1 Korinthia 14

ꞌBaaninit ꞌcĩ haduhaanĩ thõõth ꞌcĩ horumwa

1Ũnnẽẽc ꞌgõõl cĩ mĩnnaanõ nẽ ũbũratteehu ꞌbaaninit cĩ Lori ꞌcĩ Ẽllẽẽmĩthĩ, ettebehini ꞌbaaninit ꞌcĩ haduhaanĩ thõõth ꞌcĩ hatĩ aku horumwa. 2Hĩnĩngĩtĩ ẽẽtĩ umwaa ꞌcĩ õthõõth ũtũũgaa ꞌcĩ ꞌrĩĩng, hõllõngaa õthõõthõõ hĩ eeta, õthõõthõõ nẽẽ hĩ Nyekuc. Nẽ dĩdĩ, aitiõõ ẽẽtĩ ꞌcĩ athĩhĩ ĩnõõnnõ tõõ, aduha nẽẽ thooꞌthiok ꞌcĩg hõllõngaa agayyi loriiaa cĩnnĩ. 3Nẽ ẽẽtĩ ꞌcĩ aduha thooꞌthiok ꞌcĩg hatĩ au horumwa, aduhaak nẽẽ eet, hátĩ hokomit ꞌthinneeti, akũtan ĩhõõggõ nẽ amammaayan thõng. 4Ẽẽtĩ ꞌcĩ õthõõth ũtũũgaa cĩrrĩĩng, ẽẽl nẽẽ ẽlẽ cĩnnĩ, nẽẽthĩ, ẽẽtĩ ꞌcĩ aduha thõõth ꞌcĩ hatĩ aku horumwa, ẽẽl nẽẽ lothippit cĩ lemmioohu. 5Hadiimmuung naa ngagiit othoothit thooꞌthiohĩĩ ꞌcĩg ꞌrĩĩng, nẽẽthĩ nẽẽꞌthẽk, hadiimi occa aduhaannu thooꞌthiok cĩg horumwa. Ĩllõõan ẽẽtĩ ꞌcĩ aduha thooꞌthiok cĩg horumwa eet ꞌcĩ õthõõth ũtũũgaa ꞌcĩ ꞌrĩĩng, hatĩ hõllõngaa õkõbaneek eet hĩthĩhĩt, hátĩ hũkũmaneek muhẽẽnĩt cĩ lothippit cĩ lemmioohu.

6Nẽẽthĩ ꞌyioko, ꞌgotoonoga hĩ ngoonoga, má hakuu naa hĩ ngagiit nẽ hõthõõtha thooꞌthiohĩĩ ꞌcĩg ꞌrĩĩng, occa hatĩ habũnna naa hĩ ngagiit hutuno, hatĩ hõllõngaa haꞌnyahaakuung ngagiit terethiinit hode ꞌgẽẽnyĩth hode thõõth ꞌcĩ hatĩ aku horumwa hode thõõth cĩ ꞌlimmaanõ? 7Tananga hadtahĩ loboru hode huruhi bõhõl, occa hatĩ aga ẽẽtĩ umwaa molook iina ꞌcĩ adtaki hode iina ꞌcĩ aruhi ho, hatĩ hõllõngaa agayyi molookwaana ꞌcĩg õrõk ko hõdẽĩ hõdẽĩ? 8Má hõllõngaa adtaki illieeri cĩ luluuo jurrung, occa hatĩ akũmanoothĩk eeta hõõt jora hutuno? 9Nẽ aaĩ noho hĩ ngagiit buúk, hatĩ othooꞌthu utugeetinii ꞌcĩg ꞌrĩĩng. Má aitiõõ ẽẽtĩ ꞌcĩ athĩhĩ thõõth ꞌcĩ othooꞌthu niig ko tõõ, aaĩ hinnia hatĩ hĩcĩ othoothiku ngõõt haaga. 10Mẽẽlĩg utugeeti ꞌcĩg ꞌrĩĩng looccaa nĩĩcĩ nẽ abũnnaa nẽẽg vẽlẽk. 11Nẽẽthĩ, má hõllõngaa hathihi naa thõõth ꞌcĩ õthõõth eet umwaanĩ, hĩĩnĩ hinnia naa eet cĩ looc cĩrrĩĩng hĩ eet tĩho nẽ ĩĩn nẽẽ buúk eet ꞌcĩ looc cĩrrĩĩng hĩ nganĩĩta. 12Má adiimmu niig ꞌbaaninit cĩ Lori ꞌcĩ Ẽllẽẽmĩth dĩdĩ, eberria thĩ ꞌbaaninit ꞌcĩ hatĩ ẽẽl lothippit cĩ lemmioohu jurrung.

