NOONNA THLOU 15

Jerusalem a Inchun

1 # Kal 2:1–10 Chuta Judia nata mii arouin thlenga unaopasa eita amitheihva, “Moses trongthuun nujuih a nannih in nanvun tannoh chouleva nannihta nanikalnohtu.” 2Mahchunna Paul leh Barnabas in anmahsoh injahnoh a trong inngei insinsei, mahtrong inruiina relnava Paul leh Barnabas mahche aktlei mii arouta Jerusalem a raangroiei mahche anparuul ankuunga anhangnatu thlou anthunpei. 3Nga tloh a khakla in anmahta mathlah a anmah in Phonikia mahche Samaria inthruh a anthleng in Jental jatih in anril anthleng kharelna antongpei, mahchunna khalmo anroomthokta unaopasa kuunga amidangpei. 4Anmah in Jerusalem anthlengsoh khaklana raangroiei mahche anparuul eiin anmahta roomthok a anlousonpei, che Ringpu in anmah anpaalla atlohthlou anaamteta anmah kuunga ansonpei. 5Chuta Pharisi nata amlot mii arouin ngirra anson, “Anmahta anvun tannoh janoh, mahche Moses vaa trongthuunta majuihnatu anmahta chaaknoh janoh.”

6Mairelna intelna raangroi leh anparuul eiin inboomma intuuksei. 7#Noon 10:1–43Anmah in trong soot a anngeiche aknua Petar in ngirra anmahta asonei, “Unaoeio, nannih in nanrom mah chuvah keiin Jental jaat in kanarnata akthra trongraanta theih a amilotnatu matsah a Ringpu in ikaarnata keita keicharpei. 8#Noon 10:44; 2:4Miirilta akrom Ringpu in ankuunga sakhi amlanpei, inihkuunga Akseeng Li amlannanga anmah kuungkho Akseeng Li amlanpei, 9mahche inihleh anmah ikaar a inthliin jakahtkho sihnoh, chuta malot apaalla anmah anrilta amseengpei. 10Mahchunna pekva ipa ipuinkho che inih inkho roon icheknoh potrik rukolta aroi anriingchunga thoonga nannih in Ringpu ta jarella chaang nan anme? 11Chuta inih in imlot mah chuvah anmah nanga Akpu Jisu Khrista vaa malungsi apaalla inihkho inikaltu.”

12Paul leh Barnabas anpaalla Ringpu in Jental Jaat ankaar a daang mahche salungkhouna thlou jikcha atlohrella ansonta anrugeih in mii inboom annaamte daichritsei. 13Anmah in trong ancheche, Jems in amsang, “Unaoeio, keiin kisonni minna rungaive, 14Simeon in inisonpei Ringpu in amah akming turelna anmah ankaar nata mii ruulkhatta alohnatu khatloh a Jental jatih a seh a an anme. 15Ringraan antrong leh maisoh injaei, mah i nga tloh a injihsa, 16‘Maiche aknua keiin inlengtunga, Davit in a amna inn inthrit khata keiin kiseemlatu; tumma akmaang khata keiin kiseemlatu, che mahchuta keiin kamngirhlatu, 17mah chuvah anlei mii eiin mahche kei kikming ak ong Jental jaat naamtein Akpu ta anjontu, 18mah namte i Akseem Akpu akromin ason.’

19“Alamchunna kei pichaarva maisa, mah chuvah Jental jaat in Akpu kuunga inheisei inih in anmahta malaannoh eirei, 20Chuta rappu ramnaia ankatpoot seengnoh mahche ariing raak a anthatsa khatkho thii saa iin antlohnoh nahtu majihreio. 21Alamva amaa leithingna ringnatluun jikchanata khuuboomrel Moses vaa trongthuunta raanna thlengsei, sabat nirel Sinakok ah paa a thlengsei.”

Akpu Amlot Jental Jaat Ankuunga Trongjihthuun

22Chunna Antiok ah amithlah angroi leh anparuulsei mahche khakla naamtein thratuta ngirsei, anmah in unaoei ankaar nata Barnabas ta an ong Judas leh Silas ta charra anmithlahpei, 23amah athlangna trongjihthuun isoh amithlahpei: “Raangroi leh anparuul mahche unao pasa in Antiok ah, Siria mahche Silisia ah am Jental jaatna unaopasa nankuunga kamithruunchou. 24Kannih in kamitheihnoh kankuung nata mii arouin nannihta mah trongin insuuk inhal nanimphahpei mahche nanrilta machetnohsa ta kantheihpei, 25kannih in inkhatveia mii ste char a, anmahchuva kanringvol Barnabas leh Paul ta mathlah i thratuta kanjapei 26anmah in inih Akpu Jisu Khrista rella anmah anchaan rou anjapei, 27churella kannih in Judas mahche Silas ta kamithlahpei, kannih in kanjanakha anmah in nankuunga anson usa. 28Amah darkaar inoh a akliin potrik amnoh i Akseeng Li in mahche kannihting thrasata kamidonpei; 29mah chuvah rappu ramnaia ankatpoot akseengnoh saakphu saanoh, kupa kumei aleh thloua sehnoh, mahche ariing raak a anthat mahche thii saa iin nata nannih in inpelve. Mainang nata nannih in inpeelchoule, nannihting akthra veitu.”

30Nga tloh a anmahta amithlahpei, anmah in Antiok a jungsei; mahche amlot kulsa eita anmitlonche, trongjihthuun chuta ankuunga amilanpei. 31Anmah in mahchuta anpaache rilthokna trongkhanna anmah in anroomthoksa. 32Ringraankho vei Judas leh Silas in unao eita trongla jikcha a anmah arilta thok a amitrangei. 33Anmah in kak an amche, unao pasa eiin amahta amthlah miikuungala leh oia amithlahpei. 34Chuta Silas in mah khanna a am in thratu kamdon. 35Chuta Paul leh Barnabas vah aktlei mii eisoh Akpu trongta matheih a che raanna Antiok a amsei.

Paul leh Barnabas Inthrek

36Nijan kak aknua Paul in Barnabas ta ason, “Inih in akthratrong iraan iraanna khanna veikhat inlenga khuuboomrel ak am iuhnao eikha khakha am eimeta anneiro.” 37Barnabas invah Mark ta an ong John ta anmahsoh inruuia ansehpija. 38#Noon 13:13Chuta Paul in Pamphilia a inpella inmah chuche anmahsoh thloutloh sehjounoh a anmahta inruuipi i thranohtuta Paul in amdonpei. 39Anmah ankaara injanoh a khalmo anjetrella anmah in khatleh khat inthreksei; Barnabas in Mark ta phurh a muli chuunga Saipras a sehsei, 40chuta unaoei in anmahta Akpu vaa malungsia amisilh peitaningva Paul inva Silas ta chaar a sehsa. 41Che amah in Siria mahche Silisia vanna seh a khakla anlita amitrangei.

Currently Selected:

NOONNA THLOU 15: TARAOBSI

Highlight

Copy