1 Korinthia 12

ꞌBaaninit cĩ Loriio

1Nẽẽthĩ ꞌyioko, ꞌgotoonoga hĩ ngoonoga, thõõth ꞌcĩ ajinnaangu niig nganĩĩt ꞌbaaninit cĩ Lori ꞌcĩ Ẽllẽẽmĩth ko, hõllõngaa hadiimmuung naa ngagiit herehuung thõõth cieeni. 2Agayyu niig baa nga agaac niig Nyekuc, baa arahannuung ngagiit hẽlẽggĩ ꞌcĩg aarru niig hĩĩtõ nyekuꞌnya nẽ alayyu hẽlẽggĩ ꞌcĩg hõllõngaa õthõõth buúk. 3Nẽẽthĩ ꞌyioko, hadiimmuung naa ngagiit agaac ĩĩtõ, aitiõõ ẽẽtĩ ꞌcĩ occa õthõõth loriia cĩ Nyekuci hõllõngaa occa accĩĩn Yeesu nẽ aitiõõ ẽẽtĩ ꞌcĩ occa õthõõth aĩ, ĩĩn Yeesu Makayyioohit, hatĩ aitiõõ Lorii ꞌcĩ Ẽllẽẽmĩth hĩ ĩnõõnnõ tõõ.

4Aaꞌnyĩk Lorii ꞌcĩ Ẽllẽẽmĩth eet ꞌbaaninit cũũmõ cũũmõ. 5Mẽẽlĩg dtiicanĩ gẽrrẽẽt, nẽẽthĩ hinnia, odoyyii Makayyioohiti ꞌcĩ hadticanoothĩk naaga. 6Adticanni Nyekuci ꞌgoolliohĩĩ cĩg mẽẽlĩg nẽ Nyekuc nicci dioo ꞌcĩ adtican thooꞌthiok hĩ eet vẽlẽk.

7Aaꞌnyeet Lorii ngagĩĩt hõdẽĩ hõdẽĩ ꞌgõõl ꞌcĩ hadticanõõthĩkĩ ꞌgoonogeet. 8Õthõõth eeta ũgẽẽgĩ hõrggẽẽnaa cĩnaac ꞌgẽẽnyĩtha nẽ othoothito ũgẽẽgĩ thooꞌthiok ꞌcĩg aga nẽẽg jurrung ꞌcĩg aaꞌnyĩk Lorii nicciee diooni. 9Aaꞌnyĩk Lorii eet ũgĩ lemiinit cobbi nẽ aaꞌnyĩk ũgĩ ꞌtirrian ꞌcĩ ẽẽlanĩ eet ꞌcĩg õmmõõrĩ hũbũttaathõ, 10nẽ aaꞌnyĩk ũgĩ ꞌtirrian ꞌcĩ adticanĩ thooꞌthiok ꞌcĩg ĩnaat eeta, aaꞌnyĩk eet umwa huduha thõõth ꞌcĩ hatĩ aku horumwa nẽ aaꞌnyĩk eet umwa hittiaman nyeemuut ꞌcĩ aku hĩ Lori cĩ Nyekuci hode hĩ loriẽẽt ũgĩ haaga nẽ aaꞌnyĩk eet umwa hõkõban thooꞌthiok loonyini cũũmõ cũũmõ. 11Ĩĩn cieeg vẽlẽk dtiicanĩ cĩg Lori hõdẽẽthõng nẽ aaꞌnyĩk nẽẽ eet hõdẽĩ hõdẽĩ hĩcĩ adiim nẽẽnĩ.

