1 Pẽẽtũrũ 2
2
Rũgẽt ꞌcĩ aalla ũdũt
1Nẽẽthĩ hoti ho, ma nga haaburreeku eet ũgĩ nẽ ma haggiiꞌthu eeta, nẽẽthĩ, iꞌthiattaaĩ udukta thõõth ꞌcĩ ĩĩn dĩdĩ. Ma hanyigaranoonnu hode ma hothooꞌthu ꞌgoonogu ꞌbuth. 2Aaut hĩ ĩdõlẽẽta ꞌcĩg adiim ira ꞌcĩg tẽllĩg ꞌcĩg au hĩ Nyekuc diooni, ꞌcĩ occa eelluung ngagiit ĩtĩlĩthĩt elliaattaa cunuung, 3nẽ ꞌyioko, ummuddiaau niig ngaatĩ abũnnayyĩ Makayyioohiti dĩdĩ.
Aaĩ Makayyioohiti hĩ bẽẽ ꞌcĩ arũgĩ
4Iita hĩ Yeesu Krĩstõ. Ĩĩn nẽẽ Makayyioohit ꞌcĩ aaĩ hĩ bẽẽ ꞌcĩ arũgĩ, ꞌcĩ baa abũrĩ eeta baag ẽbẽra Nyekuci nẽ aaddi hĩ ĩnõõnnõ gẽrrẽẽt. 5Iiginnu niig buúk biyyiẽẽn ꞌcĩg arũgĩ, ꞌcĩg ẽhẽnytĩ Nyekuci ꞌcieeth cĩ loriio. Nẽ tarĩ, iittu niig buúk lothippit cĩ paadĩrꞌnya ꞌcĩg ẽllẽẽmĩthĩ. Eelluung hatĩ Yeesu Krĩstõ ngagiit aanytĩk Nyekuc ꞌgaarriẽẽn ꞌcĩg accamana Nyekuci. 6Hĩcĩ eheeddi ꞌBuuhaa cĩ Nyekuci aĩ,
“Ĩcĩnĩt nõõ, haarihi naa bẽẽ ꞌThiona,#2:6 ꞌThion: ꞌThaara ꞌcĩg haĩ ꞌThion ko, ĩĩn ꞌthaar ũgĩ cĩg ꞌJeruꞌthalẽmĩ.
bẽẽ ꞌcĩ tiiri ꞌcĩ eberriaa ꞌcĩ aarĩhoothĩk õkĩca,
nẽ ẽẽtĩ ꞌcĩ ẽlẽmĩ ĩnõõnnõ,
hõllõngaa hatĩ aggam ngaaoni ũdũt.”#Tigiil ꞌBuuk cĩ Iꞌthaia 28:16
7Nẽ niig eeta ꞌcĩg elemmu ĩnõõnnõ ho, aaddi bẽẽ ciee gẽrrẽẽt. Nẽẽthĩ, hĩ eet ꞌcĩg hõllõngaa ẽlẽmĩ,
“Ikia ĩĩ bẽẽ ꞌcĩ tiiri gẽrrẽẽt,”#Tigiil ꞌBuuk cĩ Tegellwaanu 118:22
8nẽ,
“Bẽẽ ꞌcĩ adaaca eet
hĩ bẽẽ ꞌcĩ aaꞌnyĩk ĩhõõggõ hetteedito looc.”#Tigiil ꞌBuuk cĩ Iꞌthaia 8:14
Baa adaaca ĩhõõggõ bẽẽ, hĩnĩngĩtĩ baa hõllõngaa ẽlẽmĩ nẽẽg nyeemuut nẽ tabiinit ꞌcĩ baa adiimik Nyekuci ĩhõõggõ niccia.
9Nẽ ĩĩgĩnnu niig eet ꞌcĩg eberriaau iittu paadĩrꞌnya cĩg habuuak, cĩg looc ꞌcĩ ẽllẽẽmĩthĩ nẽ tarĩ, iittu eet cĩg Nyekuci, hátĩ illimatteek eet dĩhĩthẽẽnĩt cĩ eet baa avvaannuung ngagiit muguuratõõ iita lanyitaa cĩnnĩ ĩcĩ ĩllõõanĩ. 10Baa nga ĩĩtõ niig eet cĩg Nyekuci baa ĩĩcĩ oou, nẽẽthĩ ꞌyioko, iittu eet cĩgĩnnĩg. Baa nga hatamaatihuung eet umwaa ngagiita, nẽẽthĩ ꞌyioko, ikia atamaatihuung Nyekuci ngagiita.
11ꞌGotoonoga hĩ ngoonoga, haduhaakuung naa ngagiit hanneekuung, iiginnu niig eet cĩg looc ꞌcĩ ꞌrĩĩng hĩ tahana loota nĩnga. Nẽẽthĩ hoti ho, halayyuung naa ngagiit ũtũngteek hẽlẽggĩ ꞌcĩg abũraneek eleeti cugguung ꞌcĩg aruhoonnu hĩ ngagiit ko. 12Aaut jurrung hatĩ arũmeennu hĩ eet ꞌcĩg nga helemit Nyekuc, tananga õhõppõõcannuung nẽẽg ngagiit thooꞌthiohĩĩ ꞌcĩg abathĩ. Ma hatĩ kõr ꞌcĩ ẽttẽẽdĩ Nyekuci thooꞌthiok, adĩhĩth hatĩ nẽẽg Nyekuc ngaatĩ aduhaanĩ thooꞌthiok ꞌcĩg abũnnaa ꞌcĩg baag acĩn adĩmani niina.