13Nẽ hĩnĩngĩtĩ thõõth icci, aꞌnyĩĩk eet ꞌcĩ õthõõth thõõthaa ꞌcĩ ꞌrĩĩng halaõ, hátĩ hẽẽl Nyekuci ĩnõõnnõ hõkõbaneek eet thõõth ꞌcĩ õthõõth nẽẽ ho. 14Hĩnĩngĩtĩ má halayyi naa ũtũũgaa umwaanĩ, lori caannĩ ꞌcĩ alayyi ho. Nẽẽthĩ hinnia, hõllõngaa haga naa muhẽẽnĩt caannĩ. 15Nẽ hatĩ ꞌyioko hĩdĩmana naa hutuno? Halaayyi hatĩ loriiaa caannĩ nẽ hatĩ halaõ muhẽẽttaa caannĩ buúk, hebenni hatĩ loriiaa caannĩ nẽ hẽbẽnõ muhẽẽttaa caannĩ buúk. 16ꞌYioko haauto tahana laiittaa cunuung, hatĩ adĩhĩꞌthu niig Nyekuc loriiaa cunuung nẽ hõllõngaa athiknuung nẽẽg ngagiit, occa hatĩ aĩ nẽẽg, “Aamẽn” hutuno? 17Horoong occa alayyu niig Nyekuc ꞌgõõlaa ꞌcĩ abũnnaa, nẽẽthĩ hinnia, hõllõngaa ẽẽl laiiniti cunuung ko eet umwa buúk.

18Hanneehi naa Nyekuc ĩlaallẽ, hĩnĩngĩtĩ hothoothi naa utugeetinii ĩĩcĩg ꞌrĩĩng hĩllõõanuung ngagiit vẽlẽk. 19Nẽẽthĩ, má haaĩ lothippitaa cĩ lemmioohu, occa mẽẽn ngaatĩ hõthõõthĩ thooꞌthiok ꞌtur cĩg ꞌgẽẽnyĩthaak ꞌcĩg athĩhĩ eeta hatĩ hallimani eet ũgĩ, hĩllõõan ngaatĩ occa hõthõõthĩ thooꞌthiok aalibꞌnya õmmõtõ ꞌcĩg hõllõngaa athĩhĩ eeta.

20ꞌGotoonoga hĩ ngoonoga, ma haꞌnyaku muhẽẽnĩt hĩ lohollia ꞌcĩg hidicẽẽgĩ. Nẽ thõõthaa ꞌcĩ abathĩ, ĩmmĩrĩt aaut hĩ ĩdõlẽẽta nẽẽthĩ, muhẽẽttaa cunuung, aꞌnyahit muhẽẽnĩt hĩ eeta ꞌcĩg obbitẽẽgĩ. 21Õthõõth Makayyioohiti ꞌBuuhaa cĩnnĩ aĩ,

“Hadticaniini hatĩ naa eet cĩg looc cĩrrĩĩng ꞌcĩg õthõõth utugeetinii cĩg hõllõngaa aga eeta,

hothooꞌthik eet cĩgannĩg.

Õthõõthõõ hatĩ nẽẽg hĩ ĩhõõggõ thõõthaa cĩ eet ꞌcĩg ꞌrĩĩng,

nẽ aalla eeta cĩgannĩg ko, hõllõngaa athĩkna nganĩĩt noho.”#Tigiil ꞌBuuk cĩ Iꞌthaia 28:11-12

22Hõllõngaa ĩĩn thõõth ꞌcĩ õthõõth eeta ꞌcĩg ꞌrĩĩng ko, terethiinit cĩ lemmioohu, ĩĩn cĩ eet ꞌcĩg hõllõngaa ĩĩn lemmiook nẽ ĩĩn thõõth ꞌcĩ adukiaa ꞌcĩ hatĩ aku horumwa cĩ lemmioohu nẽ hõllõngaa ĩĩn cĩ eet ꞌcĩg hõllõngaa ĩĩn lemmiook. 23ꞌYioko ꞌthẽk hothoothito eeta laiittaa cunuung thooꞌthiohĩĩ ꞌcĩg ꞌrĩĩng nẽ iita eeta ũgẽẽgĩ ꞌcĩg ꞌrĩĩng hode ꞌcĩg hõllõngaa ĩĩn lothippit cĩ lemmioohu hĩ ngagiit, hõllõngaa hinnia hatĩ ammuk nẽẽg aĩ, adakuung ngagiit maangõnĩ? 24Nẽẽthĩ ꞌyioko, udukta niig vẽlẽk thooꞌthiok ꞌcĩg hatĩ au horumwa, hatĩ aduknaakuung eeta ꞌcĩg hõllõngaa ĩĩn lemmiook hĩ eet ꞌcĩg ꞌrĩĩng, occa hatĩ au ammũda nẽẽg ngaatĩ ĩĩnnĩ nẽẽg ꞌthẽccanniook nẽ idiimito ꞌgõõl ꞌcĩ ũũhũĩ ꞌthinneeti cĩggĩĩng, hĩnĩngĩtĩ thõõth ꞌcĩ aduhaannu niig ko. 25Appulana hatĩ nẽẽg thooꞌthiok ꞌcĩg ammiꞌthi ꞌthinneetinii cĩggĩĩng. Nẽẽthĩ hatĩ akatit huruꞌnyia nẽ ĩĩttĩg Nyekuc, “Hagayyia dĩdĩ ngaatĩ aayyi nii hĩ eet iccig.”

