Аман өһө 16
16
1Тугу оҥоруохтааххын торумнанаҕын эрээри,
түмүк тылы Айыы Тойон этэр#16:1 Тугу оҥоруохтааххын торумнанаҕын эрээри, түмүк тылы Айыы Тойон этэр – Эбэтэр, Тугу этиэхтээххин торумнанаҕын эрээри, Айыы Тойон биэрбитин эрэ этэҕин..
2Төһө да суолуҥ-ииһиҥ эҥкилэ суох курдугун иһин,
куккун-сүргүн Айыы Тойон тургутан көрөр.
3Дьыалаҕын-куолугун Айыы Тойоҥҥо туттар,
оччоҕо туруорбут соруккун ситиэҕиҥ.
4 Айыы Тойон тугу барытын соруктаах айбыт,
бэл хара дьайдаахтары кытта алдьархай күнүгэр анаабыт.
5Киэбиримсиктэн Айыы Тойон сиргэнэр;
саараама даҕаны, кини накаастабылтан куотуо суоҕа.
6Аһыныгас буол, кырдьыгы тутус, оччоҕо буруйгун боруостаныаҥ;
Айыы Тойонтон толун, оччоҕо хара дьайтан харыстаныаҥ.
7 Айыы Тойон сөптөөх суолунан иһэр диэбит киһитин
өстөөхтөрүн да кытта иллэһиннэриэҕэ.
8Албыннаан-түөкэйдээн байыахтааҕар,
дьадаҥытык да буоллар, кырдьыгынан сылдьыбыт ордук.
9Барыахтаах суолгун барҕалыыгын эрээри,
хардыыгын Айыы Тойон салайар.
10Ыраахтааҕы төлкөлөөх тылы түстүүр,
кини ыйааҕа сыысхала суох.
11Сөпкө көрдөрөр ыйааһын – Айыы Тойон ирдэбилэ,
мөһөөччүктээх киирэ эмиэ – Кини оҥоһуга.
12Бүрүстүөлү кырдьык туругурдар,
ол иһин ыраахтааҕылар кири-дьайы тулуйбаттар.
13Ыраахтааҕы кырдьыгы истиэн баҕарар,
онон көнө дьону сөбүлүүр.
14Уордайбыт ыраахтааҕы өлөртөрүөн да сөп,
ол эрээри муударай киһи кинини уоскутуоҕа.
15Ыраахтааҕы үөрбүт хараҕа олоҕу эрэннэрэр;
кини үтүө сыһыана сааскы быйаҥнаах ардах кэриэтэ.
16Кыһыл көмүһү мунньуохтааҕар билиини муспут ордук;
үрүҥ көмүһү көрдүөхтээҕэр өйдөөх буоларга дьулуспут ордук.
17Үтүө киһи кири-дьайы тумнан барар;
ким суолун-ииһин харыстанар, ол өлөртөн быыһанар.
18Үрдүктүк санаммыт үгдэрийэр,
үтүөмсүк бүдүрүйэр.
19Баламаттары кытта былдьаммыт баайы үллэстиэхтээҕэр,
дьадаҥылары кытта көрсүөтүк олорбут ордук.
20Үөрэнэр үөрэххин болҕой#16:20 Үөрэнэр үөрэххин болҕой – Эбэтэр, Оҥорор дьыалаҕын өйдөөхтүк оҥор. – ситиһиилээх буолуоҥ;
Айыы Тойоҥҥо эрэн – дьоллоох буолуоҥ.
21Ким муударай сүрэхтээх, ол үтүө өйдөөх дэтиэҕэ,
ким эйэҕэс тыллаах, ол итэҕэтиэҕэ.
22Өйдөөх киһиэхэ өйө – өлбөт мэҥэ уута,
оттон ньүдьү-балай накаастабыла – кини акаарыта.
23Оттомноох киһи тыла-өһө ыйааһыннаах,
онон кини этэрэ итэҕэтиилээх.
24Үтүө тыл мүөт кэриэтэ:
дууһаҕын үөрдэр, эккин-хааҥҥын үтүөрдэр.
25Сорох суол, көрдөххө, көнө курдук эрээри,
тиһэҕэр өлүүгэ тиэрдэр.
26Үлэһит айаҕар сыралаһар,
аччыктыыр кыһалҕа кинини кыһайар.
27Куһаҕан куһаҕаҥҥа тиллэр,
айаҕын атыа кэрэх – уотунан тибэр.
28Уодаһыннаах киһи дьону охсуһуннарар,
хобуоччу эмиэ доҕордуулары өстөһүннэрэр.
29Хара санаалаахтар дьону сатарыталлар,
хараҥа-халтараан суолга анньаллар.
30Оҕуруктаары оҥостооччу хараҕын быһыччы көрөр,
куһаҕаҥҥа сананааччы уоһун хаанньатар.
31Маҥан баттах – килбиэннээх мэнньиэс,
дьоһуннаах олох түмүгэ.
32Тулуурдаах киһи бухатыырдааҕар ордук,
ким бэйэтин кыатанар, ол куораты ылар сэрииһиттээҕэр күүстээх.
33Түөрэх кэбиһэллэр эрээри,
барытын Айыы Тойон быһаарар.
Currently Selected:
Аман өһө 16: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
