1 Pẽẽtũrũ 3

Ngaaĩ hĩ maaccwa

1Nẽẽthĩ, má ĩĩnĩ ngaa cĩ eeto, adiim athihi thõõth cĩ maac cunni. Tananga abũrĩ nẽẽ nyeemuut cĩnaang, aaꞌnyihi hatĩ nii ĩnõõnnõ hikia hĩĩ lemmioohit ꞌgõõlaa ꞌcĩ adĩmanĩĩ thooꞌthiok ꞌcĩg abũnnaa. Iittiõõ hatĩ eet umwaa ꞌcĩ occa aduhaak ĩnõõnnõ thõõth ꞌcĩ aku ĩĩnnĩ nẽẽ Lemmioohit tõõ, 2hĩnĩngĩtĩ acĩn hatĩ nẽẽ ꞌgõõl ꞌcĩ adĩkꞌthĩ nii Nyekuc nẽ aau ꞌgõõlaa ꞌcĩ aũlanĩ. 3Ma haallaku ꞌlẽẽmĩth ꞌcĩ aaĩ hĩcĩ ĩma ꞌcĩg ẽhẽnytĩ helleemito, hode ngaatĩ ahimittu hẽbbẽẽn cĩg ꞌrianĩĩthak ꞌcĩg ĩĩn ꞌdaab, hode ceremwa ꞌcĩg uuttiaa ꞌrabbẽẽtĩĩ ꞌcĩg mẽẽlĩg ĩcĩg aaꞌnyuung elleemit. 4Aꞌnyĩĩk ꞌlẽẽmĩth ꞌcĩ aku ꞌthinneetinii cugguung haaꞌnyuung ngagiit aaut lõꞌngõõc nẽ iittu tarbalĩg. Ĩĩn ciee ꞌlẽẽmĩth ꞌcĩ aalla ĩꞌthõng nẽ accamana Nyekuci gẽrrẽẽt. 5Baa gõõng ꞌgõõl ꞌcĩ aattiyyi ngaaĩ ꞌcĩg ala Nyekuc nẽ aarrik ꞌthinneeti cĩggĩĩng hĩ ĩnõõnnõ cieeni, baa aaꞌnyĩk nẽẽg eleeti cĩggĩĩng helleemito ꞌgõõlaa ꞌcĩ athĩknĩ maaccwa cĩggĩĩng. 6Baa athĩhĩ Thaara Abũrahaamõ#3:6 Abũrahaamõ: Baa avvĩ Nyekuci Abũrahaamõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. nẽ ũtũvvũ ĩnõõnnõ ĩnnĩk makayyioohit cĩnnĩ. Iiginnu niig lõhõlĩ cĩgĩnnĩg dĩdĩ, hatĩ adĩmannu thõõth ꞌcĩ aũlanĩ nẽ hõllõngaa iꞌngoliinnu thõõth umwa.

7Nẽ niig maaccwaana ꞌgõõlaa ꞌcĩ aduhõõ thõng, ũrũmtĩ hĩ ngaaĩ cugguung jurrung, itingolli ĩhõõggõ hĩ ꞌgoonogu ꞌcĩg hõllõngaa attiran haauto hĩ niiga, hĩcĩ othollu ꞌbaaninit cĩ rũgẽt ꞌcĩ ĩĩn ngeju, ĩdĩmanit ĩhõõggõ jurrung, hátĩ hiittiõõ ꞌgii ꞌcĩ occa alaam laiinit cunuung tõõ.

ꞌCannan hĩnĩngĩtĩ thõõth ꞌcĩ abũnnaa

8Dtuurnatta, aaut niig vẽlẽk hõdẽĩ lõꞌngõõc, ĩĩtõ tarbalĩg nẽ atamaattik ꞌgoonogu buúk, ĩmmĩnanit ꞌgotoonogu hĩ ngoonogu nẽ ma hathĩngõõnyannu. 9Ma haruhaannu oolo thooꞌthiohĩĩ ꞌcĩg abathĩ, hode ma hodommu ꞌgoonogu ꞌcĩg odoommuung ngagiita. Nẽẽthĩ hinnianĩ, aggatanit eet ꞌcĩg odoommuung thõng. Thõõth baa avvaannuung Nyekuci ngagiit ĩdĩmanit cieeni nẽ aggatannuung hatĩ nẽẽ, hĩnĩngĩtĩ thõõth icci. 10Hĩnĩngĩtĩ aduha ꞌBuuhi cĩ Nyekuci aĩ,

“Ammĩnannu ꞌthẽk niig rũgẽt dĩdĩ?

Adiimmu ꞌthẽk niig accamanoothiku?

Ma thĩ nga hothooꞌthu thooꞌthiok ꞌcĩg abathĩ

nẽ ma nga hothooꞌthu thooꞌthiok ꞌcĩg ĩĩn õlõng.

11Adiim uunniku thooꞌthiok ꞌcĩg ĩĩn ꞌriiring

nẽ ĩdĩmattu thooꞌthiok ꞌcĩg abũnnaa;

hĩcĩ adiimmu nẽ unuyyu

ꞌgõõl ꞌcĩ ammũdaannu ganõn.

