GALATIAMI 1
1
1Paul no apostolmi shilukeuye timi vechewono shiluke kumoe, ikemu Apu Alhou no Jisu Khristo akithi lono xuputhuvekeu vechewo shiluke, 2hilau ithikuzumi akeqo kumtsuno Galatia lo akukuhouqo lau petha tsu ani: 3Ni Puh Alhou eno Ampeu Jisu Khristo launo kupukini ngo alokiqipu nongu tsupeniu. 4Khristo no kixikila tiqheli xine lono ningu xapheluniaye pa mpi pesu tsuve, tiye ningu Lhou eno Apu pulou lonoke. 5Alhokupuju lono alhokupuju kutolo Alhou lau akimthe jekipipu shilo! Amen.
Atsakiviu Kutau Kuhae
6Kushuwa kumphi puzu nonguye Khristo wu kupukinilo nongu kulukeu Alhou pheveno kutau tsalo ilove anike ghenguno niye shishe akichiqhivae! 7Kuchouno kutau tsakiviuye kuhake, ikemu timi khamino nongu xukutho ani eno Khristo tsakiviu shipixinishi kehuke. 8Ikemu ningu pina kungughalo kungumi namu ninguno nongu vilo atsakiviu pikulhavekeu nguno akumou kutau pikulha aye Alhou ngusu pa shou apeniu! 9Azuuno ninguno piveke toi itaghi ino pikithe ani, nonguno atsakiviu ikhiluvekeu nguno akumou kutau tsakiviu nongu vilo pikulha aye Alhou ngusu pa shou apeniu!
10Hitoi pikelo niye timi lopu phu ani kesha? Ikeo timi pelo ni ikhilupeniye shi ani kya? Itehi kuto ino timi pelo ni ikhilu peniye shi aghiaye niye Khristo qeu shikepu kumoe.
Paul no Apostolmi Shilu
11Athikuzumiqo, niye nongu pelo hi ithipenishi ani: atsakiviu khipau ino pikulha cheni keno tipauye timino shiphelukeu tsakiviu kumoe. 12Kughengu niye timi kudauno hipau sughike kumoe momu timino kutsupiye ke kumoe, hiye Jisu Khristo ampino ilau pephe piyekeu vechewonoke.
13Ino Judami chineyeh lo kishi amlo tsuqhiyi achekeno nongu vilo pivae, ino suchilemono Alhou kukuhou, shikighimeche eno tipau shipuhave nike pukaputsa cheke. #Aposto 8.3; 22.4-5; 26.9-11 14Judami chineyehlo niqhe sho Judami kutomo dolo ino atughiu shiache, nipuasuno pekishe pichekeu nongu nguno alau ino amlo tsuqhiyi cheke. #Aposto 22.3 15Ikemu ipunu mphi lono Alhou no pawu kupukini vechewo ikishephelu eno pa qepenike ikulue. 16Pa nu ilau pephe piyenike pa pulou shive, tishianguno Judakumomi lau pa tsakiviu pikulhakepu shikelo, niye kiu shikepu kelapi khuu vilomu inijumoe. #Aposto 9.3-6; 22.6-10; 26.13-18 17Tikekumono, Jerusalem lo izuuno apostolmi shive aghikeqo lawumu niye iqhomoe, ikemu niye Arabia lo wuve; eno itaghi Damaska lo ideighiveke.
18Ampe kuthu thiuno niye Jerusalem lo Pitor sasu kushonike wu eno niye pa sasu atsala chighi pungu ngove. #Aposto 9.26-30 19Niye Ampeu thikuzuu Jems thono apostolmi kutami lakhimu sasu kushomlae. 20Alhou no ithi ani ino nongu lau kiu yeh puwu anikeno tiye kuchou kethono mikiamoe! 21Tishieno niye Siriya ngo Kilikia qhalo wuveke. 22Tikutolo Judia lo Khristomi akukuhomi sasu ampino kujuthimono ake. 23Panonguye kutamino ishi pikeu likhi chilu: “Timi khuuno ningu shikighime eno hasuveniye shichekeno itehiye pano tipau kupulu pikulha anie!” 24Ike ino tishilukeu ghenguno panonguno Alhou she ani.
Currently Selected:
GALATIAMI 1: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
