Аман өһө 10
10
Соломуон ыраахтааҕы ох тыллара
1Соломуон ох тыллара:
Муударай уол аҕатын дьоллуур,
акаары уол ийэтин сордуур.
2Албыннаан булуммут баайыҥ абырыа суоҕа,
оттон көнө быһыыҥ өлөртөн өрүһүйүөҕэ.
3 Айыы Тойон үтүө киһини аччыктатыа суоҕа,
оттон хара санаалааҕы, төһө да ымсыырдын, киэр анньыаҕа.
4Көлөөк үлэһит дьадайар,
туруу үлэһит байар-тайар.
5Өйдөөх уол сайынын сонуокка бурдук быһар,
оттон үлэ үгэнигэр утуйа сытааччы саакка барар.
6Кырдьыксыт бар дьон алгыһын ылыаҕа.
Үөннээх киһи түөкэй – үктэтэн этэрин биллэриэ суоҕа.
7Айыы санаалаахтар алгыһы кытта ахтылла туруохтара,
оттон хара дьайдаахтар ааттыын-суоллуун умнуллуохтара.
8Ким муударай сүрэхтээх, ол үтүө сүбэни ылынар,
оттон акаары лахсыыра алдьархайы тардар.
9Көнө суолу тутуһааччы холкутук сылдьыаҕа,
оттон буруйан барааччы буруйданыаҕа.
10Ким хараҕынан имнэнэр, ол дьону өһүргэтэр,
ким кураанаҕы эрдэр, ол иэдээҥҥэ түбэһэр#10:10 …ким кураанаҕы эрдэр, ол иэдээҥҥэ түбэһэр – Былыргы гректии тылбааска, Септуагинтаҕа, оттон ким көнөтүк сэмэлиир, ол эйэни тэрийэр..
11Үтүө киһи тыла-өһө – өлбөт мэҥэ уута.
Үөннээх киһи түөкэй – үктэтэн этэрин биллэриэ суоҕа.
12Абааһы көрсүүттэн айдаан тахсар,
оттон таптал атаҕастабылы бырастыы гынар.
13Өйдөөх киһи тыла-өһө оттомноох,
оттон акаары таһылларын оҥостор.
14Муударай киһи билиитин хаҥатар,
акаары тыла алдьархайы ааҥнатар.
15Баай киһиэхэ үбэ-аһа – бөҕө кириэппэһэ,
оттон дьадаҥы сир-халлаан икки ардыгар хаалар.
16Үтүө киһи үлэтэ-хамнаһа – олох туһугар,
куһаҕан киһи барыһа – аньыы туһугар.
17Сиэрдээх сүбэни тутуһуу – бу баар олох эркээйилээх суола;
сэмэни-суҥханы аахайбат киһи муна-тэнэ сылдьыаҕа.
18Абааһы көрөрүн кистэнээччи ньуолбардык кэпсэтэр,
хобу-сиби тарҕатааччы ааргытын биллэрэр.
19Элбэх тыл аньыыта суох буолбат,
өйдөөх киһи тылын кыатана туттар.
20Үтүө киһи тыла-өһө – ыраас үрүҥ көмүс,
оттон көлдьүн өйө-санаата – көҥдөй сүпсүк.
21Үтүө киһи тыла үгүстэри өрүһүйүөҕэ,
оттон акаары өйө тиийбэккэ өлүөҕэ.
22 Айыы Тойон алгыһа киһини байытар
уонна кинини тугунан да санаарҕаппат.
23Акаары куһаҕаны оҥорон саатыыр,
оттон өйдөөх киһи муудараһы таптыыр.
24Куһаҕан киһини куттанар суола буулуоҕа,
оттон үтүө киһи баҕата туолуоҕа.
25Күүстээх силлиэ түһүө да, сидьиҥнэри имири сотуоҕа,
оттон кырдьыксыт үйэ-саас тухары тулхадыйыа суоҕа.
26Сүрэҕэ суоҕу соруйуоҥ –
уксуус тиискин сииринии,
буруо хараххын аһытарыныы, сордонуоҥ.
27 Айыы Тойоҥҥо ытыктабыл олоҕу уһатар,
оттон хара дьайдаахтар күннэрэ-дьыллара ааҕыллан турар.
28Үтүө киһи эрэлэ үөрдүөҕэ,
мөкү киһи эрэлэ өһүөҕэ.
29 Айыы Тойон ыраас дууһалаахтары араҥаччылыыр,
оттон хара дьайдаахтары имири эһэр.
30Кырдьыксыт хаһан да халбаҥныа суоҕа,
оттон куһаҕан дьон сир үрдүгэр уһуохтара суоҕа.
31Үтүө киһи уоһуттан муударас аллар,
оттон быдьар тыллаах тыла быһыллыа.
32Үтүө киһи күттүөннээҕи булан этэр,
оттон куһаҕан куһаҕаны эрэ билэр.
Currently Selected:
Аман өһө 10: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
