METHIU 3
3
Aklup John vaa Akthra Trongraan
(Mak 1:1–8; Luk 3:1–18; Jon 1:19–28)
1 #
Mak 1:3–8; Luk 3:2–17; Jon 1:6–8,19–28 Mahlai achunna aklup John in Judia vaa raprilla akthra trongta araan, 2#Met 4:17; Mak 1:15“Nanril thlengve, alamva ringram kurung huunnakha innaisa.” 3Mah i ringraan Isaiah in asonmii khasa, mah chuvah nga tloh a ason,
“Raprilla an ong houkhava:
“Akpu turel lam machaangve,
“amah alam mathluunve.”
4Ipek John in amah anaamma savun khapat inraak, uuksa amul puunrei asilh: che amah in raprilna khuuining leh khaota asaak. 5Cheva Jerusalem leh Judia apumtena che Jordon aveelna mii annaam in amahkuunga thlengsei, 6Che anmah anlehta phoonga Jordon avaa a amah in alupei.
7 #
Met 12:34; 23:33; 1 Thes 1:10 Chuta Pharisi leh Sadukiis jikcha in inlupnaturel amah kuungah anthlengta aloumuh ei, alousonei, “Nannih muruul vaa atute eio! Akthlengsam trihkhop malunghaang khannata nantlaannatu tunang in nanimthritme? 8Chunna nanril thlenga akthra akrah inrahchu veivesa, 9#Jon 8:33; Rom 4:16‘Kannihvaa kan pa Abraham am’ tih a nannih in madonnohve, alamva Ringpu in mah lung innata Abraham vaa atute masuuk achek tih a nankuungah kisonchou. 10#Met 7:19Ipektalkho thingi akjungah reii aha tlasamma am, chunna akrah thranoh thing anaamteta tangkirra meia alontu.
11“Nannih nanril nanthlengrella, keiin kiluppeichou, chuta kei kiknua akthlengsam amahvah keichunga atuui am, keivah amah akehkhraang choikho kimtik amnoh; amah invah Li Akseeng leh meia naniluptu. 12#Met 13:30Amah akut ah mathrahna kulei am, che amah aruimunna amthrahche kihuta atomsuungah abuntu, chuta aksiva thinohluunga intruunga amna meikhura athlaaktu.”
Jisu in Anlupna
(Mak 1:1–11; Luk 3:21–22)
13 #
Mak 1:9–11; Luk 3:21–22; Jon 1:31–34 Jisu in Kalili nata Jordon na John kuungah inlupnatu thlengsa. 14Mahchuta John in indah a alouson, “Keidomta nangin naklup tupot angta, keikuungah thleng sacheme?” 15Chunna Jisu in akuungah amsang, “Pekva ajana veisaso, alamva akchimlamseh naamteta mathlungna veia mah i inih turelnasa.” Cheva John in aloujapei. 16Che Jisu in inlup a, tuiinata anthruh dolhsoh, kak hanga ringram inhoongsa che Ringpu vaa Li in ukthru nanga trumsa, che achunga kvaara amuhpei; 17#Met 12:18; 17:5; Mak 9:7; Luk 9:35che ringramnata hou inkhat in ason, “Mah i keiin kirilvol Kisa kupasa, amahkuunga kiril pelsang.”
Currently Selected:
METHIU 3: TARAOBSI
Highlight
Share
Copy
Want to have your highlights saved across all your devices? Sign up or sign in
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.