Potdohbu 20

Dan Thusom

(Danb 5:1-21)

1Chuin Pathen'in hiche thuho jouse aseijin, hitin ati.

2Keima Egypt gama kon le nasohchana in'a kona napui dohpa Pakai na-Pathen chu kahi.

3Keima angsunga nangman Pathen dangho nanei louding ahi.

4 # Pot 34:17; Thmpu 19:4; 26:1; Danb 4:15-18; 27:15. Nangman imacha alim semthu, van chunga um hihen, lei noija um hihen, leinoi'a twisunga um hijongleh akibahpi imalim nasemthu louding ahi: 5#Pot 34:6-7; Minb 14:18; Danb 7:9-10. Nangma hicheho masanga chu nakun louding, jen jong najen louding ahi: ajehchu Pakai na-Pathen keima hi thangthip Pathen kahin, keima eithet bola pate khansetna chu khangthum akhangli chan geija chate chunga phulajia; 6Chule eingailua chule kadan thupeh nit ho sang tamtah chunga hepina musah-a chu kahi.

7 # Thmpu 19:12. Nangman Pakai na-Pathen min chu mohseh-a napat louding ahi; ajehchu mohseh-a amin pana chu Pakaiyin themona beija alha louding ahi.

8 # Pot 16:23-30; 31:12-14. Cholngah nikho thengtah-a nitding ahi geldoh jingin. 9#Pot 23:12; 31:15; 34:21; 35:2; Thmpu 23:3. Nigup sung na natoh-a, natoh ding jouse natoh chaiding ahi: 10Amavang nisagi nichu Pakai na-Pathen cholngah ni ahi: hiche nikho chule na kiti natoh louding, nangma nahin, nachapa ahin, nachanu ahin, nasohpa ahin, nasohnu ahin, nagancha hon ahin, chule nakotpi sunga um namaljin ho ahiuva jong atoh louhel dingu ahi. 11#Semt 2:1-3; Pot 31:17. Ajehchu nigup sunga Pakaiyin van le leiset, twikhanglen, chuleh asunga um jouse chu asema, nisagi ni kicholdo ahi. Hijeh-a chu Pakaiyin choldo nichu phatthei aboh-a asuhtheng ahi.

12 # Danb 27:16; Matt 15:4; 19:19; Mrk 7:10; 10:19; Luk 18:20; Eph 6:2,3. Pakai na-Pathen'in nangma napehna leichunga nahinkho asot theina dingin: nanu napa jabolin.

13 # Semt 9:6; Thmpu 24:17; Matt 5:21; 19:18; Mrk 10:19; Luk 18:20; Rom 13:9; Jac 2:11. Tol natha louding ahi.

14 # Thmpu 20:10; Matt 5:27; 19:18; Mrk 10:19; Luk 18:20; Rom 13:9; Jac 2:11. Na jon louding ahi.

15 # Thmpu 19:11; Matt 19:18; Mrk 10:19; Luk 18:20; Rom 13:9. Na guchat louding ahi.

16 # Thmpu 19:11; Matt 19:18; Mrk 10:19; Luk 18:20. Naheng nakom douna-a jouthu-a hettohsah-a napan louding ahi.

17 # Rom 7:7; 13:9. Nangman naheng nakom in nathangset louding, naheng nakom inneipi jong nathangset louding, asohpa ahin, asohnu ahin, abongchal ahin, asangan hijongle, naheng nakom thil kiti tapou chu nathangset louding ahi.

Mipi Kichat

(Danb 5:22-33)

18 # Heb 12:18-19. Chuin mipi jouse chun van ginho, kolphet ho, sumkon gin, chule molsang meikhut chu amuvin ahi. Chuin mipi chun hichu amuphatnun, akichonun, gamlatah-a ading taove. 19Chuin amahon Mosi henga, Nangman kahenguva thu seijin, keihon ngainao vinge: Ahin Pathen'in vang kahenguva thu seidahen, ajole kathilo dingu ahi, atiuve. 20Chuin Mosi'n mipi ho henga, Kicha hih-un: ajehchu ama kichatna chu namasang uva auma, nachonset louna dinguva, nangho patep dinga Pathen chu hunga ahibouve, ati. 21Chuin mipi chu gamlatah-a adingun; Mosi'n Pathen umna muthim satah lamchu anailutnin ahi.

Maicham Chungchanga Danthu

22Chuin Pakaiyin Mosi henga, Hitia hi Israel chate henga naseiding ahi, Nanghon van'a kona nangho kahoupiu chu namu taove. 23Nanghon kakoma dangka pathenho nasem loudingu, chule nangho dinga jong sana pathenho nasem lou dingu ahi. 24Keima dinga leisetna maicham khat nasem uva, chule hiche chunga chu nagovam thiltohou, nachamna thiltohou, chule nakelngoi hou le nabongchal hou nato dingu ahi. Kamin kigeldohna dinga kalhen namun jouse-a chu naheng uva kahunga, phatthei kaboh ding nahiuve. 25#Danb 27:5-7; Josh 8:31. Chule nangman keima song maicham neisem peh-a ahile, song kikhenga nasem louding ahi: ajehchu nangman hiche chunga chu namanchah chu nalapma ahile, hichu nasuhboh ahitai. 26Na sagohkeo chu akimulouna dinga, ka-maicham'a kalbia chu nakal lou ding ahi.

Currently Selected:

Potdohbu 20: THADBSI

Highlight

Copy

Compare