2 Korinthia 11

Paaulo hĩ ꞌthooyyiak ꞌcĩg hõllõngaa ĩĩn dĩdĩ

1Hammuhi occa emmeeꞌthu ꞌgiithẽnĩt caannĩ, nẽẽthĩ nẽẽꞌthẽk, ĩdĩmattu nohotaa ẽlẽk. 2Harrĩcanaannuung naa ngagiit hĩ Nyekuci, hĩnĩngĩtĩ baa aattiyyu niig hĩ bũhẽẽcĩ ꞌcĩ nga hũꞌthũwanĩ ꞌcĩ hẽbẽraahi naa Krĩstõ diooni. 3Nẽẽthĩ, homoꞌthi naa haini iggoolluung hatĩ ꞌThĩttaanĩ baa ĩĩn hũkaat baa ĩggõõl Ẽẽvva,#11:3 Ẽẽvva: Baa ĩĩn Ẽẽvva ngaa ꞌcĩ oou ꞌcĩ ẽhẽnyta Nyekuci nẽ ĩĩ aattĩ eet vẽlẽk loota nĩnga. Tigiil thõõth cĩnnĩ ꞌBuuhaa cĩ ꞌThianaattõ 1-5. nẽ arahannuung hatĩ ngagiit, hátĩ hiittiõõ hõllõngaa anuyyu thõõth ꞌcĩ tẽllĩ ꞌcĩ ĩĩn dĩdĩ cĩ Krĩstõ. 4Baa hillimatteehuung naag ngagiit nyeemuut cĩ Yeesu nẽ iita elemtu nyeemuut cĩnaang nẽ aggamtu Lori ꞌcĩ Ẽllẽẽmĩthĩ. Nẽ iita aanytĩhu eet ũgĩ hillimatteehuung nyeemuut ꞌcĩ abũnnaa cĩ Yeesu. Nẽ ꞌyioko, iita ũkũmattoothihu niig ngaatĩ elemmu nyeemuut umwa ꞌcĩ abũnnaa nẽ aggamtu lori ꞌcĩ ꞌrĩĩng. 5Nẽẽthĩ, hammuhi occa haduhoonna naag buúk, hĩ eet ꞌcĩg avvĩ eleeti cĩggĩĩng aĩ hĩĩgĩnna ꞌthooyyiak ꞌcĩg tiirik ko thõng. 6Tananga hõllõngaa hothoothi naa jurrung hĩ nẽẽgĩ, haꞌnyahi ꞌgẽẽnyĩth ꞌcĩ hagaĩ thõõth. Baa hillimatteehuung naag ngagiit thõõth icci ẽlẽk jurrung ꞌgoolliohĩ vẽlẽk.

7Hẽꞌthẽcana occa baa naa ngaatĩ haaꞌnyĩkĩĩ ẽlẽ caannĩ hĩĩ hĩdĩc nẽ hõdõngaauung ngagiit, ngaatĩ hallimaneekuung nyeemuut ꞌcĩ abũnnaa cĩ Nyekuci haaga? 8Baa aaꞌnya nganĩĩt lothippiꞌnya cĩg lemmioohu ũgẽẽgĩ ꞌbaaninit cĩnĩĩng, hátĩ heeluung naa ngagiita. Harratanaa occa baa naa ĩhõõggõ ꞌbaaninit thõng? 9Tananga baa happĩĩrna naa hiꞌthihi ꞌgii ꞌcĩ haꞌnyahi baa harũmĩ hĩ ngagiita, baa hõllõngaa hatĩkĩannuung naa ngagiita. Lemmiook baag au looccaa cĩ Maccedoonia dioo, baag au aꞌnyahaaka ꞌbaaninit nẽ nga hĩtĩkĩĩan eet umwa hõrggẽẽnaa cunuung ꞌgõõlaa umwaanĩ nẽ haalla hatĩ hadĩmani noho ũdũt. 10Hĩcĩ aaĩ thõõth cĩ Krĩstõ dĩdĩ hĩ nganĩĩt ko, aitiõõ hatĩ ẽẽtĩ ꞌcĩ abĩllĩ ꞌrianĩĩth caannĩ ho looccaa cĩ Acaia,#11:10 Looc cĩ Acaia: Baa aaĩ ꞌtaaũnĩ cĩ Korinthia looccaa ꞌcĩ haĩ Acaia. ngaatĩ hallimanĩĩ thõõth cĩ Nyekuci haaga tõõ. 11Inni? Hĩnĩngĩtĩ hõllõngaa hammĩnannuung naa ngagiita? Aga Nyekuci ngaatĩ hammĩnannuung naa ngagiita!

