1 Samuel 23

David'in Keilah Khopi Ahuhdoh

1Chujouvin amahon David jah-a, Ven Philistine ten Keilah asatnun, changphol ho achomun ahi, atiuve. 2Hijeh chun David'in Pakai adongin, Kache-a Philistine te khu kagasat dingham? ati. Chuin Pakaiyin David jah-a, Chen, Philistine te gasatnin lang, Keilah gahuhdoh-in, ati.

3Chuin David loihon ajah-a, Ven, hikom Judah gama bon kikicha-a, Keilah'a ihunguva, Philistine galsat miho igadou diuchu iti kichat umjocheh ding hitam? atiuve. 4Hichun David'in Pakai adong kitnin ahi. Chuin Pakaiyin adonbutnin, Kipatdoh-in lang Keilah'a chesuh-in; ajehchu Philistine te chu nakhutna kapehdoh ding ahi, ati. 5Hitichun David le aloite Keilah-a acheuvin, Philistine te chutoh akisatnun, agancha hou ahin pui mangun, amaho chu nasatah-in athatnun ahi. Hitichun David'in Keilah miho chu ahuhdoh tan ahi.

6Chuin ahitin ahi, Ahimelech chapa Abiathar chu David henga Keilah lama ajam phatnin, aman akhutna thempu sangkhol khat ahinchoijin ahi.

7Chuin David Keilah'a ahungchu Saul henga aseipeh taovin ahi. Chuin Saul'in, Pathen'in ama kakhutna eipehdoh ahitai; ajehchu khopi kulkotpi le kotjol nei alutna chu, ama kikam khum ahitai, ati. 8Chuin Saul'in mijouse chu galsat ding, Keilah'a chesuh-a David le aloite umchah din akoukhom tan ahi.

9Chule David'in guhthima Saul'in ama chunga doha abolchu ahen; Abiathar thempu henga chun, Thempu sangkhol chu hinchoi jin, ati. 10Hichun David'in, Vo Pakai Israel Pathen, keijeh-a Keilah khopi suse dingin Saul ahung suh-e ti kichentah in kajatai. 11Keilah mihon akhutna eipehdoh diu ham? nasoh-in kajah banga hi Saul hungsuh ding ham? Vo Pakai Israel Pathen, katao ahi, nasoh hi neihet sah-in, ati. Chuin Pakaiyin, Hungsuh ding ahi, ati.

12Hichun David'in, Keilah miten keima le kamitehi Saul khutna eipeh doh dingu ham? ati. Chuin Pakaiyin, Amahon napehdoh dingu ahi, ati.

13Chuphatnin David le aloiho mi jagup tobang chu akipatnun, Keilah chu adalhaovin, achetheinao lamcheh-a achetauve. Chuin David chu Keilah'a konin ajamdoh tai tichu Saul aseipeh taovin; chule aman amaho kondoh dingchu ajahda tan ahi.

David Gamthipma Aum

14Chuin David chu gamthipma mundet tah khatna aumin, Ziph gamthip lhang khatna aumden tan ahi. Chule Saul'in aniseh-in aholin, ahivangin Pathen'in akhutna apedoh pon ahi. 15Chuin Saul chu ama that dingin ahung kondoh-e ti chu David'in amutan: chule David chu Ziph gamthip gammanga uma ahi. 16Chuin Saul chapa Jonathan akipatnin, David umna gammanga chun achen, Pathen'a akhut tha agahatsah-in ahi. 17Chuin aman ajah-a, Kicha hih-in: ajehchu kapa Saul khutnin namaidoh louhel ding ahi; nangma Israel chunga leng changding nahin, keima nabantah-a kahi ding ahi; chule hichu kapa Saul'in ahet ahi, ati. 18#1 Sam 18:3. Chuin amanin Pakai angsunga kitepna aneilhonin ahi: chuin David gammanga aumin, Jonathan chu a-in'a achetai.

19 # Labu 57 (Thupi); Labu 142 (Thupi). Chujouvin Ziph miho chu Gibeah mun'a Saul henga ahungun, ajah-a, Jeshimon lhanglama um Hachelah lhang gammang lah mun dettah khatna David chu keiho toh kisela hilouham? 20Hijeh chun, vo lengpa, nalungin hungsuh ding anangaichat dungjuijin hungsuhtan; chule keiho mopohna chu lengpa khutna pehdoh dingchu hiding ahi, atiuve.

21Chuin Saul'in, Nangho Pakaiya phattheiboh chang hiuvin; ajehchu nanghon keima neilainat piuvin ahi. 22Cheovin, naheng uva katao ahi, gakhol toh-un, hilai mun'a chu kon amu ham akiselna mun gaveovin lang gahetoh-un; ajehchu ama doha thuhtah ahi ti eikisei peh-e. 23Hijeh chun akiselguhna mun jouse chu gahetoh-un, chule adihchet chu nahet tengule kahenga hung kitnun, chutengle keima nangho toh kalhon ding ahi. Chule hung hitiding ahi, ama gamsunga um ahi pouva ahile, Judah mi asang asang lah-a chu kaholdoh ding ahi, ati.

24Chuin amaho akipat doh-un, Saul angsunga konin Ziph gama ache taovin ahi: ahin David le aloiho chu Jeshimon lhanglam phaichama um Maon gamthipma aumuvin ahi. 25Saul le amite jong ama holin acheuvin ahi. Chuin amahon David aseipeh-un: hijeh chun ama songpi khat sunga ahung lutnin, Maon gamthipma aumtan ahi. Saul'in hichu ajah phatnin, David chu Maon gamthipma ahin nungdel tan ahi. 26Chuin Saul molpang hilam sanga achen, David le aloiho molpang khulam sanga acheuvin; chule David'in Saul ginna jammang loiding agon ahi: ajehchu Saul le aloihon David le amite chu matdinga a-umkolu ahitai. 27Ahinla Saul henga thupole khat ahungin, ajah-a, Kinonlang hungin; ajehchu Philistine ten gamsunga gal ahinbol taove, tin ahungseijin ahi. 28Hijeh chun David nung adelna-a konin Saul akinunglen, Philistine te satdin achetai. Hijeh chun hiche mun chu Sela-hammah-lekoth #23:28: Sela-hammah-lekoth: Hoidohna songpi. asah taovin ahi. 29Chuin David chua konchun achetouvin, Engedi mun dettah sunga achengtai.

Currently Selected:

1 Samuel 23: THADBSI

Highlight

Copy

Compare