اِستِثنا 33
33
مُوسیٰ اِسرائیلؔ کے قبِیلوں کو برکت دیتا ہے
1اور مَردِ خُدا مُوسیٰ نے جو دُعایِ خَیر دے کر اپنی وفات سے پہلے بنی اِسرائیل کو برکت دی وہ یہ ہے۔ 2اور اُس نے کہا:-
خُداوند سِینا سے آیا
اور شعِیر سے اُن پر آشکارا ہُؤا۔
وہ کوہِ فاران سے جلوہ گر ہُؤا
اور لاکھوں قُدسِیوں میں سے آیا۔
اُس کے دہنے ہاتھ پر اُن کے لِئے آتشی شرِیعت تھی۔
3وہ بے شک قَوموں سے مُحبّت رکھتا ہے۔
اُس کے سب مُقدّس لوگ تیرے ہاتھ میں ہیں
اور وہ تیرے قدموں میں بَیٹھے۔
ایک ایک تیری باتوں سے مُستفِیض ہو گا۔
4مُوسیٰ نے ہم کو شرِیعت
اور یعقُوب کی جماعت کے لِئے مِیراث دی
5اور وہ اُس وقت یسُورُون میں بادشاہ تھا
جب قَوم کے سردار اکٹھّے
اور اِسرائیلؔ کے قبِیلے جمع ہُوئے۔
6رُوبِن جِیتا رہے اور مَر نہ جائے
تَو بھی اُس کے آدمی تھوڑے ہی ہوں۔
7اور یہُوداؔہ کے لِئے یہ ہے جو مُوسیٰ نے کہا:-
اَے خُداوند! تُو یہُوداؔہ کی سُن
اور اُسے اُس کے لوگوں کے پاس پُہنچا۔
وہ اپنے لِئے آپ اپنے ہاتھوں سے لڑا
اور تُو ہی اُس کے دُشمنوں کے مُقابلہ میں اُس کا مددگار
ہو گا۔
8اور لاوؔی کے حق میں اُس نے کہا:-
تیرے تُمِّیم اور اُورِیم اُس مَردِ خُدا کے پاس ہیں
جِسے تُو نے مسّہ پر آزما لِیا
اور جِس کے ساتھ مرِیبہ کے چشمہ پر تیرا تنازُع ہُؤا۔
9جِس نے اپنے ماں باپ کے بارے میں کہا کہ
مَیں نے اِن کو دیکھا نہیں
اور نہ اُس نے اپنے بھائیوں کو اپنا مانا
اور نہ اپنے بیٹوں کو پہچانا
کیونکہ اُنہوں نے تیرے کلام کی اِحتیاط کی
اور وہ تیرے عہد کو مانتے ہیں۔
10وہ یعقُوب کو تیرے احکام
اور اِسرائیلؔ کو تیری شرِیعت سِکھائیں گے
وہ تیرے آگے بخُور
اور تیرے مذبح پر پُوری سوختنی قُربانی رکھّیں گے۔
11اَے خُداوند! تُو اُس کے مال میں برکت دے
اور اُس کے ہاتھوں کی خِدمت کو قبُول کر۔
جو اُس کے خِلاف اُٹھیں اُن کی کمر توڑ دے
اور اُن کی کمر بھی جِن کو اُس سے عداوت ہے تاکہ وہ
پِھر نہ اُٹھیں۔
12اور بِنیمِین کے حق میں اُس نے کہا:-
خُداوند کا پیارا سلامتی کے ساتھ اُس کے پاس رہے گا۔
وہ سارے دِن اُسے ڈھانکے رہتا ہے
اور وہ اُس کے کندھوں کے بِیچ سکُونت کرتا ہے۔
13اور یُوسفؔ کے حق میں اُس نے کہا:-
اُس کی زمِین خُداوند کی طرف سے مُبارک ہو!
آسمان کی بیش قِیمت اشیا اور شبنم
اور وہ گہرا پانی جو نِیچے ہے
14اور سُورج کے پکائے ہُوئے بیش بہا پَھل
اور چاند کی اُگائی ہُوئی بیش قِیمت چِیزیں
15اور قدِیم پہاڑوں کی بیش قِیمت چِیزیں
اور ابدی پہاڑِیوں کی بیش قِیمت چِیزیں
16اور زمِین اور اُس کی معمُوری کی بیش قِیمت چِیزیں
اور اُس کی خُوشنُودی جو جھاڑی میں رہتا تھا۔
اِن سب کے اِعتبار سے یُوسفؔ کے سر پر
یعنی اُسی کے سر کے چاند پر جو اپنے بھائیوں سے جُدا
رہا برکت نازِل ہو!