12Nẽ haalla hatĩ naa hadticani thooꞌthiok gõõng hadticani hõdõõkõthĩ, hátĩ hĩbĩlĩ eet ꞌcĩg adiim ammũda ꞌgõõl ꞌcĩ ĩthakꞌthẽẽkĩ dtiic cĩnĩĩng irrianĩ ho, hĩ dtiic cĩnaang. 13Ĩĩn eeta ꞌcĩg aattĩg noho ꞌthooyyiak ꞌcĩg hõllõngaa ĩĩn dĩdĩ, oolongeekeet aĩ hĩĩgĩnna ꞌthooyyiak cĩg Krĩstõ. 14Aitiõõ hõllõngaa occa hakuleek naag ꞌjieen, hĩnĩngĩtĩ ꞌThĩttaan dẽẽdẽ ꞌcĩ õõlõng aĩ, hĩĩnĩ aajĩlõ ꞌcĩ hakuu hĩ Nyekuc. 15Nẽẽthĩ hoti ho, aitiõõ hõllõngaa hakuleek ꞌjieen, hatĩ má iggoolleet ꞌThĩttaanĩ ngagĩĩt ngaatĩ õõlõngĩ dticcianniooha cĩgĩnnĩg aattiyyi hĩ dticcianniooha ꞌcĩg abũnnaa. Ammũda hatĩ nẽẽg ꞌgii ꞌcĩ adiim dtiici cĩnĩĩng ko kõr umwa.

Accananni Paaulo hĩnĩngĩtĩ Krĩstõ

16Hõbõdẽẽkĩ tarĩ, hõllõngaa hadiimmuung naa ngagiit ummuhit ĩĩtõ hĩĩnĩ naa ꞌgiiꞌthiahit. Nẽẽthĩ, má ammuku nohotaa, ĩꞌnya ꞌthĩĩ da haau hĩ ꞌgiiꞌthiahiti, hátĩ hirrian naa buúk hĩdĩhĩdĩĩc. 17Nẽ baa haꞌnyahi naa ꞌrianĩĩth icci, haꞌnyahi hĩ ꞌgiiꞌthiahiti haaga, hõllõngaa haꞌnyahi, hĩnĩngĩtĩ Makayyioohit. 18Nẽ hĩcĩ irrianit eeta ꞌcĩg mẽẽlĩg ꞌgõõlaa cĩ eet cĩg looc nicci ho, hirriani hatĩ naa buúk. 19Ammuku niig ainnu iiginnu eet ꞌcĩg eggeeꞌnyu gẽrrẽẽt nẽ aalla nga anuꞌthaannu ꞌgiiꞌthiahit noho! 20Nẽ dĩdĩ, nga aalla anuꞌthaannu niig eet ꞌcĩg aarruung ngagiit ĩĩtõ appahacaaꞌnya noho, arratannuunga nẽ igorithit ijjio cugguung nẽ tarĩ õdõng eleeti cĩggĩĩng hĩllõõattuung ngagiita nẽ atabaangtuung ngagiit muumti cũrũmũũm nĩĩcĩ noho. 21Aggamma nganĩĩt ngaaoni ngaatĩ occa haĩnnĩ, hõllõngaa hattiran naag ngaatĩ occa hadĩmanĩ thooꞌthiok tĩko.

Nẽ má irrian ẽẽtĩ, occa hirriani naa buúk. 22Irrian nẽẽg aĩ, hĩĩgĩnna Ebereei? Hĩĩnĩ naa buúk. Irrian nẽẽg aĩ hĩĩgĩnna eet cĩg Ĩꞌthĩraẽlĩ? Hĩĩnĩ naa buúk Ebereeinit. Irrian nẽẽg aĩ, hĩĩgĩnna lõhõlĩ cĩg Abũrahamĩ? Hĩĩnĩ naa buúk loholeec cĩ Abũrahamĩ. 23Irrian nẽẽg aĩ hĩĩgĩnna dticcianniook cĩg Krĩstõ? Hĩĩnĩ hinnia naa ꞌgiiꞌthiahit hatĩ hothoothi hoti, hĩnĩngĩtĩ hĩllõõani naa ĩhõõggõ. Hĩnĩngĩtĩ hidticanoothĩha naa Nyekuc gẽrrẽẽt, haarĩhoothĩha baabuuth tabattĩ mẽẽlĩg nẽ huuki halliẽẽnĩ tabattĩ mẽẽlĩg, hĩnĩngĩtĩ Krĩstõ nẽ hoboktooa hĩ daahĩth tabattĩ mẽẽlĩg.