12Hĩnĩngĩtĩ ẽbẽk Makayyioohiti eet ꞌcĩg abũnnaa

nẽ ĩthĩk laiinit cĩnĩĩng,

abũrĩ Makayyioohiti eet ꞌcĩg adĩman thooꞌthiok ꞌcĩg abathĩ.”#Tigiil ꞌBuuk cĩ Tegellwaanu 34:12-16

13Nganĩ ꞌcĩ occa adĩmannuung ngagiit ꞌbuth hatĩ abũraneeku ngaatĩ adĩmannu thõõth ꞌcĩ abũnnaa? 14Nẽẽthĩ, má occa accananiinnu niig, hĩnĩngĩtĩ adĩmannu thõõth ꞌcĩ abũnnaa, adũmannuung hatĩ Nyekuci, hĩnĩngĩtĩ thõõth tĩho. “Ma hapuppuddu hode hiꞌngollinnu thooꞌthiok ꞌcĩg occa adĩmaneekuung nẽẽg ngagiita.”#Tigiil ꞌBuuk cĩ Iꞌthaia 8:12 15Itingolli Krĩstõ nẽ aanytĩhu hĩĩ Makayyioohit rũgẽtaa cunuung. Má ajinnuung eet umwaa thõõth cĩ lemiinit cunuung, ũkũmattoothĩk hõdõõkõthĩ, hátĩ attacanit, nẽẽthĩ, ĩdĩmanit thõõth icci tarbalꞌthẽẽta hĩ ngaatĩ iꞌngoliinnu ĩnõõnnõ. 16Attacanit ĩhõõggõ ꞌthinneetinii ꞌcĩg alalĩ nẽ aanytĩk muhẽẽnĩt cĩ ꞌthinneeti cugguung hĩĩ tẽlla. Má othooꞌthuung eeta ꞌbuth, aggam hatĩ ĩhõõggõ ngaaoni hatĩ acĩn rũgẽt cunuung ꞌcĩ abũnnaa, hĩnĩngĩtĩ iiginnu niig cĩg Krĩstõ. 17Mẽẽn ngaatĩ accananiinnu, hĩnĩngĩtĩ adĩmannu thõõth ꞌcĩ abũnnaa, hatĩ adiim Nyekuci haau noho, hĩllõõan ngaatĩ accananiinnu, hĩnĩngĩtĩ adĩmannu thõõth ꞌcĩ abathĩ. 18Hĩnĩngĩtĩ baa adaahĩ Krĩstõ tabattĩ hõdẽẽthõng, hĩnĩngĩtĩ ꞌthẽccanẽẽt cĩggaac. Baa nga hẽꞌthẽcan nẽẽ thõõth umwa ũdũt, nẽẽthĩ, baa adaahĩ nẽẽ, hĩnĩngĩtĩ ꞌthẽccanniook, hátĩ huukuung ngagiit hĩ Nyekuc. Baa aruhi nẽẽ hadaak, nĩngĩtĩ aaꞌnyĩkĩ Nyekuci ĩnõõnnõ hũrũga Loriia. 19Ma ho, aaꞌnyĩk Nyekuci Krĩstõ hũũk hirrioonĩk loriẽẽt ꞌcĩg aattĩg baabuutha, 20loriẽẽt cĩg eet baag hõllõngaa athĩhĩ Nyekuc baangaani, baa ẽrẽ Nyekuci hũtũngteek ꞌthẽccanẽẽt cĩggĩĩng waathinnioohĩĩ baag nga ẽhẽnytĩ Nõõa#3:20 Nõõa: Baa arũgĩ Nõõa korrioohĩĩ baag adĩmanĩ eeta thooꞌthiok ꞌcĩg abathĩ gẽrrẽẽt. Baa avva Nyekuci ĩnõõnnõ hẽtẽhẽny haahũl hẽẽlaĩ eet cĩg halang cĩnnĩ hĩ idiꞌngwa ũgĩ. Nĩngĩtĩ acũdaanĩ Nyekuci eet ũgĩ vẽlẽk hĩ idiꞌngwa tawaanaa cobbi. Tigiil thõõth cĩnnĩ ꞌBuuhaa cĩ ꞌThianaattõ 5-9. haahũl thõng. Baa eet turkiyyio thõng, ꞌcĩg baag eelliaa tawaanaa ĩbaa maka gẽrrẽẽt. 21Ĩthakꞌthoothĩk maama cĩg tawaanak ko, baattithimo ꞌcĩ ꞌyioko ẽẽlannuung ngagiit ko. Nẽẽthĩ, ĩllõõan baattithimo tũũnyẽnĩt cĩ ꞌriiring cĩg ẽllaak. Ĩĩn baattithimo ꞌgõõl ꞌcĩ õbõdaanĩ eeta hĩ Nyekuc ꞌthinneetinii ꞌcĩg abũnnaa, hĩnĩngĩtĩ baa ũrũga Yeesu Krĩstõ daahĩtha. 22Nẽẽthĩ ꞌyioko, ũũk Krĩstõ hẽẽtahujjieen. Iccioloongan nẽẽ ꞌyioko bulẽẽtta attiaa cobbi ĩcĩ Nyekuci nẽ ẽlẽmĩ aajĩlẽẽta hĩ makayyiook hĩ makaaꞌthĩt vẽlẽk cĩ hẽẽtkujjieen, ngaatĩ ĩĩnnĩ nẽẽ Makayyioohit cĩnĩĩng.

Currently Selected:

1 Pẽẽtũrũ 3: did

Highlight

Compare

Copy