Саалтыр 58
58
1Хуор салайааччытыгар. «Өлөрүмэ» матыыбынан. Давид ырыата. Саул, кинини дьиэтин таһыгар өлөртөрөөрү, бэйэтин дьонун чуҥната ыыппытыгар.
2Өстөөхтөрбүттэн миигин өрүһүй, Айыы Таҥарам,
өрө турааччылартан көмүскээ.
3Хара дьайдаахтартан өрүһүйэн ыл,
хаанымсахтартан быыһаа.
4Көр, ол мин кылыыбын кэтэһэн, кирийэн сыталлар;
буруйум да, аньыым да иһин буолбатах, Айыы Тойон,
күүстээхтэр үрдүбэр түһэргэ бэлэмнэр.
5Буруйу оҥорбутум суоҕа да,
үрдүбэр түһээри үөмэхтэһэллэр.
Оо, туран, миэхэ көмөҕө кэл уонна көр!
6 Айыы Тойон, Аанньал сэриитин Таҥарата, Израиль Таҥарата,
уһуктан, бары норуоттары уодьуганнаа,
уодаһыннаах хара дьайдаахтартан кими да ордорума. Села
7Хас киэһэ аайы төннөн кэлэннэр,
ыт курдук улуйа-улуйалар,
куораты тула хаамаллар.
8Ыыс-бурут тыллары кулгуйаннар,
айахтарын кылыһынан сулуйаллар,
«Ким биһигини истиэҕэй?» – дии саныыллар.
9Ол эрэн, Айыы Тойон, Эн кинилэри күлүү гыныаҕыҥ,
Эн омуктары саакка-суукка ыытыаҕыҥ.
10Оо, мин күүһүм-тирэҕим! Эйигин мин кэтэһэбин,
Эн буолаҕын, Айыы Таҥара, мин кириэппэһим.
11Үтүө санаалаах Таҥарам миигин утары көрсүөҕэ,
өстөөхтөрүм өһөллөрүн Кини миэхэ көрдөрүөҕэ.
12Норуотум умнубатын туһугар, Эн кинилэри өлөртөөмө:
күдэн күүскүнэн үрэйтээн, кинилэри самнартаа,
Айыы Тойон Көмүскээччибит.
13Айахтарын аньыытын, уостарын буруйун иһин,
улахамсык санааларын угаайытыгар киирдиннэр;
кырыыһы таптыылларын, сымыйаны саҥаралларын иһин,
14уордайан, кинилэри сууһартаа,
суола суох сүтүөхтэригэр диэри, сууһартаа;
оччоҕо Иаковы Таҥара салайарын
сир уһугар тиийэ билиэхтэрэ. Села
15Хас киэһэ аайы төннөн кэлэннэр,
ыт курдук улуйа-улуйалар,
куораты тула хаамаллар.
16Ас көрдөөн салбыҥныыллар,
аччык хаалан ырдьыгыныыллар.
17Оттон мин Эн күүскүн-уоххун хоһуйуом,
сарсыарда эрдэттэн Эн бигэ тапталгын уруйдуом.
Күчүмэҕэй күммэр Эн миигин кириэппэс буолан көмүскүүрүҥ,
кыһалҕалаах күммэр миигин хахха буолан харыстыырыҥ.
18Оо, мин күүһүм-тирэҕим, айхал ыллыам Эйиэхэ.
Айыы Таҥара – мин кириэппэһим,
миигин бигэтик таптыыр Таҥарам.
Currently Selected:
Саалтыр 58: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