ꞌGõõl ꞌcĩ hathĩknĩ makayyiook ꞌcĩg aggammeet hĩ ꞌcĩg allimanneeta
13Adiimmuung Makayyioohiti ngagiit ĩthĩhĩt thooꞌthiok cĩg ꞌgaala cugguung vẽlẽk, ettebehini habu cobbi ꞌcĩ aggam eet vẽlẽk. 14Adiim athiknu ꞌgaala ꞌcĩg obbitig buúk, hĩnĩngĩtĩ baa ĩꞌthõõa habuui cobbi ĩhõõggõ hiita huukito eet ꞌcĩg ẽꞌthẽcan thooꞌthiok nẽ ĩdĩhĩthĩt eet ꞌcĩg abũnnaa. 15Adiimmuung Nyekuci ngagiit ibilli eet ꞌcĩg õthõõth thooꞌthiok cĩg ꞌgiithẽttaak, ꞌgõõlaa ꞌcĩ adĩmannu thooꞌthiok ꞌcĩg aũlanĩ. 16Hĩnĩngĩtĩ õõgtau niig aauttu lõꞌngõõc, nẽẽthĩ, nga iiginnu appahacaaꞌnya cĩg Nyekuci noho, nẽẽthĩ, ma hadticaniinnu thõõth ꞌcĩ ooggiannu aaut lõꞌngõõc ko, ĩdĩmattĩ thooꞌthiok ꞌcĩg abathĩ. 17Itingolli eet vẽlẽk nẽ ĩmmĩnattu ꞌgotoonogu hĩ ngoonogu ꞌcĩg ĩĩn lemmiook. Itingolli Nyekuc nẽ itingollieeu habu cunuung.
Terethiinit cĩ ꞌcannan cĩ Krĩstõ
18Niig appahacaaꞌnya ĩthĩhĩt makayyiook cugguung nẽ itingollieeu ĩhõõggõ hõdõõkõthĩ. Ĩdĩmanit hoti, hõllõngaa hĩ eet ꞌcĩg tarbalĩg nẽ ũbũttaathõ thõng diooni, nẽẽthĩ, ĩdĩmatteek eet ꞌcĩg ĩĩn tongororriaak hĩ ngagiit buúk. 19Accamanannuung hatĩ Nyekuci ngagiit, hatĩ adĩmannu thooꞌthiok ꞌcĩg agayyu niig ainnu aũlan nẽ etemeeꞌthu thooꞌthiok ꞌcĩg adĩmannuung ngagiit makayyiooha ꞌcĩg abathĩ ꞌbuth, hĩnĩngĩtĩ agayyu Nyekuc. 20Aitiõõ ꞌgii ꞌcĩ ammũdaannu niig hatĩ uukennu, hĩnĩngĩtĩ thõõth ꞌcĩ ẽꞌthẽcannu thõng tõõ. Nẽẽthĩ, aggatannuung hatĩ Nyekuci hatĩ emmeeꞌthu ꞌcannan, hĩnĩngĩtĩ adĩmannu thõõth ꞌcĩ abũnnaa. 21Hĩnĩngĩtĩ baa ẽbẽraauung Nyekuci ngagiit hátĩ accanattĩ, hĩcĩ anuyyu ꞌcannan baa Krĩstõ baa ẽtẽrꞌtha nẽẽ ngaatĩ accananiini hĩnĩngĩtĩ ngagiita.
22Baa hõllõngaa ẽꞌthẽcan Krĩstõ thõõth umwa
hode aduha õlõng.#Tigiil ꞌBuuk cĩ Iꞌthaia 53:9
23Tananga baa õdõõm eeta ĩnõõnnõ, baa hõllõngaa aruha nẽẽ oolo. Ma baa accananni nẽẽnĩ, baa hõllõngaa eggerꞌnyeek nẽẽ eet umwa. Nẽẽthĩ hinnianĩ, baa aalla aꞌnyak nẽẽ lemiinit hĩ Nyekuc ꞌcĩ ẽttẽẽd thooꞌthiok cĩg eetuk jurrung. 24Baa ẽhẽẽl Krĩstõ ꞌthẽccanẽẽt cĩggaac. Baa ododdothoothĩk nẽẽ hurucceea, hátĩ hiittiõõ hõllõngaa hẽꞌthẽcan naag tarĩ nẽ hátĩ hĩthĩhĩt thõõth ꞌcĩ aũlanĩ. Aaꞌnyuung nẽẽ ngagiit ũbũttaath ngatũbẽẽnnĩĩ cĩgĩnnĩg. 25Baa arahattu niig aauttu hĩ aꞌtha ꞌcĩg iꞌngittõõthĩ thõng, nẽ ꞌyioko, oboddiaau hĩ tũhayyioohit cunuung ꞌcĩ aꞌthuunnuung ngagiita.
Currently Selected:
1 Pẽẽtũrũ 2: did
Highlight
Share
Compare
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
