg udukta ꞌthẽccan ꞌcĩ baa adĩman ẽẽtĩ tĩho, ĩĩn niccia ukẽẽnĩt ꞌcĩ ũũppan thõõth ꞌcĩ baa adĩman nẽẽnĩ. 7Nẽẽthĩ hinnia ꞌyioko, occa ammaanniku niig ĩnõõnnõ nẽ amammaayattu ĩnõõnnõ, hátĩ hiittiõõ hõllõngaa anyamũũtana huciithi cĩ ꞌthẽccaanõ eet nicci. 8Haduhaakuung naa ngagiit dĩdĩ haini, etereꞌthieek ĩnõõnnõ mĩnnan cunuung. 9Thõõth baa hẽhẽẽdakuung naa ngagiit waraga haini, hátĩ hũmmũda nẽ hagawa dĩdĩ, hatĩ ma anuyyu niig thooꞌthiok vẽlẽk ꞌcĩg haduha naana. 10Má ammaanniku niig eet umwa hammaannihi hatĩ naa buúk ĩnõõnnõ, hatĩ aaĩ ꞌgiimwaa ꞌcĩ occa hammaannihi. Nẽ má hatamaatĩha ꞌthẽccanẽẽt iccig, hammaannihi muumaa cĩ Krĩstõ hĩnĩngĩtĩ ngagiita, 11hátĩ hiittiõõ hõllõngaa aku ĩllõõanneet ngagĩĩt ꞌThĩttaanĩ. Hĩnĩngĩtĩ haga naag muhẽẽnĩt cĩnnĩ gẽrrẽẽt.

Dticciannioohit cĩ lõhõt ꞌcĩ ĩĩn ngeju

12Ma baa hũũha ꞌtaaũnaa cĩ Tõrõa, hũũk hillimaneeha eet nyeemuut ꞌcĩ abũnnaa cĩ Krĩstõ, hummudoothiha Makayyioohit ubbuuhĩhaa baa ꞌgõõl ẽlẽk. 13Baa nga apuppudii nganĩĩt ꞌthĩnĩt ngaatĩ hõllõngaa hammũdõõthĩkĩ ꞌgõtõna Tiito, nĩngĩtĩ hannẽẽkĩ ĩhõõggõ ĩlaallẽ nẽ hedeceeha hũũha ĩĩcĩ looc cĩ Maccedoonia.

14Ĩlaallẽ hĩ Nyekuc ngaatĩ aaꞌnyĩkĩ Krĩstõ hutuanõõĩ nyeitee. Eelleet ngagĩĩt Nyekuci buúk, ngaatĩ hõõ hĩꞌthaanĩka nyeemuut cĩ Krĩstõ ꞌcĩ ẽmmẽdĩ loonyini vẽlẽk nẽ õꞌngõlĩ nyeemuut ciee haau hĩgõõng mõhõõkacĩ. 15Hĩnĩngĩtĩ haattĩg naag hĩ mõhõõkac ꞌcĩ õꞌngõlĩ ẽmmẽdĩ ꞌcĩ õkõ aaꞌnyĩk Krĩstõ Nyekuc, ꞌcĩ ĩꞌthanothoothĩk eet baag eelliaa hĩ eet baag õbõktĩ adaahito. 16Nẽ eeta ꞌcĩg iꞌngittõõthĩ, õꞌngõlĩ nyeemuut ꞌcĩ abũnnaa hĩ ĩhõõggõ, muyuuk ꞌcĩ õꞌngõlĩ daahĩth, nẽ hĩ eet cĩg eelliaa, õꞌngõlĩ nyeemuut hĩ ĩhõõggõ, muyuuk cĩ rũgẽtõ nẽ nganĩ ꞌthẽk ꞌcĩ occa ũũlũ ngaatĩ adticanĩ dtiic icci aaddi ho? 17Adiim eeta ꞌcĩg mẽẽlĩg ammũda baliinit, hĩnĩngĩtĩ aduhaak nẽẽg eet nyeemuut cĩ Nyekuci nẽ hõllõngaa haattiyyia naag buúk hĩ nẽẽgĩ. Hĩĩgĩnna naag ꞌthooyyiak cĩg Nyekuci dĩdĩ, nẽẽthĩ, makaaꞌthĩtaa cĩ Krĩstõ, hõthõõꞌtha naag nyeemuut cĩnaang ꞌcĩ ĩĩn Nyekuci hebereec cĩnaang.

Currently Selected:

2 Korinthia 2: did

Highlight

Copy

Compare