17اُس کے بَیل کے پہلوٹھے کی سی اُس کی شَوکت
ہے اور اُس کے سِینگ جنگلی سانڈ کے سے
ہیں۔
اُن ہی سے وہ سب قَوموں کو بلکہ زمِین کی اِنتہا کے
لوگوں کو دھکیلے گا۔
وہ اِفرائِیم کے لاکھوں لاکھ
اور منَسّی کے ہزاروں ہزار ہیں۔
18اور زبُولُون کے بارے میں اُس نے کہا:-
اَے زبُولُون! تُو اپنے باہر جاتے وقت
اور اَے اِشکار! تُو اپنے خَیموں میں خُوش رہ۔
19وہ لوگوں کو پہاڑوں پربلائیں گے
اور وہاں صداقت کی قُربانِیاں گُذرانیں گے
کیونکہ وہ سمُندروں کے فَیض
اور ریت کے چِھپے ہُوئے خزانوں سے بہرہ ور ہوں
گے۔
20اور جد کے حق میں اُس نے کہا:-
جو کوئی جد کو بڑھائے وہ مُبارک ہو۔
وہ شیرنی کی طرح رہتا ہے
اور بازُو بلکہ سر کے چاند تک کو پھاڑ ڈالتا ہے۔
21اور اُس نے پہلے حِصّہ کو اپنے لِئے چن لِیا
کیونکہ شرع دینے والے کا بخرہ وہاں الگ کِیا ہُؤا تھا
اور اُس نے لوگوں کے سرداروں کے ساتھ آ کر
خُداوند کے اِنصاف کو
اور اُس کے احکام کو جو اِسرائیلؔ کے لِئے تھے پُورا کِیا۔
22اور دان کے حق میں اُس نے کہا:-
دان اُس شیر بَبر کا بچّہ ہے
جو بسن سے کُود کر آتا ہے۔
23اور نفتالی کے حق میں اُس نے کہا:-
اَے نفتالی! جو لُطف و کرم سے آسُودہ
اور خُداوند کی برکت سے معمُور ہے
تُو مغرِب اور جنُوب کا مالِک ہو!
24اور آشر کے حق میں اُس نے کہا:-
آشر آس اَولاد سے مالا مال ہو!
وہ اپنے بھائِیوں کا مقبُول ہو
اور اپنا پاؤں تیل میں ڈبوئے۔
25تیرے بینڈے لوہے اور پِیتل کے ہوں گے
اور جَیسے تیرے دِن وَیسی ہی تیری قُوّت ہو۔
26اَے یسُورُوؔن! خُدا کی مانِند اَور کوئی نہیں
جو تیری مدد کے لِئے آسمان پر
اور اپنے جاہ و جلال میں افلاک پر سوار ہے۔
27ابدی خُدا تیری سکُونت گاہ ہے
اور نِیچے دائِمی بازُو ہیں۔
اُس نے غنِیم کو تیرے سامنے سے نِکال دِیا
اور کہا اُن کو ہلاک کر دے
28اور اِسرائیلؔ سلامتی کے ساتھ
یعقُوب کا سوتا اکیلا۔
اناج اور مَے کے مُلک میں بسا ہُؤا ہے
بلکہ آسمان سے اُس پر اوس پڑتی رہتی ہے۔
29مُبارک ہے تُو اَے اِسرائیل!
تُو خُداوند کی بچائی ہُوئی قَوم ہے سو کَون تیری مانِند
ہے؟
وُہی تیری مدد کی سِپر
اور تیرے جاہ و جلال کی تلوار ہے۔
تیرے دُشمن تیرے مُطِیع ہوں گے
اور تُو اُن کے اُونچے مقاموں کو پامال کرے گا۔
Currently Selected:
اِستِثنا 33: URD
Highlight
Share
Copy
Want to have your highlights saved across all your devices? Sign up or sign in
Revised Urdu Holy Bible © Pakistan Bible Society, 1970, 2010.