Laiinit ꞌcĩ abũnnaa

26Hõthõõth occa ꞌyioko haĩ ne ꞌgotoonoga hĩ ngoonoga? Má alũteennu niig hõdẽĩ, aꞌnyak eeta hõdẽĩ hõdẽĩ tẽgẽl hode thõõth cĩ ꞌlimmaanõ, hode thõõth cĩ terethiitto, hode ũtũg ꞌcĩ ꞌrĩĩng hode thõõth ꞌcĩ occa õkõbanni. Adiim occa adticanni thooꞌthioha cieeg vẽlẽk, hátĩ haanytĩk lothippit cĩ lemmioohu hittiran. 27Má õthõõth eet umwaa ũtũgaa ꞌcĩ ꞌrĩĩng, aanytĩk hothoothito eeta ꞌramma hode iyyio, hõdẽĩ hõdẽĩ nẽ õkõbanõõ ẽẽtĩ umwaa thõng. 28Má aitiõõ ẽẽtĩ ꞌcĩ õkõban thõõth tõõ, aꞌnyĩĩk eet ꞌcĩ õthõõth ko hĩjjaahõ lothippitaa cĩ lemmioohu nẽ õthõõthĩ ẽlẽ cĩnnĩ dioo hĩ Nyekuc.

29Aanytĩk põrõvẽtaaꞌnya ꞌramma hode iyyio hothoothito nẽ ittiamanit eeta ũgẽẽgĩ thõõth ꞌcĩ adukiaa ho jurrung. 30Nẽ má aaĩ ẽẽtĩ umwaa ꞌcĩ iccioloongan loota ꞌcĩ aaꞌnyĩk Nyekuci nyeemuut umwa, aꞌnyĩĩk eet ꞌcĩ hatĩ õthõõth ꞌjieena, hĩjjaahõ nẽ ikia õthõõth ꞌcĩ umwa ho. 31Aanytĩk eet hõdẽĩ hõdẽĩ hudukta thooꞌthiok cĩg horumwa, hátĩ illimatta niig vẽlẽk thõõth ꞌcĩ aduha nẽẽg ko hũkũtan ĩhõõggõ. 32Aggam loriẽẽt cĩg põrõvẽtaaꞌnyanu põrõvẽtaaꞌnya. 33Adiim Nyekuci hẽlẽggĩ vẽlẽk hidticattĩ lõꞌngõõc ꞌgõõlaa ꞌcĩ abũnnaa.

Ma õmmõtõõ lothippiꞌnya cĩg lemmioohu, 34occa hõllõngaa elemmiaakĩ ngaaĩ hothoothito lothippitaa cĩ lemmioohu. Occa ijjiaaki nẽ ĩthĩktõ haaga, hĩcĩ aduha nyattalĩ cĩ Mũũꞌtha. 35Má aaĩ ꞌgii umwaa ꞌcĩ adiim aga nẽẽgĩ, occa ajin maaccwa cĩggĩĩng hatĩ õdõlanit õlõ. Aitiõõ hõllõngaa abũnnaa hatĩ õthõõth ngaa ngaatĩ õmmõtõõnĩ lothippiti cĩ lemmioohu.

36Iꞌthianaanĩ baa thõõth cĩ Nyekuci hĩ ngagiita? Hode ngagiit baa dioo ꞌcĩg õdõlannuung thõõth cĩ Nyekuci? 37Má ammuk eet umwaa aĩ hĩĩnĩ põrõvẽtaac hode aꞌnyak ꞌbaaninit cĩ Lori cĩ Ẽllẽẽmĩthĩ, aꞌnyĩĩk haga nẽẽ hĩĩ, thõõth ꞌcĩ hẽhẽẽdakuung naa ngagiit ko, ĩĩn tilooinit cĩ Makayyioohit Yeesu. 38Má appallaaran nẽẽ thõõth icci, appallaaran hatĩ Makayyioohiti ĩnõõnnõ buúk.

39Nẽẽthĩ, abũnnaa ꞌgotoonoga hĩ ngoonoga, ĩrrĩcatta ngaatĩ aduhaannu thooꞌthiok cĩg horumwa nẽ ma hedeneeku eet ngaatĩ õthõõthĩ thooꞌthiohĩ cũũmõ cũũmõ. 40Nẽẽthĩ, occa adĩmanni hẽlẽggĩ vẽlẽk ꞌgõõlaa ꞌcĩ aũlan ĩcĩ abũnnaa.

Currently Selected:

1 Korinthia 14: did

Highlight

Copy

Compare