1 Yõaannẽ 3

1Ĩcĩnĩt nõõ ngaatĩ ammĩnanneet Baangẽẽtĩ ngagĩĩt gẽrrẽẽt, aũũyyeet nẽẽ ngagĩĩt anneekeet lõhõlĩ cĩgĩnnĩg, nẽẽꞌthẽk hĩĩgĩn naag lõhõlĩ cĩgĩnnĩg dĩdĩ! Nẽẽthĩ, aitiõõ eeta cĩg looc nicci hõllõngaa aga ngaatĩ hĩĩgĩnnĩ naag lõhõlĩ cĩg Nyekuci, hĩnĩngĩtĩ hõllõngaa aga nẽẽg ĩnõõnnõ. 2ꞌGotoonoga hĩ ngoonoga, hĩĩtõ naag lõhõlĩ cĩg Nyekuci ẽlẽk, nẽẽthĩ hinnia, nga heteretheeheet nẽẽ ngagĩĩt ꞌgõõl ꞌcĩ hatĩ haattiyyi, hatĩ uppwaanna Krĩstõ. Nẽẽthĩ, haga naag haĩ, haattĩg hatĩ naag hĩ nẽẽnĩ, hĩnĩngĩtĩ hacĩn hatĩ naag ĩnõõnnõ dẽẽdẽ. 3Aaꞌnyeet thõõth ꞌcĩ haarĩkĩ ꞌthinneeti thõõth icci ho, helleemit hĩcĩ ẽllẽẽmĩth Krĩstõ.

4Ẽẽtĩ ꞌcĩ adĩman ꞌthẽccan, ẽꞌthẽcan nyattal cĩ Nyekuci, hĩnĩngĩtĩ aduhõõ ꞌthẽccanĩ hĩ ngaatĩ habũrrĩ nyattal cĩ Nyekuci thõng. 5Nẽ agayyu niig aĩ baa aku Krĩstõ, hátĩ hittik ꞌthẽccanẽẽt battaala nẽ aitiõõ ꞌthẽccanĩ hĩ ĩnõõnnõ tõõ. 6Nẽ eeta ꞌcĩg aalla arũmĩ hĩ ĩnõõnnõ ꞌthinneetinii cĩggĩĩng, hõllõngaa aalla adĩman ꞌthẽcan. Nẽẽthĩ, ẽẽtĩ ꞌcĩ ara ꞌthẽccan, hõllõngaa aga nẽẽ Krĩstõ dẽẽdẽ nganĩ.

7Niig lohollia, ma haaꞌnyiku eet umwa higgooluung thõõthaa cĩ. Ma adĩman eeta thõõth ꞌcĩ aũlanĩ, ẽtẽrꞌtha thõõth tĩho aĩ, ĩĩn nẽẽg eet ꞌcĩg abũnnaa, hĩcĩ abũnnaa Krĩstõ. 8Ẽẽtĩ ꞌcĩ aalla adĩman ꞌthẽccan, ĩĩn eet cĩ habu cĩ loriẽẽt ꞌcĩg abathĩ. Baa ẽꞌthẽcanõõ ꞌThĩttaanĩ baa ꞌthianaatta, nẽẽthĩ, baa aku Ngeertĩ Nyekuci hikia hõõga eet dtiicanẽẽnnĩ vẽlẽk ĩcĩg abathĩ ĩcĩg ꞌThĩttaanak. 9Hõllõngaa occa aalla adĩman lohollia cĩg Nyekuci ꞌthẽcan. Hĩnĩngĩtĩ aaĩ ꞌtirriani cĩ Nyekuci ꞌcĩ aaꞌnyĩk ĩhõõggõ rũgẽt nẽ aaꞌnyĩk ĩhõõggõ hĩĩtõ lõhõlĩ cĩgĩnnĩg, hátĩ hiittiõõ hõllõngaa ara adĩman ꞌthẽccan. 10ꞌGõõl ꞌcĩ occa hagaĩ naag lõhõlĩ cĩg Nyekuci, hĩ lõhõlĩ cĩg habu cĩ loriẽẽt ꞌcĩg abathĩ cieeni. Ẽẽtĩ ꞌcĩ hõllõngaa adĩman thooꞌthiok ꞌcĩg aũlanĩ, hõllõngaa ĩĩn loholeec cĩ Nyekuci nẽ ẽẽtĩ ꞌcĩ hõllõngaa ammĩnan ꞌgõtõnĩ, hõllõngaa ĩĩn nẽẽ buúk loholeec cĩ Nyekuci.

