ZEKHARIA 1
1
AMPEU Timiqo Xaideghilopi
1Persia yeghi shou Darus no akukatou shikeu ampe lakhi aqhi tache shiakelo AMPEU no atsape hipau tungkupu Zekharia tsuke. 2Aqokitikhi MPEU no Zekharia vilo timiqo lau ishi pilo pike, “Ni, AMPEU ye nopuasu lau ighono iloghu ideveke, 3ikemu itehiye ino nongu vilo piani, Ilau ideighivelo nighi nongu lau ide ighinike. 4Nongu puasuqo toi shikevilo. Khaghilo tungkupumino panoqo vilo hinguno hilauye alhoksa kuxu eno axine shikeu kuxu xukevilo pi itsape pesu panoqo tsuke ikemu panonguno itsa inimoe eno igholumoke. 5Nongu puasu ngo tungkupmiye xuamovae. 6Tungkupmi iqemiqo vechewo nongu puasuqo lau ino ahza tsu eno kutughukeu tsuke ikemu panonguno tipaqo phimoveke eno tipau jume aghime sholu ke. Tileno panonguno xachile ighino ni, Aqokitikhi MPEU no panonguno ithulu kuzupu shiakeu qhemi eno ino shinikeu shi kumsupuve keu shi panoqo ghimeqhi kepu panonguno kumsu chileluke.”
Khurshi kungunhetsu
7Darus no akukatou shikeu ampe lakhi aqhi chighi atsala muku bidi tiye Shebat qhi shiakelo AMPEU no putholo kungunhetsu lono atsape lakhi itsuke. 8AMPEU wu kungumi lakhi khurshi huchuyikeu shou ikuno cheghikeu ino ithulu. Abokhuqa lakhilo axokutsungu subo hami akeu gholo pano ngove eno pa tikhau huchuyikeu ngo hughaikeu eno metsughoi keu khurshi kutau ghi ake. 9Ino pa vilo iniju, “Akijeu, khurshi hipaqo kiqiye kiu kya?”
Pano khochile, “Hipaqo kiqiye kiu keno ino ovilo pitsuni. 10Wuno ayeghiqha xujupe nike AMPEU no panoqo puwuke.”
11Panonguno kungumi khochile, “Ninguye ayeghiqha kumtsulo wuke eno ithulukeuno ayeghiqha kumtsu kuphukemi kuhano hasu pesu anike.”
12Tileno kungumino pi, “Aqokitikhi MPEU, noye Jerusalem ngo Juda lo aphughiqo shou aloghu idekeu hi ampe lhotsuni shivae. Noye panoqo lau kimiye qhiyinikeu ado khitotohi luani aphi kya?”
13AMPEU no alokughunopu tsa pesu kungumi khochile, 14Aqokitikhi MPEU no kiu pikeno tipau pesu asheshu lopi kungumino ivilo pike: “Niye ikimthe phughi Jerusalem ghenguno shishe kimiyekeu ani eno alokumsu anike, 15niye ashiayeh khipaqono iquneyi eno alokughuno shiani keno tipaqo shou iloghu kighide ani; kughengu iwu timiqo shou iloghu be akelauye ashiayeh kutamino iwu timiqo shishe ghime auvae. 16Tighenguno niye aphughi shou kimiyeqhiyi nike Jerusalem lo ideighi ani. Ichinekiye shikitheve nani eno aphughiye shikithe pukuve nani.”
17Kungumino ivilo highi pesu asheshulo pike: “Aqokitikhi MPEU no pike pa phughiqoye itaghi kinikulu shive nani eno pano itaghi Jerusalem kuphu kithe eno aphughi huye pawu kepi pukhaluve nani.”
Akibo Kungunhetsu
18Kungunhetsu kutau lakhi lono ino amshitsu kibo bidi ithulu. 19Kungumi iputsa akeu vilo ino iniju, “Akibo hipaqo kiqiye kiu kya?”
Pano khochile, “Akibo hipaqoye ayeghilo kuka khipaqono Juda ngo Israil eno Jerusalem timi achekeqo hapiye pighive keno tipaqo kiqike.”
20Tileno AMPEU no timi akumla shichekemi bidino ayihesu bidi pesu akeu ipiye. 21Ino iniju, “Timi hipaqoye kiu shinike ighi ani kya?”
Pano khochile, “Panonguye ashiayeh khipaqono Juda yeghi kubove eno tile timiqo hapiye pighivekeno tipaqo shiayeh shithughuyi nike eno halepheve nike ighi ani.”
Currently Selected:
ZEKHARIA 1: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
