Саалтыр 108
108
1Хуор салайааччытыгар. Давид псалома.
Айхаллыыр Айыы Таҥарам, саҥата суох буолума;
2Сидьиҥ тыллаах албыннар миигин үөҕэн эрэллэр,
сымыйаны мин туспунан тиһэллэр.
3Тула өттүбэр өһүөннээх саҥалара иһиллэр,
туох да төрүөтэ суох миэхэ саба түһэллэр.
4Тапталбар хатаанынан хардараллар,
оттон мин кинилэр тустарыгар үҥэбин эрэ.
5Үтүөбүн куһаҕанынан төлүүллэр,
тапталбын – өһөгөйүнэн.
6Хара дьайдааҕы туруор өстөөхпүн утары,
буруйдааччыны туруор кини уҥа өттүгэр.
7Дьүүллэстэҕинэ, буруйдаах буолан таҕыстын,
үҥэрэ кытта аньыыга аахсылыннын.
8Олоҕун күнэ-дьыла кэрэгэй буоллун;
кини солотун атын киһи ыллын.
9Оҕолоро тулаайах хааллыннар,
ойоҕо огдообо буолуохтун.
10Оҕолоро атах-балай умналыы сырыттыннар,
урусхалламмыт дьиэлэриттэн холдьоҕуллан бардыннар.
11Баардааҕын барытын иэстээх дьонугар былдьаттын,
үлэтин түмүгүн туора дьоҥҥо туура туттардын.
12Ким да киниэхэ амарахтык сыһыаннаспатын;
ким да кини тулаайахтарын аһымматын;
13кини сыдьаана барыта имнэри быһыннын,
кини аата иккис көлүөнэттэн умнулуннун.
14Аҕатын буруйа Айыы Тойон иннигэр ахтылыннын,
ийэтин аньыыта бырастыы гыныллыбатын.
15Аньыыларын Айыы Тойон өрүүтүн өйдүү сырыттын,
ааттарын сир үрдүттэн суола суох сүтэрдин.
16Үтүөнү оҥорор туһунан кини санаабатаҕа,
суоҕу-дьадаҥыны, кыраны-кыһалҕалааҕы,
самныбыт санаалааҕы өлөрөөрү сойуолуура.
17Кырыырын сөбүлүүрэ – кырыыһа бэйэтигэр түһүөхтүн;
алгыырын абааһы көрөрө – алгыс киниттэн тэйиэхтин.
18Таҥаһы кэтэрдии, кэбэҕэстик кыраан барара –
кырыыһа, уу курдук, этигэр өтөн киириэхтин,
арыы курдук, уҥуоҕар тиийэ иҥиэхтин;
19таҥна сылдьар таҥаһыныы кинини ыга ылыахтын,
куруук курданар курунуу кинини бобо тутуохтун.
20Итинник иэстэһиэҕэ Айыы Тойон мин өстөөхтөрбүттэн,
миигин утары сидьиҥник тыллаһааччылартан.
21Оттон Эн, Айыы Тойон, мин Айыы Тойонум,
Бэйэҥ аатыҥ туһугар миэхэ көмөлөс.
Эн, муҥура суох амарах тапталлаах, миигин өрүһүй.
22Мин дьадаҥыбын, кыһалҕалаахпын,
сүрэхпэр сырҕан баастаахпын.
23Киэһээҥҥи күлүк курдук, мин сүтэн эрэбин,
саранча курдук, киэр эһилинним.
24Аһаабакка, икки тобугум ибигирэс буолла,
уҥуохтаах тириим эрэ хаалла.
25Кинилэр буоллаҕына миигин күлэллэр,
көрдүлэр да, бастарын быһа илгистэллэр.
26Көмөлөс миэхэ, Айыы Тойон Таҥарам,
көмүскэллээх санааҕыттан миигин быыһаа.
27Эн илииҥ миигин өрүһүйэн ылбытын,
бу Эн оҥоһууҥ буоларын кинилэр биллиннэр.
28Кинилэр кыраатыннар, оттон Эн алҕаа.
Күөнтээбиттэрэ бэйэлэригэр саатынан-суутунан эргийдин,
оттон миэхэ, кулуккар, үөрүү тосхойдун.
29Миигин буруйдааччылар ааттара алдьаннын,
саатттара-сууттара кинилэри батыһа сырыттын.
30-31Өлөргө уурааччылартан өрүһүйээри,
кыһалҕалаах киһи уҥа өттүгэр турарын иһин,
мин Айыы Тойону дуораччы айхаллыам,
улуу түмсүү ортотугар Кинини уруйдуом.
Currently Selected:
Саалтыр 108: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