24Nẽ tarĩ, uukta makayyiooha cĩg ꞌJudeei buúk tabattĩ ꞌtur halliẽẽn hẽẽn iyyio hĩ tũrkũwwec. 25Hohoddia hĩbahĩta tabattĩ iyyio nẽ hohoddia biyyiẽẽnĩ tabattĩ hõdẽĩ. Ilibti haahũlĩta ꞌcĩg baag hõvvõõĩ buúk tabattĩ iyyio nẽ haau bũlũcatõõ cobbi, baalin hõdẽĩ hĩ waathĩn hõdẽĩ. 26Nẽ weetaa caannĩ hõvvõõyyĩ ho vẽlẽk, hammũda naa pĩĩrnanĩt ngaatĩ habaahinii hidiowwẽẽn, homotoonna hĩ igorriaak nẽ hũmmũda pĩĩrnanĩt hĩ eet cĩg looc caannĩ dẽẽdẽ nẽ tarĩ, hũmmũda pĩĩrnanĩt hĩ eet ꞌcĩg hõllõngaa ĩĩn ꞌJudeei. Baa hammũda naa pĩĩrnanĩt ꞌtaaũnnioohĩĩ ꞌcĩg obbitig nẽ hũmmũda pĩĩrnanĩt battaalliohĩĩ ꞌcĩg õdõhõhĩĩ hĩ bũlũccwaanĩ ꞌcĩg obbitig, hĩ eetinii ꞌcĩg aĩ hĩĩgĩnna nuyyiook cĩ Makayyiookto.

27Baa hadticanii naa gẽrrẽẽt nẽ haꞌnyaha baalinniook ꞌcĩg mẽẽlĩg hiꞌthihi ũꞌnyaak nẽ haau uraa, aamma kõrra, hiꞌthihi ꞌgii ꞌcĩ hadahi. Ahũdda lajjõ hĩnĩngĩtĩ hiꞌthihi ceremwa ꞌcĩg habungẽẽnĩ jurrung, hatĩ alalĩ lõõcĩ. 28Nẽ thooꞌthiohĩĩ cĩg vẽlẽk, baa atĩkĩĩannaa nganĩĩt thõõth cĩ lothippit cĩ lemmiook cĩg ꞌtaaũnniook vẽlẽk hõdõõkõthĩ. 29Ma aitiõõ eeta ũgẽẽgĩ hõllõngaa aꞌnyak ꞌtirrian, aitiõõ thĩ ꞌthẽk hĩ nganĩĩt buúk tõõ. Ma ĩggõõl eeta eet ũgĩ harahanit nẽ ẽꞌthẽcattõõ, hakuu halĩĩlĩ naa gẽrrẽẽt.

30Nẽ má hirriana naana, abũnnaa hirrianĩ hẽlẽggĩ ꞌcĩg ẽtẽrꞌtha aĩ, aitiõõ nganĩĩt ꞌtirriani tõõ. 31Nyekuc Maaꞌnyĩ Makayyioohit cĩnaac Yeesu Krĩstõ, ꞌcĩ aga aĩ hõllõngaa hoolongi naana nẽ aꞌnyĩĩk hĩdĩhĩthĩ nẽẽ ooo! 32Makayyioohit cĩ Damaathĩko ꞌcĩ baa aaꞌnyĩk ũũrũta cĩgĩnnĩg hebehit hattũũgẽt ꞌcĩg obbitig, aĩ hatĩ haggama nganĩĩta, korrioohĩĩ baag ĩĩnnĩ Arẽẽtathĩ habu. 33Tõjõhõ hiita hõyõyyõõrattaawa ꞌgotoonoga ũgẽẽgĩ hutulaa cĩ araanõ, nĩngĩtĩ hanĩhĩ nĩngaata halĩĩtanĩĩ ĩnõõnnõ.

Currently Selected:

2 Korinthia 11: did

Highlight

Copy

Compare