Аман өһө 23

– 6 –

1Тойон остуолугар олорустаххына,

ким аһылыгар ыҥырыллыбыккын өйдөөн олор;

2аһас буоллаххына,

иҥсэҕин кыатана тутун.

3Кини минньигэс аһыгар-үөлүгэр ымсыырыма,

ол барыта эйигин тургутар аһылык буолуон сөп.

– 7 –

4Баайы-таланы сырсыма,

оннук санааҕын букатын хааллар.

5Биирдэ көрбүтүҥ, үбүҥ-харчыҥ көстө сүтүө,

көтөр кынат оҥостон, кыырт курдук, кыырай халлааҥҥа көтүө.

– 8 –

6Ымсыы киһиэхэ аһаама,

кини амтаннаах аһылыгар баҕарыма.

7Иһигэр эн төһөнү ыйыстыбыккын ааҕа-суоттуу олоруоҕа, кини оннук киһи.

«Кытаат, аһаа-сиэ, ис», – диэҕэ эрээри, дьиҥ санаата атын буолуоҕа.

8Аһаабыт аһыҥ сыыһын өҕүйэн таһаарыаҕыҥ,

үтүө тылгын-өскүн кураанахха барыаҕыҥ.

– 9 –

9Акаарыга тугу да этимэ,

кини эн өйдөөх тылгын-өскүн хоҥоруутугар да хоҥноруо суоҕа.

– 10 –

10Сириҥ-уотуҥ былыргы быыһын сыҕарытыма,

тулаайахтар сыһыыларын былдьаһыма:

11кинилэр күүстээх Араҥаччылаахтар –

Айыы Тойон, кинилэри көмүскээн, эйигин утары туруоҕа.

– 11 –

12Үөрэнэр үөрэххин болҕойон иһит,

өйгүн-санааҕын ууран билиигэ-көрүүгэ дьулус.

– 12 –

13Уолгун дьарыйартан куттаныма –

талаҕынан таһыллыбытыттан өлүө суоҕа.

14Иэнин чыпчаххайдаан биэрдэххинэ,

оҕоҕун өлүүттэн өрүһүйүөҕүҥ.

– 13 –

15Уолум, эн муударай киһи буоллаххына,

мин сүрэҕим төһөлөөх үөрүөҕэй?

16Эн сиэрдээх тылгын-өскүн иһиттэхпинэ,

мин эйигинэн ис сүрэхпиттэн киэн тутта саныаҕым.

– 14 –

17Аньыылаахтарга баҕарыма;

олоҕуҥ тухары Айыы ТойонУ ытыктаа,

18оччоҕо кэлэр кэскилиҥ киэҥ,

инникигэ эрэлиҥ бигэ буолуоҕа.

– 15 –

19Уолум, миигин иһит! Муударай буоларга дьулус,

сөптөөх үтүө суолу тутус.

20Арыгыһыттардыын алтыһыма,

моҕустардыын булсума.

21Арыгыһыт, аһас дьон быста дьадайыахтара,

утуйары үлэлээччилэр нэк таҥастаныахтара.

– 16 –

22Аҕаҥ ытык тылын быһа гыныма, кини эйигин төрөппүтэ;

ийэҕин, төһө да бүдүгүрэ кырдьыбытын иһин, сэнээмэ.

23Туохтааҕар да эн дьиҥ кырдьыгы буларга дьулус,

муудараһы, үөрэҕи быраҕыма, чэгиэн өйгүн-санааҕын саймаардыма.

24Үтүө киһи аҕата үөрүү үрдүгүн билиэҕэ,

муударай киһи төрөппүтэ оҕотунан киэн туттуоҕа.

25Онон төрөппүттэриҥ санааларын көнньүөрт,

ийэҕин өрүү үөрдэ-көтүтэ сырыт.

– 17 –

26Уолум эрэ буолларгын, үөрэтэн этэрбин өйдөөн иһит,

мин суолбуттан хараххын араарыма – олук үктэһэн ис.

27Содур дьахтар – дириҥ оҥкучах,

туора киһи ойоҕо – кыараҕас холуодьас;

28Киһимсэх дьахтар тоһуурга бүгэн олорор ороспуой кэриэтэ;

кини аньыыны-буруйу оҥорор эр дьон ахсаанын үксэтэр.

– 18 –

29Ким дьиэтиттэн энэлгэн, ынчык иһиллэрий?

Ким иирсэрий-этиһэрий, ким суланарый?

Ким туох да төрүөтэ суох сирэйэ-хараҕа көҕөрөн сылдьарый?

Ким икки хараҕын кып-кыһылынан дьолточчу көрбүтүй?

30Ити барыта кинилэр, хойукка диэри арыгылыы олорооччулар,

минньитиллибит арыгыны батыһан иһээччилэр буолбатах дуо?

31Көрүмэ арыгы хайдах кытаран-наҕаран турарын,

иһиккэ кутуллан күлүмнүү оонньуурун,

куолайгар минньигэс бэйэлээхтик эйэргээн киирэрин!

32Кэлин кини эйигин эриэн үөннүү тигиэҕэ,

моҕой кыыллыы ытырыаҕа;

33оччоҕо хараххын эрдээх дьахталларга хатыаҕыҥ#23:33 …оччоҕо хараххын эрдээх дьахталларга хатыаҕыҥ – Эбэтэр, оччоҕо эҥин-эгэлгэ дьиктини-дьиибэни көрүөҕүҥ.,

тосту-туора суолга сананыаҕыҥ.

34Эн киэҥ байҕал үөһүгэр утуйа сытар,

хараабыл маастатыгар тахсан сытар киһи курдук буолуоҕуҥ.

35«Миигин охсубуттара да, ыалдьыбатаҕа, – диэҕиҥ#23:35 …диэҕиҥ… – Бу былыргы гректии тылбааска баар тыл кинигэ еврей тылынан суруллубут дьиҥнээх тиэкиһигэр суох.:

кырбаабыттара да, билбэтэҕим.

Утуйан турдум да, Онтон эмиэ

утахтанар арыгыбын көрдөнө барыаҕым».

Currently Selected:

Аман өһө 23: СБК

Highlight

Copy

Want to have your highlights saved across all your devices? Sign up or sign in

Learn More About Сибэтиэй Биибилийэ кинигэлэрэ