2 Samuel THUMAKAI
THUMAKAI
LEKHABU AHIDAN: Samuel lekhabu nina hi lekhabu masa banjom chu ahi. Lekhabu masa hin David leng khat ahina-a avaihomna khang thusim aseijin, amasa-a lhanglam sang Judah gamsunga lengvai ahinpoh-a (Bung 1-4) chujouva nam pumpi sahlamsang Israel gam pumpi chan geija vai ahinpoh thu akimun ahi. David'in alenggam suhhatna dingle kehletna aumna dinga namchom chomho toh kidouna aneija pamlama nam hattah hotoh akidouna thusim jong kicheh tah-in akimun ahi. Samuel lekhabu nina hin lekhabu khatna-a athusim kisei banna chun apanin ahi. Hiche lekhabu hin David agaljona hinkhole alosam jina thusim, Pathen to akiloikhomna hin ahinkhole alenggam asemtupdan ho akimun ahi.
LEKHABU SUNGA THUGILHO: Samuel nina akisutna ajeh aumin ahi. Samuel lekhabu nina hin Israel leng masapen thusimin aban jommin ahi. Samuel lekhabu khatna hi Saul lengpa thina thusimin akichaijin, lekhabu nina hin David leng ahung chan khangin apannin, hiche hin 1010-970 BC khangsung hi ahopmin ahi. Amasan David hi Judah lenga iti hungpandoh ham tithu ahilin, chubana Israel gam pumpi-a ahung lengchana agalbolna ho jouse-a apachan dan, Pathen panpi achanjing dan akimun ahi. Ahinla Bethsheba to chonsetna ahin neina-a kona ahinkho hung gentheidan le chuche jeh-a ahung lengvaija, chonsetna jeh-a akisih-a Pathen'in amanchah kitna ho akimun ahi. Samuel lekhabu nina hi agildan akimun, hiche lekhabu hi Pathen le David kitepna lekhabun akihei (7:16). Pathen'in David chilhah-a kona leng chang theiding khat pengjing dingin ana thutepme. Hiche thutep hin Israelte dinga Messiah hung pending kinepna lentah anapen ahi. Hitabang thutep giltah achan laihin avelvelin David hin boina ho atoh-in, chule Jerusalem hi amelmate-a kona bulu ahijinge (2 Leng. 25:7). Pathen'in David athutepna hi aguilhung jouna dem tin alungkham jingun ahi. Hiche thudola hin khang nunung lamin Israelte themgao phabepmin David chilhah-a kona lengthah khat hungpen ding dan hi gaothun anaseijun ahi (Jer. 38:15; Dan.9:25). Samuel nina hi hetthei tah-in hopnin akihom theije: David alolhinna chule agentheina hi ahin, chule ama hinkho thusim dangjong ahopmin ahi.
AKISUT PHAT: Hiche lekhabu hi 930 BC laija kisunna hidin ginchat ahi.
ASUNGA THU UMHO
Judah chunga David Lengvaipoh (1:1-4:12)
Israel pumpi chunga David lengvaipoh (5:1-24:25)
Kum masalam thusim (5:1-10:19)
David le Bethsheba (11:1-12:25)
Boina le hahsatna (12:26-20:26)
Kum nunung lam thusim (21:1-24:25)
Currently Selected:
2 Samuel THUMAKAI: THADBSI
Highlight
Copy
Compare
Share
Want to have your highlights saved across all your devices? Sign up or sign in
Thadou Kuki CL (Re-edited) Bible - Pathen Thutheng BU
Copyright © 2015 by The Bible Society of India
Used by permission. All rights reserved worldwide.