Саалтыр 89
89
IV КИНИГЭТЭ
89–105 псаломнар
1Таҥара киһитин Моисей үҥүүтэ.
Айыы Тойон, көлүөнэттэн көлүөнэҕэ Эн биһиэхэ
халыҥ хаххабыт, суон дурдабыт буоларыҥ.
2Хайалар төрүөхтэрин инниттэн,
Эн сири, аан дойдуну үөскэтиэҥ инниттэн
үйэттэн үйэлэргэ Эн – Таҥараҕын.
3«Төннүҥ, өлөр үйэлээхтэр!» – диэҥҥин,
Эн киһини сиргэ-буорга төнүннэрэҕин.
4Тыһыынча сыл Эн хараххар
бэҕэһээ ааспыт биир күн кэриэтэ,
түүҥҥү аҕыйах чаас эрэ кэриэтэ.
5Эн халаан уутунуу, дьону сотон бараҕын;
киһи түүл кэриэтэ,
сарсыарда үүнэн тахсыбыт от кэриэтэ;
6сарсыарда силигилии үүнэр, чэлгийэ көҕөрөр,
оттон киэһэ иинэ хатар, хагдарыйа өлөр.
7Эн биһиэхэ уордайдаххына, биһиги бүтэр уһукпут кэлэр,
Эн абардаххына, айманан-сайманан барабыт.
8Биһиги буруйбутун барытын Эн иннигэр ууруннуҥ,
кистэлэҥ аньыыбытын сырдыккар таһаардыҥ.
9Күммүт-дьылбыт барыта Эн уоргун сэтиилэнэн ааһар,
муҥур үйэбит өрө тыыныы кэриэтэ сүтэр.
10Олохпут кэмэ биһиэнэ – сэттэ уон сыл,
ордук тэтиэнэх буоллахпытына, аҕыс уон сыл;
ону да күммүт-дьылбыт чээрэтэ – үлэ икки сүпсүк икки,
түргэнник ааһар, биһиги өлүүнү көрсө көтөн иһэбит.
11Ким билэрий Эн уоруҥ-кылыныҥ уоҕун,
ким өйдүүрүй Эн абаҥ-сатаҥ суоһун?
12Муударай буоларбыт туһугар,
биһигини олохпут күнүн аахтара үөрэт.
13 Айыы Тойон, эргилин! Хаһааҥҥа диэри?
Аһын-харыһый кулуттаргын!
14Сарсыарда эрдэттэн дуоһут бигэ тапталгынан,
оччоҕо биһиги үрдүк өрөгөйдөнүөхпүт,
үйэбит тухары үөрэ-көтө сылдьыахпыт.
15Төһө күн Эйигиттэн дьарыллыбыппытый да,
төһө сыл эрэйи көрбүппүтүй да,
соччонон Эн биһигини үөрт-көтүт.
16Кулуттарыҥ Эн дьайыыгын көрдүннэр,
кинилэр оҕолоро Эн килбиэннээх күүскүн биллиннэр.
17Айыы Тойон Таҥарабыт үтүө сыһыана биһиэхэ тосхойдун.
Ситиһиитэ бэлэхтээ биһиги үлэбитигэр,
оҥорбуппутун барытын бөҕөргөт.
Currently Selected:
Саалтыр 89: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
