Саалтыр 106
106
V КИНИГЭТЭ
106–150 псаломнар
1Айхаллааҥ Айыы Тойону үтүө санаалааҕын иһин;
Кини бигэ таптала – үйэлэр тухары.
2Эттиннэр бу тыллары Айыы Тойон толуйан ылан,
эрэйтэн-буруйтан өрүһүйэн,
3араас дойдуттан, илинтэн-арҕааттан,
хотуттан-соҕурууттан#106:3 Тылыттан тылыгар түһэрдэххэ: хотуттан уонна муораттан. муспут дьоно!
4Кинилэр иччитэх кураайы дуол устун,
дьонноох куораты булбакка, муна-тэнэ сылдьаллара;
5ааһан-туоран, тамахтара куура хатан,
дууһа моруута буолаллара.
6Онтон, сору көрөн, Айыы Тойону ыҥырдахтарына,
Кини эрэйтэн-муҥтан быыһаан ылара,
7дьонноох куоракка тиэрдээри,
көнө суолунан сирдиирэ.
8Айхаллаатыннар кинилэр Айыы Тойону бигэ тапталын иһин,
киһи аймахха оҥорор сөҕүмэр дьайыыларын иһин.
9Кини утаппыттар дууһаларын дуоһутар,
аччыктар дууһаларын араас үтүөнэн толорор.
10-11Сорохторо, Таҥара тылыгар бас бэриммэккэ,
Үрдүктэн Үрдүк сүбэтин ылыммакка,
ыас хараҥаҕа, өлүү күлүгэр олороллоро,
хандалыга бохсуллан, сору-муҥу көрөллөрө.
12Олор сүрэхтэрин Кини ыарахан үлэнэн сыһытара;
охтон түстэхтэринэ, ким да кинилэргэ көмөлөспөт этэ.
13Онтон, сору көрөн, Айыы Тойону ыҥырдахтарына,
Кини эрэйтэн-муҥтан кинилэри быыһаан ылара,
14халыҥ хараҥаттан, өлүү күлүгүттэн таһаарара,
хандалыларын хайыта сынньара.
15Айхаллаатыннар кинилэр Айыы Тойону бигэ тапталын иһин,
киһи аймахха оҥорор сөҕүмэр дьайыыларын иһин.
16Кини алтан ааннары алдьатар,
тимир олуурдары булгурутар.
17Сорохторо, аньыылаах суолунан барбыт өйө суохтара,
буруйу-сэмэни оҥорон муҥу-таҥы булуналлара,
18онон аһы да сүрэхтэрэ ылбат буолара,
өлүү айаҕар түһэллэрэ тирээн кэлэрэ.
19Онтон, сору көрөн, Айыы Тойону ыҥырдахтарына,
Кини эрэйтэн-муҥтан кинилэри быыһаан ылара,
20этэр тылынан үтүөрдэрэ,
өлөртөн-сүтэртэн өрүһүйэрэ.
21Айхаллаатыннар кинилэр Айыы Тойону бигэ тапталын иһин,
киһи аймахха оҥорор сөҕүмэр дьайыыларын иһин.
22Уруй-айхал сиэртибэтин Киниэхэ биэрдиннэр,
үөрүүлээх ырыанан Кини дьайыытын иһитиннэрдиннэр.
23Сорохторо, хараабылга олорон, муоранан усталлара,
күөх далай иэнигэр эргинэллэрэ.
24Кинилэр эмиэ Айыы Тойон дьайыыларын анаараллара,
муора түгэҕэр кытта Кини оҥорор дьиктилэрин араараллара.
25Кини эттэҕинэ, сата-буурҕа ытыллара,
муора долгуна өрүтэ ыһыллара.
26Оччоҕо халлааҥҥа тиийэ сыһаллара,
аллара, муора түгэҕэр, түһүөхчэ буолаллара;
алдьархайга ылларан, эр санааларын ыһыкталлара,
27итирик дьоннуу, эргичийэ, тэмтээкэйдии сылдьаллара;
муоранан устар муударастара аны туһалаабат буолара.
28Онтон, сору көрөн, Айыы Тойону ыҥырдахтарына,
Кини эрэйтэн-муҥтан быыһаан ылара;
29буурҕаны тохтотон, чуумпуну сатыылатара,
муора дохсун долгунун намыратара;
30байҕал чуумпуран, үөрүү бөҕө буолаллара –
баҕалаах тиксиилэрин Кини булларара.
31Айхаллаатыннар кинилэр Айыы Тойону бигэ тапталын иһин,
киһи аймахха оҥорор сөҕүмэр дьайыыларын иһин.
32Уруйдуур буоллуннар Кинини норуот мунньаҕар,
айхаллыыр буоллуннар аҕа баһылыктар сүбэлэригэр.
33Кини өрүстэри кураайы дуолга кубулутар,
үрэхтэри хара буорунан көрдөрөр,
34олохтоохтор нэгэй быһыыларын иһин,
өҥ сири тураҥ буор оҥорор.
35Кини тукулааны күөлгэ кубулутар,
хайа хаппыт сирдэринэн үрүйэлэри сүүрдэр;
36онно ааспыты-туорбуту олохсутар,
оччоҕо кинилэр олорор куораттарын тутталлар;
37сыһыыга бурдук ыһаллар,
виноград олордон, өлгөм үүнүүнү ылаллар.
38Кини алгыһынан сүүнэ омук буола үүнэллэр;
иитэр сүөһүлэрин Кини аймарыппат.
39Онтон, ахсааннара аҕыйаан, баттанан-үктэнэн,
сору-муҥу көрөн кутурҕаҥҥа ыллардахтарына,
40Кини кинээстэрин ааттарын-суолларын алдьатар,
суола суох кураайы дуолга хаалларан, кинилэри муннарар;
41оттон дьадаҥыны кыһалҕаттан таһаарар,
кини дьиэ кэргэнин бараан үөрүнүү үксэтэр.
42Көнө-көрсүө дьон ону көрөн үөрэллэр,
оттон хара санаалаахтар саҥата суох бараллар.
43Ким муударай өйдөөх, ол маны араҥалаан көрдүн,
Айыы Тойон бигэ тапталын анаардын.
Currently Selected:
Саалтыр 106: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
