HABAKUK 3
3
Habakuk Kighini
1Hiye Habakuk tungkupu kighini lakhi:
2O AMPEU, nono kiu mlaveakeno ino chiluvae,
eno niye apuchopungovae.
Itaghi ni ghulokilo ghi nono akumzapu
kumla kije shichekeu shitsulo.
Nono aloghu ide akelo pinamu
kupuqhiyilo.
3Alhou ye itaghi Edom kudauno cheni;
akimthe Lhou ye Paran naghuto kudauno
cheni.
Pa jukuvuno kungughaqo nhake;
eno ayeghilo pa sheqhekeuno chhitoi ani
4Paye tsutsupha kukulo lono cheni;
pa-u lono akuvu kulophe,
pa kukaye tilehi kusupe puani.
5Pano pazuu kusukini puwu,
eno akithi pa pape penike azah tsuke.
6Kughou pano ngoveni keno ayeghino
sukinike;
pano jupuwo kelo ashi ayehqono
khokhoshive.
Alhokupuju achekeu naghutoqono
ipopinyive;
alhokupuju achekeu toghiqono ipa-ilove,
kha-ghi pano khilehi chewuchekeno tipa
toghiqoke.
7Kushan lo akemiqono ime akeu,
eno Midiya lo akemiqono musa khokhoshi
akeu ino ithulu.
8AMPEU, aghokiqono opelo aloghu idevepe
kesha?
Azughiqono opelo muqhu muzai vepe kesha?
Nono owu timiqo lau tokulu sughi
kelo khungkusu shou ikuke eno pasapagha
khungkusuye owu yeghikilu shike.
9Nono asuzu peitha nike kutolu veke,
opiji kapuwu nike kutoke.
Owu tsutsupha musuno ayeghi shopholeke.
10Naghutoqono no-ithulu kelo khokhoshive;
atsutsu lono azu leqhike.
Ayeghi qhou azu akeqono igha eno tipaqo
zu kukuchono qhemghai iku.
11Opiji kumtsuno kulo phapha shi keulo
eno ongu tsulompuyi yebide keulo,
tsukinhe ngo aqhino inaqhoi ngove.
12Nono aloghu lono ayeghi katha susu
chewuke;
nono muqhu muzayi keu lono ashiayehqo
qodaqhi.
13Nono owu timiqo xalu nike wuke,
tiye nono kisheluvekeu akukau
xaluniyeke.
Nono kusakughami sakipheu hekuluqhike
eno pa papechekemi kumtsu kutsalevetsu.
14Kughou tipaqono ni hale nike pasapagha
toi ighi keno,
tuqhouno kumlhomi nedaqhi chekemi toi
tipaqono amlo qui shipuzu ighi kelo,
opijino pawu aghushimi shou azah kutsuu
jiqhivetsuke.
15Nono owu khurshiqo sasu azughi nedaqhi,
ikelo azu kuloghino mulaghubeiveke.
16Ino hipau kumtsu chilu eno musa
khokhoshi;
akumsa lono imtsuno lalashi itha.
Iphimpino inaiveke, eno ipukhuno aqhou
kudauno kupuxaluveke.
Alhou no ni leighikemiqo ghimeqhike
ghuloki ighinikeu niye inaqhoi khe
anani.
17Khughuthibono athi pithinike pu-move
namu eno atsayibolo atsayithi ipeghimo namu,
Oliv lothi pithimove namu eno alulo athi
ipeghimove namu bheriqo kumtsu thikhave
namu eno amshikilo amshi kuhave namu,
18Niye amlokiqi launo alovi ani aphike,
kughengu AMPEU Alhou ye ixakuluuke.
19AMPEU no akumto itsu cheni.
Pano ipelo achui pukhu toi akivishi
nepukulupe,
eno ipelo naghuto shou chewulupeke.
Currently Selected:
HABAKUK 3: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