Ẽlẽ hõdẽẽthõng ꞌcĩ aꞌnyak dhooriꞌnya ꞌcĩg mẽẽlĩg

12Ĩĩn ẽlẽ hõdẽẽthõng, tananga ẽhẽnytaa haꞌnyak dhooriꞌnya ꞌcĩg mẽẽlĩg nẽ tananga mẽẽlĩg dhooriꞌnya cĩgĩnnẽẽgĩ, ĩĩn nẽẽg vẽlẽk ẽlẽ hõdẽẽthõng. Nẽ aaĩ ẽlẽ cĩ Krĩstõ buúk noho. 13Hĩnĩngĩtĩ baa aggamoothĩkeet ngagĩĩt vẽlẽk baattithimo Loriia, hiita hĩĩtõ naag ẽlẽ hõdẽẽthõng, tananga hĩĩgĩn ꞌJudeei hode ꞌGirik hode appahacaaꞌnya hode eet ꞌcĩg hõllõngaa ĩĩn appahacaaꞌnya nẽ baa aaꞌnyĩhoothĩkeet ngagĩĩt vẽlẽk Lorii hõdẽẽthõng ꞌthinneetinii cĩggaac.

14Nẽẽthĩ ꞌyioko, baa hõllõngaa ẽhẽnytaa ẽlẽ ĩĩn dhoorit hõdẽẽthõng, baa ẽhẽnytaa aꞌnyak dhooriꞌnya ꞌcĩg mẽẽlĩg. 15Nẽ má occa ꞌyioko hĩĩ ꞌthõõtĩ, “Hĩnĩngĩtĩ hõllõngaa hĩĩnĩ naa aꞌthiit, aitiõõ hõllõngaa hĩĩnĩ naa dhoorit cĩ ello,” hĩnĩngĩtĩ thõõth niccia, hõllõngaa occa nẽ iittiõõ hõllõngaa ĩĩn ꞌthõõtĩ dhoorit cĩ ello. 16Nẽ má occa ꞌyioko hĩĩ ĩtatĩ, “Hĩnĩngĩtĩ hõllõngaa hĩĩnĩ naa hebereec, aitiõõ hõllõngaa hĩĩnĩ naa dhoorit cĩ ello,” nẽẽthĩ, hĩnĩngĩtĩ thõõth icci, occa hõllõngaa alaam ĩnõõnnõ ngaatĩ ĩĩnnĩ dhoorit cĩ ello. 17Nẽ má baa hĩĩ ẽlẽ vẽlẽk hebereec, occa ꞌyioko baa aaĩ nĩngĩtĩ thĩhẽẽttõ ngaana? Má baa hĩĩ ẽlẽ vẽlẽk ĩtat, occa ꞌyioko baa aaĩ nĩngĩtĩ coohittõõ ngaana? 18Nẽẽthĩ dĩdĩ, baa ẽꞌthẽdaneek Nyekuci dhooriꞌnya ẽlla, aarĩk ĩhõõggõ vẽlẽk hĩcĩ baallĩ ꞌthẽk adiim nẽẽnĩ. 19Má baa hĩĩtõ nẽẽg vẽlẽk dhoorit hõdẽẽthõng, occa baa aaĩ ẽlẽ ngaana? 20Nẽ hĩ ꞌyioko ho, mẽẽlĩg dhooriꞌnya cĩg ẽllaak, nẽẽthĩ hinnia, odoyyii ẽlẽ.

21Occa hõllõngaa anneek hẽbẽrẽẽcĩ aꞌthiit, “Hõllõngaa hadiimmii naa nganiita!” Nẽ occa hõllõngaa anneek õõ ꞌthoo, “Hõllõngaa hadiimmuung naa ngagiita!” 22Nẽẽthĩ dĩdĩ, dhooriꞌnya ũgẽẽgĩ cĩg ẽllaak ꞌcĩg aattĩg hĩcĩ hõllõngaa attiran ko, aaddi nẽẽg buúk gẽrrẽẽt ĩllõõanĩ. 23Nẽẽthĩ, harrĩcana hinnia naag ngaatĩ hahimti dhooriꞌnya ũgĩ cĩg eleeti cĩggaac. Nẽ hũmmũtĩt dhooriꞌnya ũgĩ cĩg ẽllaak ꞌcĩg aaꞌnyeet ngaaoni, hiittiõõ hõllõngaa edeeꞌnyia. 24Nẽ dhooriꞌnya ꞌcĩg edeeꞌnyia, hõllõngaa haallak gẽrrẽẽt.

