Аман өһө 17
17
1Иирээннээх дьиэҕэ малааһынныах кэриэтэ
иллээх дьиэҕэ хаппыт килиэп хаҕын сии олорбут ордук.
2Өйдөөх кулут тойонун улдьаа уолун салайыаҕа,
ини-биилэр үптэрин үллэстиэҕэ.
3Үрүҥ көмүһү – тиигэл, кыһыл көмүһү – кыһа,
оттон киһи сүрэҕин Айыы Тойон тургутар.
4Хара санаалаах хобу-сиби иһиллиир,
сымыйаччы оҕуруктаах тылы-өһү сэргиир.
5Ким дьадаҥыны үөҕэр, ол кинини Айбыты үөҕэр;
ким куһаҕантан үөрэр, ол иэстэбилтэн куотуо суоҕа.
6Кырдьаҕастар сиэннэринэн,
уолаттар аҕаларынан киэн тутталлар.
7Акаары дьоһумсуйан саҥарара,
ытык киһи сымыйалыыра – барыта олуона.
8Бэрик биэрээччи хараҕар бэлэҕэ аптаах таас кэриэтэ:
хайа да диэки хайыһыннардын, барыта табыллар.
9Ким тапталга дьулуһар, ол хоргуппутун умнар,
ким хоһох хостоһор, ол доҕоруттан матар.
10Өйдөөҕү биирдэ сэмэлиэҥ кэрэх – көннөрүнүө,
оттон акаарыны сүүстэ да таһыйан өйдөппөккүн.
11Хара санаалаах хабырыйсар эрэ баҕалаах,
онон киниэхэ хабыр утарсааччы ыытыллыаҕа.
12Оройунан оонньообут хоҥ мэйиини көрсүөхтээҕэр,
оҕолоруттан маппыт тыһы эһэни көрсүбүт ордук.
13Үтүөнү мөкүнэн төлүүр киһи дьиэтиттэн
куһаҕан араҕан биэриэ суоҕа.
14Иирээн быһыт тоҕо барарын кэриэтэ,
онон кыыһырсыыны саҥатына саба баттаа.
15Хара дьайдааҕы быыһаан ылыы, буруйа суоҕу буруйдааһын –
хайата да Айыы Тойон хараҕар сидьиҥ быһыы.
16Акаары, харчыланан да, абыраммат:
кини муудараска уһуллар өйө суох.
17Доҕоруҥ эйигин мэлдьи таптыыр,
сурдьуҥ эмиэ ыарахан кэмҥэр кыһалҕаҕын үллэстэр.
18Акаары илиитин биэрэ охсорго тиэтэйэр,
атыттар иэстэрин төлүөх буолан эрэннэрэр.
19Ким аньыыны таптыыр, ол араллааны таптыыр;
ким үрдүктүк туттар, ол охторун оҥостор#17:19 Ким аньыыны таптыыр, ол араллааны таптыыр; ким үрдүктүк туттар, ол охторун оҥостор – Эбэтэр, Ким араллааны таптыыр, ол аньыыны таптыыр; ким олбуорун үрдүк гына туттар, ол охторун оҥостор..
20Уодаһыннаах киһи үтүөнү көрүө суоҕа,
албын-түөкэй эмиэ иэдээҥҥэ түбэһиэҕэ.
21Акаарыны төрөппүт – кыһалҕаны төрөппүт:
акаары аҕата үөрүүнү билбэт.
22Сүрэх үөрүүтэ эмтиир,
санаа түһүүтэ кэрбиир.
23Куһаҕан киһи көнө дьүүлү токурутаары
хоонньуттан бэриги таһаарар.
24Өйдөөх хараҕа – муударас үөрэҕэр,
акаары хараҕа – сир түөрт өттүгэр.
25Акаары уолтан аҕата абарар,
ийэтэ ыар санааҕа ылларар.
26Буруйа суоҕу төлөтүү, көнө киһини кырдьыгын иһин сынньыы –
барыта сиэргэ баппат түктэри быһыы.
27Билиилээх киһи тылыгар-өһүгэр сэрэхтээх;
ким өйдөөх, ол киэҥ көҕүстээх.
28Акаары да, саҥарбатаҕына, муударай курдук көстүөҕэ,
айаҕын аппатаҕына, өйдөөх киһи дэтиэҕэ.
Currently Selected:
Аман өһө 17: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
