MATHI 16

Amichipu lakhi Khukeu

(Mk 8.11-13; Lk 12.54-56)

1Farisimi ngo Sadukimi khami Jisu lau ighi eno pa pejuniye panonguno pa vilo kungugha lono amchipu lakhi piqipiyelo pi khu.#Mt 12.38; Lk 11.16 2Ikemu Jisu no ishi panoqo khochile, “Kughono kijiliu shiveni keno nonguno ‘Atsutsuye huchuyi anikeke atsala aloni cheni’ ipi cheni. 3Inaqhe nonguno, ‘Atsutsuye huchuino zuchiyi anikeke ishiye pasapagha tsala shini chenie’ ipi cheni. Nonguye atsutsulo ju puzu atsalaye kiu toi nani kela pilu cheni, ikemu nonguye hipa ghulokilo amchipuqo kiqimlae! 4Kusakugha eno Alhou kumtha tiqhelimino amchipu lakhi phucheni, ikemu Jona michipu nguno alauye amchipu kutau pesu nongu tiqhelimi tsumo nani.” Tishieno paye panoqo qhive puzu wuve.#Mt 12.39; Lk 11.29

Farisimi, Sadukimi Kholaqhi

(Mk 8.14-21)

5Akhopemino ayizu hu katha sasu tuxau ikughi kelo, panonguye asho lakhi likhimu sughinikeu kumsumave. 6Jisu no panoqo vilo ishipi, “Jukutolo eno Farisimi ngo Sadukimi kholaqhi lono kutokupuyi alo.” #Lk 12.1 7Panongu dolo ishi kuptsakile thuve; “Ninguno asho sughimo kehu paye ishi piani.” 8Panonguno kiu piakeno Jisu no ithive puzu panoqo vilo ishipi, “Nongu akupulu kitila likhi akeqo! Nongu gholo asho sughimokeu vehu kushiniye tishi kuputsakile ani kya? 9Itehi kutolo nonguye ithi kututa shimla aphi kesha? Ashopa pungu pesu timi 5000 kijetsukeu eno ashoghi khije nonguno lekutsulu ishi keno nonguye kumsuchile mla kesha?#Mt 14.17-21 10Momu ashopa tsuni pesu timi 4000 kijetsukeu eno ashoghi khije nonguno hekutsulu ishi kela kumsuchilemla kesha?#Mt 15.34-38 11Niye asho piamokepi kushiye nonguye ithi kututa shimlave kya? Farisimi ngo Sadukimi kholaqhi jukutokupuyi alo!” #Mt 14.1-2; Mk 6.14-15; Lk 9.7-8 12Tileno paye panoqo vilo kholaqhi asholo peithachekeu jukutokupuyilo pi anike kumo puzu Farisimi ngo Sadukimino kutsuchekeu lono jukutokupuyi lopi akenapi akhopemiqono ithi kututa shilu.

Pitor no Jisu Piphetsu

(Mk 8.27-30; Lk 9.18-21)

13Kughou Jisu no Kaisaria Filip yeghi kokutha qhalo akeno, pano ishi pa khopemi iniju, “Timiqoye ni Timi Nu pesu khuu kepi picheni kya?” 14Ikelo panonguno ishipi, “Timi khamino noye Johan Baptist kepi picheni, kutami khamino noye Elija kepi picheni, itaghi khamino noye Jeremiya momu tungkupu kutau lakhi kepi picheni.” 15Panoqo vilo pano ishi iniju, “Imaye nonguye niye khuu kepi picheni kya?” 16Simon Pitor no ishi khochile, “Noye xuakeu Lhou nu Mesiya ke.” #Jn 6.68-69 17Jisu no pa vilo pi, “Jona nu Simon, noye akumghapue! Kughengu timi shi-aji kudauno olau hipau pephepiye kekumoe, ikemu iPuh kungughalo akeu noke. 18Ike ino ovilo pini, noye Pitor ke#Grik lo: Petros eno atuqu#Grik lo: Petra eno atuqu hipau shou ino ikukuhou shipukuni, eno akithi ghime kuka pimu tipau shou tokulu shimla nani. 19Kungugha yehkipe khadu ino otsu nani eno ayeghilo nono kiu kiumu lakhavekeu kungughalo ghi lakhavetsu nani; eno ayeghilo nono kiu kiumu phevetsu keulo kungughalo ghi phesuvetsu nani.” #Mt 18.18; Jn 20.23 20Tile Jisu no pa khopemi vilo timi khuu vilomu paye Mesiya kepi pikevilopi tsatsayi lakhave.

Jisu Aghimeshi Thinikeu pi

(Mk 8.31—9.1; Lk 9.22-27)

21Tipani nguno Jisu no pa khopemi vilo tuchecheno ishi pithuve, “Niye Jerusalem lo wumasa eno Judami kichimi ngo achinetomi ngo Ayezah kukutsumi pelo aghime tsu-kepu shini cheni, eno ipithivepe nani eno akuthuni ixuputhuve nani.” 22Pitor no Jisu ku-tsughu puzu ishi pa lomipi, “Ampeu, Alhou nomu lakhamo sheo! Oshou khilemu hipau ikughipemo thono!” 23Ikemu Jisu no tsughu ideghi puzu Pitor vilo ishipi, “Satan, ilau no wuvelo! Noye ipuxa anie, kughengu noye Alhou no kumsukeulo kumo puzu timino kumsukeulo kumsupuku pe ani!””

24Tisheno Jisu no pa khopemi vilo pi, “Timi khunono ipape nikeno, pa likhi paye khuu keno kumsumave puzu pawu kros xapuno ipapelo: #Mt 10.38; Lk 14.27 25Kughengu khunono pano kuxu pukha nikeno ti puhave nani, ikemu khunono ighenguno pa kuxu puhave nikeno ti phulu nani. #Mt 10.39; Lk 17.33; Jn 12.25 26Timi lakhino ayeghi kuchopu pawu shiluve pinamu pa kuxu puwovekepu shive aye timi tipau ghenguno kiu ala shilu akya? momu timiye pa kuxu theli kiu tsulu kepu kya? 27Kughengu Timi Nu ye paPuh wu akimthe jukuvu lono pawu kungumi sasu ighini cheni, eno tileno timi lakhi khino kiu mlapuaghi nikeno tipau lochile nani. #Mt 25.31; Leshe 62.12; Rom 2.6 28Kuchouno ino nongu vilo pini, hile puthugho akemi khamiye Timi Nu no payehkipeqha lono ighikeu ithulumoke kutolo akithi michemo nani”

Currently Selected:

MATHI 16: SUMIBSI

Highlight

Copy