Саалтыр 91
91
1Псалом. Субуотаҕа ылланар ырыа.
2Үчүгэй даҕаны Айыы Тойону айхаллыыр,
Үрдүктэн Үрдүк, Эн ааккар ырыа ыллыыр,
3сарсыарда Эн бигэ тапталгын биллэрэр,
түүнүн эмиэ Эн кырдьыккын иһитиннэрэр,
4уон устурууналаах лютнаҕа доҕуһуоллатар,
арфалаах лираҕа ырыа таһаарар!
5Үөртүҥ да Эн миигин, Айыы Тойон, сүдү дьайыыгынан;
Эн илииҥ айбытын көрөммүн, мин үөрэн ыллыыбын.
6Улуу да буоллахтара, Айыы Тойон, Эн дьайыыларыҥ,
дириҥ да буоллахтара Эн санааларыҥ!
7Кэр-дьэбэр киһи ону билиммэт,
ньүдьү-балай өйдөөбөт.
8Төһө да нэгэйдэр сыыс от курдук үүммүттэрин,
кэрээнэ суохтар чэчирээбиттэрин иһин,
кинилэр букатыннаахтык сүтэр аналлаахтар,
9оттон Эн, Айыы Тойон, үйэлэр тухары үрдүккүн.
10Эн өстөөхтөрүҥ, Айыы Тойон,
Эн өстөөхтөрүҥ имнэри эстиэхтэрэ,
куһаҕаны оҥорооччулар бары үрэллиэхтэрэ.
11Оттон миигин Эн дьиикэй оҕустуу күүһүртүҥ,
сибиэһэй елей арыытынан аҕаатыҥ.
12Илэ харахпынан мин көрдүм өһөгөйдөөхтөрүм өһөллөрүн,
эт кулгаахпынан иһиттим кырыктаах өстөөхтөрүм өлөллөрүн.
13Кырдьыктаах киһи пальма курдук силигилиир,
Ливан сыалаах маһын курдук чэчириир.
14Кини, Айыы Тойон Дьиэтигэр олордуллан,
Таҥарабыт тиэргэнигэр чэлгийэ үүнэр.
15Кырдьан да баран, кини ас биэрэ туруоҕа,
киил бэйэлээх, чэгиэн буолуоҕа;
16онтон көстүөҕэ Айыы Тойон кырдьыктааҕа,
Кини, мин очуос хайам, кыра да омсото суоҕа.
Currently Selected:
Саалтыр 91: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
