ZEKHARIA 14
14
Jerusalem ngo Ashiayeh kutami
1Julo, AMPEU no kughathani keu tsalaye kupunuvae. Tile Jerusalem ye xulepuwuve nani eno nongu nhekithe lono xule puwu keu hu kijelukhave nani. 2AMPEU no ashiayehqo kumtsu kumtsa saghieno Jerusalem sasu aghushipe nani. Aphughi huye leluve nani, akilo aghikeu xulepuwuve eno totimiqo sazuvetsu nani. Timi tuxaye akughu shisu wuve nani ikemu kutamiye aphughi tipau lono sawuvemo nani. 3AMPEU no ipe puzu wovekeu tsala ghulokilo aghushikeu toi ashiayeh tipaqo sasu kumjo nani. 4Tipa tsalalo pano Jerusalem kipela kudau Oliv Toghilo puthugho nani. Tileno Oliv Toghiye kipelauno kulolau kutolo akhila kije lakhino supho kini shivetsu nani. Atoghi tuxaye ahuu iqeuve nani eno tuxaye apeu iqeuve nani. 5Nonguye atoghi kijetha kini shivetsukeu khila vechesu kuhapolu nani. Juda lo Akukau Uziya ghulokilo ayeghi kughuthano ilukelo nopuasu qono kuhakive polu keshi nongu ghi kuhapo nani. AMPEU iLhou ye pa gholo kungumi kumtsu sasu ighi nani.
6Kughono tipa tsala ighini keno, tileye mukomughai keu momu avutsa kuhave nani, 7momu zumoikeu shimove nani. Putholomu pulhapujulo puchou kuvu toi auve nani. Kughono hipau shini cheni keno AMPEU likhino ithi ani.
8Tipa tsala ighi kelo, Jerusalem kudauno akuxupuzu qowu nani, tuxano Akithi Zughi kudau qowu nani eno tuxano Mediteriya Zughi kudau qowu nani. Hiye ampe kupujulo qowu anani, tuqu tsala momu mutsu tsala shimono qowu anani. 9Tileno AMPEU no ayeghiqha kumtsu shou akukau shive nani; kumtsuno paye Alhou kepi pa mlla nani eno aje tipau tholono pa ithiwove nani.
10Ahuu kudau Geba lono apeu Rimon tokujo qhaye kulaqa khave nani. Ikemu Jerusalem ye tipa sukumxalo ayeghi akeqo shou chuqumughai shi anani; eno aphughiye Benjamin Khagho lono Acheku Khagho puzuu ghi tilehi khagho achekeu kuto to nani, eno aphughi tiye Hananel Liwo lono akukau tsayithi qochekeu-a kuto to nani. 11Timi qoye akupuna kuhaveno tilehi ngolu nani, shikupsa no panoqo shikichiqhimono ngoluve nani.
12Jerusalem sasu aghushikemi shiayeh qo shou AMPEU no akusu lhoksa lakhi sughi nani. Panonguno xuaphi lono pano phiashiye tsuwuve nani; panongu nhethi eno panongu miliye tsuwuve nani.
13Tipa ghulokilo AMPEU no panoqo pelo izuvulaivepe nani eno Musaichive pe nani, ikelauno lakhino lakhi pa phivilo aghikeu heqhi buqhikileuve nani. 14Juda lo akemiqono Jerusalem susho nike aghushi nani. Panonguno ashiaye kutamiqow kinikulu xulepusu wuve nani — shunayi ngo tsandiyi eno aphiminino kumzapushi luvetsu nani.
15Akusu lhoksa lakhino khurshiqo shou gadahatsu shou eno kemel shou eno gadahaqo shou ikughive nani eno aghumiqo kungo alo lhoxu kumtsu shou ghi ikughive nani.
16Tileno Jerusalem leighikemi shiayehqo gholo puxu puaghitsu kemi kumtsuno Aqokitikhi MPEU ye akukau kepi pa mlla nike ampe atsutsu Jerusalem lo wu nani, Apusholo kungo Pinyeni ikhilu nike wu nani. 17Ashiayeh khipauno Aqokitikhi MPEU ye akukau kepi mlla nikeulo wumopini keno pano ghakhulo tsutsughu ghuqhimove nani. 18Ijipmino Apusholo kungo Pinyeni ikhilu nike wumo piaye ashiayeh kutami khunoqono wumo pikeno tipaqo shou puwukeu kusu panoqo shou ghi pukutsu nani. 19Aghime hipauye Ijip eno ashiayeh kutami khunoqno Apusholo ngokeu Pinyeni ikhilumoni keno tipaqo shou ikughi nani.
20Tipa ghulokiloye khurshiqo pepipe chekeu muqubo shou ghi, “AMPEU lau Ikhiphetsuvekeu” ipi yepuku nani. Achinekilo be-lho chekeu liqo ghi akumlla kipti khachelo akhuqo qhemi akimthe kepi kihi nani. 21Jerusalem lo eno Juda lo be-lho chekeu liqo kumtsu Aqokitikhi MPEU mlla keulo peitha nike ghenguno pakutashi qhive nani. Timi khunoqono aghashi mlla nikeno tipaqono aghashikeu shi lho nike ghenguno tipaqo peitha nani. Kughou tipa tsala ighini keno Aqokitikhi MPEU chinekilo lhidi shichekemi lakhimu qhimove nani.
Currently Selected:
ZEKHARIA 14: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
