2 Korinthia 10

Eteiini Paaulo dtiic cĩnnĩ

1Haini naa Paaulo ammuku niig ainnu hĩĩnĩ naa teelliahit hatĩ harũmĩ hĩ ngagiita nẽ haꞌthĩlani hatĩ hayyia ꞌrẽẽna? Halayyuung naa ngagiit dĩdĩ haini ĩthĩktõ, hĩnĩngĩtĩ baa tarbal Krĩstõ nẽ alal ꞌthĩnĩt cĩ nẽẽnĩ. 2Õthõõth eeta ũgẽẽgĩ aĩ, hidticanit naag thooꞌthiok ũgĩ ꞌcĩg abathĩ hĩ ꞌcĩg adtican eeta cĩg looc nicci. Nẽ ma hõdõlana naana, hammuhi hakuu hatĩ hothoothi komiitta hĩ ꞌgõõlaa ꞌcĩ attiranĩ thooꞌthiohĩĩ ꞌcĩg hatĩ hakuu haduhaahi naa ĩhõõggõ. Hõlõ, ma haaꞌnyaangu nganĩĩt hĩdĩmanuung ngagiit ꞌgõõla nĩĩca. 3Tananga nga haattĩg naag loota nĩnga, hõllõngaa hadtican hẽlẽggĩ ꞌcĩg adtican eeta cĩg looc nicci, 4hode hõllõngaa hadticanna naag jore dĩlaꞌnyaannĩĩ cĩg looc nicci. Nẽẽthĩ, hadticaniinna ꞌtirrian cĩ Nyekuci ꞌcĩ hĩllõõanĩ mĩrõk cĩgĩnnĩg. Hĩꞌthaanna naag muhẽẽnĩt ꞌcĩ abũrrĩ eeta Nyekuc. 5Hĩ ꞌgii vẽlẽk ꞌcĩ ĩĩn ꞌrianĩĩth ꞌcĩ õhõõrran eet ngaatĩ agaĩ thõõth cĩ Nyekuci. Haggamma naag muhẽẽnĩt cĩ eetu nẽ haanytĩha ĩhõõggõ hitingolli Krĩstõ. 6Nẽ hakũmanoothĩka hatĩ naag ngaatĩ huuka eet vẽlẽk ꞌcĩg adtican hẽlẽggĩ ꞌcĩg hõllõngaa ẽlẽmĩ Krĩstõ, hatĩ elemtu niig Krĩstõ dĩdĩ.

7Akannu niig hẽbẽrĩ hẽlẽggĩ ꞌcĩg acinnu niig battaali thõng diooni. Má ammuk ẽẽtĩ umwaa aĩ hĩĩnĩ eet cĩ Krĩstõ, aꞌnyĩĩk hummuhunõõthĩ nẽẽ hĩĩ, hĩĩgĩnna naag buúk eet cĩg Krĩstõ hĩ nẽẽnĩ. 8Hirriana mõnõ naa gẽrrẽẽt, hĩnĩngĩtĩ makaaꞌthĩt baa aaꞌnya nganĩĩt Makayyioohiti, hátĩ heelluung ngagiit lemiittaa cunuung ko thõng nẽ hõllõngaa haini, hátĩ hĩdĩmanuung ngagiit ꞌbuth. Occa hatĩ hõllõngaa haꞌngaaoni naa ngaatĩ hirrianĩ. 9Nẽ hõllõngaa hadiimi naa hattĩmani ngaatĩ haaꞌnyuung ngagiit itingolli waragẽẽt cĩgannĩg. 10Ainnu niig eeta ũgẽẽgĩ, “Aꞌngaꞌngarĩĩ waragẽẽta ꞌcĩg heheedi naa ho nẽ attiranĩ. Nẽ ma haaĩ naa hõrggẽẽnaa cunuung, aarra eeta hĩĩnĩ ꞌgiimwa haaga ꞌcĩ ẽrẽka thõõthaa. Nẽ thõõth ꞌcĩ hothoothi naa lothippita ho, hõllõngaa athĩhĩ eeta.” 11Aꞌnyĩĩk eet ꞌcĩg aattĩg noho hagaacõ hĩĩtõ, ꞌgii ꞌcĩ hẽhẽẽdanna naag waragẽẽtĩĩ cĩggaang ko, aduhõõ hĩ ngaatĩ hõthõõthõnĩ hatĩ harũmĩ thõng.

12Hõllõngaa hatĩ haallaka naag ngaatĩ hĩthakꞌtheeka eleeti cĩggaang hĩ eet ꞌcĩg ammuk thooꞌthiok cĩg eleeti cĩggĩĩng gẽrrẽẽt. Nẽ aggiithi ngaatĩ ĩthakꞌthẽẽkĩ eleeti cĩggĩĩng hĩ eleeti cĩggĩĩng ẽmmẽn. 13Hõllõngaa hatĩ hirrianna naag ꞌgii ꞌcĩ aitiõõ dtiicaa cĩnaang tõõ. Hirrianna hatĩ naag dtiicaa ĩbaa ĩꞌthõõanneet ngagĩĩt Nyekuci hidticatta nẽ iiginnu niig buúk eet cĩg dtiic tĩho. 14Hõllõngaa occa hirrianna naag gẽrrẽẽt. Nẽ baa ꞌthẽk ngagĩĩt baag haꞌnyahaakuung ngagiit nyeemuut ꞌcĩ abũnnaa cĩ Krĩstõ.

15Baa hõllõngaa hirrianna naag dtiic ꞌcĩ adtican eeta ũgẽẽgĩ, haau hĩ dtiici ꞌcĩ hadticanna naaga. Nẽ muhẽẽttaa cĩnaang, hĩcĩ ikia ĩttõõrĩ lemiiniti cunuung ĩĩ maka ho, hau hatĩ haduhaak naag eet ꞌcĩg mẽẽlĩg nyeemuut ꞌcĩ abũnnaa cĩ Krĩstõ. Nẽ ĩĩn ciee dtiic cĩnaang ꞌcĩ hammuka hõdõõkõthĩ hidticatta. 16Hatĩ hillimatteeha naag eet nyeemuut ꞌcĩ abũnnaa ꞌcĩ Krĩstõ loonyinii ũgẽẽgĩ, ĩcĩg nga hõdõlan nyeemuut ꞌcĩ ĩĩn Ngeju ho. Hõllõngaa hirrianna, hĩnĩngĩtĩ dtiic ꞌcĩ idticanit eeta ũgẽẽgĩ ẽlẽk. 17Aduha ꞌBuuhi cĩ Nyekuci aĩ, “Má adiim ẽẽtĩ umwaa irrianĩ, aꞌnyĩĩk hirrianĩ Makayyioohit.”#Tigiil ꞌBuuk cĩ ꞌJeremia 9:24 18Ma ĩĩgĩnnu niig ꞌrianniook, occa hõllõngaa aduhaannu niig eleeti cugguung ẽmmẽn, nẽẽthĩ ꞌyioko, Makayyioohit diooni ꞌcĩ occa aduha aĩ, adticannu niig ꞌgii ꞌcĩ abũnnaa.

Currently Selected:

2 Korinthia 10: did

Highlight

Copy

Compare