اِستِثنا 27
27
خُدا کے حُکموں کو پتھّروں پر لِکھنا
1پِھر مُوسیٰ نے بنی اِسرائیل کے بزُرگوں کے ساتھ ہو کر لوگوں سے کہا کہ جِتنے حُکم آج کے دِن مَیں تُم کو دیتا ہُوں اُن سب کو ماننا۔ 2اور جِس دِن تُم یَردن پار ہو کر اُس مُلک میں جِسے خُداوند تیرا خُدا تُجھ کو دیتا ہے پُہنچو تو تُو بڑے بڑے پتّھر کھڑے کر کے اُن پر چُونے کی استرکاری کرنا۔ 3اور پار ہو جانے کے بعد اِس شرِیعت کی سب باتیں اُن پر لِکھنا تاکہ اُس وعدہ کے مُطابِق جو خُداوند تیرے باپ دادا کے خُدا نے تُجھ سے کِیا اُس مُلک میں جِسے خُداوند تیرا خُدا تُجھ کو دیتا ہے یعنی اُس مُلک میں جہاں دُودھ اور شہد بہتا ہے تُو پُہنچ جائے۔ 4سو تُم یَردن کے پار ہو کر اُن پتّھروں کو جِن کی بابت مَیں تُم کو آج کے دِن حُکم دیتا ہُوں کوہِ عیباؔل پر نصب کر کے اُن پر چُونے کی استرکاری کرنا۔ 5اور وہِیں تُو خُداوند اپنے خُدا کے لِئے پتّھروں کا ایک مذبح بنانا اور لوہے کا کوئی اَوزار اُن پر نہ لگانا۔ 6اور تُو خُداوند اپنے خُدا کا مذبح بے تراشے پتھّروں سے بنانا اور اُس پر خُداوند اپنے خُدا کے لِئے سوختنی قُربانِیاں گُذراننا۔ 7اور وہِیں سلامتی کی قُربانِیاں چڑھانا اور اُن کو کھانا اور خُداوند اپنے خُدا کے حضُور خُوشی منانا۔ 8اور اُن پتھّروں پر اِس شرِیعت کی سب باتیں صاف صاف لکھنا۔
9پِھر مُوسیٰ اور لاوی کاہِنوں نے سب بنی اِسرائیل سے کہا اَے اِسرائیلؔ! خاموش ہو جا اور سُن۔ تُو آج کے دِن خُداوند اپنے خُدا کی قَوم بن گیا ہے۔ 10سو تُو خُداوند اپنے خُدا کی بات سُننا اور اُس کے سب آئِین اور احکام پر جو آج کے دِن مَیں تُجھ کو دیتا ہُوں عمل کرنا۔
نافرمانی کی لَعنتیں
11اور مُوسیٰ نے اُسی دِن لوگوں سے تاکید کر کے کہا کہ 12جب تُم یَردن پار ہو جاؤ تو کوہِ گرزیم پر شمعُوؔن اور لاوی اور یہُوداؔہ اور اِشکار اور یُوسفؔ اور بِنیمِین کھڑے ہوں اور لوگوں کو برکت سُنائیں۔ 13اور رُوبِن اور جد اور آشر اور زبُولُون اور دان اور نفتالی کوہِ عیباؔل پر کھڑے ہو کر لَعنت سُنائیں۔ 14اور لاوؔی بُلند آواز سے سب اِسرائیلی آدمِیوں سے کہیں کہ
15لَعنت اُس آدمی پر جو کارِیگری کی صنعت کی طرح کھودی ہُوئی یا ڈھالی ہُوئی مُورت بنا کر جو خُداوند کے نزدِیک مکرُوہ ہے اُس کو کِسی پوشِیدہ جگہ میں نصب کرے
اور سب لوگ جواب دیں اور کہیں آمِین۔
16لَعنت اُس پر جو اپنے باپ یا ماں کو حقِیر جانے
اور سب لوگ کہیں آمِین۔
17لَعنت اُس پر جو اپنے پڑوسی کی حد کے نِشان کو
ہٹائے
اور سب لوگ کہیں آمِین۔
18لَعنت اُس پر جو اندھے کو راستہ سے گُمراہ کرے
اور سب لوگ کہیں آمِین۔
19لَعنت اُس پر جو پردیسی اور یتِیم اور بیوہ کے
مُقدّمہ کو بِگاڑے
اور سب لوگ کہیں آمِین۔
20لَعنت اُس پر جو اپنے باپ کی بِیوی سے مُباشرت
کرے کیونکہ وہ اپنے باپ کے دامن کو بے
پردہ کرتا ہے
اور سب لوگ کہیں آمِین۔
21لَعنت اُس پر جو کِسی چَوپائے کے ساتھ جماع
کرے
اور سب لوگ کہیں آمِین۔
22لَعنت اُس پر جو اپنی بہن سے مُباشرت کرے خواہ
وہ اُس کے باپ کی بیٹی ہو خواہ ماں کی
اور سب لوگ کہیں آمِین۔
23لَعنت اُس پر جو اپنی ساس سے مُباشرت کرے
اور سب لوگ کہیں آمِین۔
24لَعنت اُس پر جو اپنے ہمسایہ کو پوشِیدگی میں مارے
اور سب لوگ کہیں آمِین۔
25لَعنت اُس پر جو بے گُناہ کو قتل کرنے کے لِئے
اِنعام لے
اور سب لوگ کہیں آمِین۔
26لَعنت اُس پر جو اِس شرِیعت کی باتوں پر عمل
کرنے کے لِئے اُن پر قائِم نہ رہے
اور سب لوگ کہیں آمِین۔
Currently Selected:
اِستِثنا 27: URD
Highlight
Share
Copy
Want to have your highlights saved across all your devices? Sign up or sign in
Revised Urdu Holy Bible © Pakistan Bible Society, 1970, 2010.