Ĩmmĩnanit eleeti cugguung

11Nyeemuut baa athiknu niig baa ĩĩcĩ oou cieeni. Adiim hammĩnanõõ naaga. 12Ma haattiyyu hĩ Kaiino baa ĩĩn loholeec cĩ ꞌThĩttaanõ nẽ uruk ꞌgõtõnĩ. Aruk occa baa nẽẽ ꞌgõtõnĩ inni? Baa aruk nẽẽ ꞌgõtõnĩ, hĩnĩngĩtĩ baa adĩman nẽẽ thooꞌthiok ꞌcĩg abathĩ nẽ ĩdĩman ꞌgotonnia thooꞌthiok ꞌcĩg aũlanĩ. 13ꞌGotoonoga hĩ ngoonoga, ma hakuleeku ꞌjieen hatĩ aaburreekuung eeta cĩg looc nicci. 14Má hammĩnan naag ꞌgotoonogeet hĩ ngoonogeet, ẽtẽrꞌtha thõõth ciee aĩ, hũtũngteek naag daahĩth hiita rũgẽta. Nẽẽthĩ, ẽẽtĩ ꞌcĩ hõllõngaa ammĩnan ꞌgõtõnĩ hode ngõõnĩ, nga aalla nẽẽ daahĩtha. 15Ẽẽtĩ ꞌcĩ aaburreek ꞌgõtõnĩ hode ngõõnĩ, ĩĩn nẽẽ ꞌrukioohit dẽẽdẽ ꞌthĩnĩtatõõ cĩnnĩ. Nẽ agayyu niig aitiõõ ꞌrukiooha hõllõngaa hatĩ ammũda rũgẽt ꞌcĩ aalla ooo.

16ꞌGõõl ꞌcĩ hagaĩ naag mĩnnan cieeni. Baa ẽlẽmana Yeesu Krĩstõ ẽlẽ cĩnnĩ, hĩnĩngĩtĩ ngagĩĩta. Nẽ adiim occa hẽlẽmana naag buúk eleeti cĩggaac, hĩnĩngĩtĩ ꞌgotoonogeet hĩ ngoonogeet. 17Má haꞌnyak naag hẽlẽggĩ vẽlẽk ꞌcĩg hadiim naaga nẽ hĩcĩnĩt eet cĩggaac ꞌcĩg appĩĩrna, adiim occa hammaannĩk naag eet tĩko, má aitiõõ, occa hõllõngaa haĩ naag aaĩ mĩnnanĩ cĩ Nyekuci hĩ ngagĩĩta. 18Niig lohollia, hõllõngaa occa hammĩnan naag eleeti cĩggaac thõõthaa ꞌcĩ hõthõõth ũtũũga haaga, hĩmmĩnattõ dtiicanẽẽnnĩ hĩ thõõthaa ꞌcĩ ĩĩn dĩdĩ. 19Má hammĩnan naag ꞌgotoonogeet hĩ ngoonogeet, haga naag haĩ hĩĩgĩn eet cĩg thõõth ꞌcĩ ĩĩn dĩdĩ nẽ haattĩg lõꞌngõõc muumaa cĩ Nyekuci. 20Tananga hõllõngaa haattĩg lõꞌngõõc muumaa cĩnnĩ buúk, ĩllõõan Nyekuci thooꞌthiok ꞌcĩg hammuk naaga nẽ aga nẽẽ hẽlẽggĩ vẽlẽk.

21ꞌGotoonoga hĩ ngoonoga, má haattĩg naag lõꞌngõõc muumaa cĩ Nyekuci, õkõmĩ hatĩ ngagĩĩt ꞌthinneeti ngaatĩ haauuni hõbõktõ hĩ ĩnõõnnõ. 22Aaꞌnyeet hatĩ nẽẽ ngagĩĩt ꞌgii vẽlẽk ꞌcĩ hajin naag ĩnõõnnõ, hĩnĩngĩtĩ hathĩhĩ naag thõõth cĩnnĩ nẽ hĩdĩmanit thooꞌthiok ꞌcĩg accamana nẽẽnĩ. 23Adiimmeet Nyekuci ngagĩĩt helemit Ngeerĩnĩ Yeesu Krĩstõ nẽ hĩmmĩnanit eleeti cĩggaac. Thõõth baa ilootĩkeet Nyekuci ngagĩĩt hĩdĩmanit cieeni. 24Má hathĩhĩ naag tilooinit cĩ Nyekuci, harũmĩ hatĩ naag ꞌthinneetinii cĩggaac hĩ ĩnõõnnõ nẽ hatĩ aau nẽẽ ꞌthinneetinii cĩggaac. Eterꞌtheekeet Lorii baa aaꞌnyeet nẽẽ ngagĩĩt ngaatĩ hĩĩgĩnnĩ naag hõdẽẽthõng hĩ ĩnõõnnõ.

Currently Selected:

1 Yõaannẽ 3: did

Highlight

Copy

Compare