Baa arũm Nyekuci dhooriꞌnya vẽlẽk cĩg ẽllaak nẽ aaꞌnyĩk dhooriꞌnya ꞌcĩg hõllõngaa tiirik gẽrrẽẽt hĩĩtõ ꞌcĩg tiirik, 25baa adĩman nẽẽ hoti, haaꞌnyĩk dhooriꞌnya cĩg ẽllaak vẽlẽk hidticattõõ hõdẽĩ jurrung, ꞌgõõlaa ꞌcĩ aꞌthũũnnĩ ꞌgõõnõgĩ ũgĩ. 26Má ẽkẽdan dhooriti umwaanĩ, ẽkẽdan ẽlẽ vẽlẽk. Má hõllõngaa ẽkẽdan dhooriti umwaanĩ, accamanoothĩk ẽlẽ vẽlẽk.

27Nẽẽthĩ ꞌyioko, ĩĩgĩnnu niig ẽlẽ cĩ Krĩstõ nẽ niig hõdẽĩ hõdẽĩ, iiginnu dhoorit cĩ ẽlẽ cĩnnĩ ho. 28Hõrggẽẽnaa cĩ lothippit cĩ lemmioohu, baa ẽbẽra Nyekuci ĩĩcĩ oou ꞌthooyyiak nẽ ꞌramma cĩnnĩ, ẽbẽra põrõvẽtaaꞌnya nẽ ĩĩcĩ ĩĩn iyyio, ẽbẽra ꞌlimmanniook nẽ ẽbẽra dticcianniook cĩg thooꞌthiok ꞌcĩg ĩnaat eeta nẽ ẽbẽra eet ꞌcĩg aꞌnyak ꞌbaaninit ꞌcĩ aaꞌnyĩkĩ eet hũbũttaathõ nẽ ẽbẽra eet ꞌcĩg ũũlũ ngaatĩ ẽẽlĩ ꞌgõõnõgĩ nẽ ẽbẽra eet ꞌcĩg aꞌnyak ꞌbaaninit ꞌcĩ aggamĩ ꞌgõõnõgĩ nẽ ẽbẽra eet ꞌcĩg õthõõth thooꞌthiohĩ cũũmõ cũũmõ. 29Aitiõõ hõllõngaa ĩĩn eeta vẽlẽk ꞌthooyyiak. Nẽ hõllõngaa ĩĩn eeta vẽlẽk põrõvẽtaaꞌnya. Nẽ tarĩ, hõllõngaa ĩĩn eeta vẽlẽk ꞌlimmanniook. Aitiõõ hõllõngaa ũũlũ eeta vẽlẽk ngaatĩ adticanĩ thooꞌthiok ꞌcĩg ĩnaat eeta. 30Hõllõngaa ũũlũ eeta vẽlẽk ngaatĩ aaꞌnyĩkĩ eet ꞌcĩg õmmõõrĩ hũbũttaathõ. Hõllõngaa ũũlũ eeta vẽlẽk ngaatĩ õthõõthĩ utugeetinii ꞌcĩg ꞌrĩĩng. Nẽ hõllõngaa ũũlũ eeta vẽlẽk ngaatĩ õkõbanĩ thõõth ꞌcĩ ꞌrĩĩng hagaacõ eeta. 31Hadiimmuung naa ngagiit ũbũratteek ꞌbaaninit ꞌcĩ tiiri gẽrrẽẽt.

Nẽẽthĩ ꞌyioko, heterꞌtheekuung hatĩ naa ꞌgõõl ꞌcĩ ẽllẽẽmĩth gẽrrẽẽt.

Currently Selected:

1 Korinthia 12: did

Highlight

Copy

Compare