KOLOSSITE 3
3
Khrist toh kaihthohkhawm hitate umdan diing
1Huchi'n Khrist toh kaihthoh khawm na hih taah uleh, tunglam a Pathian jiatlama tou Khrist umna a sil umte chu hawl un. 2Tunglam a sil umte ah na lungsim uh nga un, lei a sil umte a nga louin. 3Ajiahchu, na sita va, na hinna uh Khrist toh Pathian ah phual ahita hi. 4Khrist, i hinna uh ahung kilat chiangin nanguh zong amah toh loupiin na kilang diing uhi. 5Hujiahin na tahsa hiang uh lei a umte sulum un; kingaihnate, bolhhohnate, kietlahna hoihloute, utna giloute, huleh duhaamnate, (duhaamna chu milembiahna ahi), 6Ajiahchu hu silte jiahin Pathian lungthahna chu thumang lou tate tungah a tung veu hi; 7Nanguh zong tumalam a hu silte a na hin laiun, hute ah na na um uhi. 8Hizongleh tuin chu nangun zong lungthahnate, thangtawmnate, huatnate, soisiatnate, houlimna thanghuaite, hihaw zousiah na kam vapat koihmang un. 9Mihing lui chu a silbawlte toh na hawhkheta uh chih he in, khat leh khat kihemtuah sih un. 10Mihing thahin na kithuamta va, huchu heetsiamna neia a siamtu batpiha siamthah in a um ahi. 11Huah chu Grik mi leh Judami, zehtan leh zehtan louh, Meelmahmi leh Skithiami, huleh saltaang leh taanglou zong a um tuan sih hi; Himahleh Khrist chu bangkim ahi a, bangkim ah a um hi. 12Hujiahin, Pathian miteel, mi siangthou leh deihtahte bangin lainatna lungtangte, chitnate, kingaihngiamna lungsimte, jaidamnate, huleh thuaahtheihnate in kithuam un; 13Khat leh khat kithuahtheituah unla, kingaidamtuah un; khat in khat tunga thubuai bang na neih uleh, Khrist in nanguh ahung ngaihdam bangin nanguh zong kingaidam un. 14Huleh hi silte zousiah tungah lungsiatna silhthuaah un, huchu bukimna kaangawmna ahi. 15Huleh Pathian hamuanna na lungtang vah vaihawmsah un, huchibang hi diingin tahsa khat a kouhna hi uhi; huleh kipaahna taang zong he un. 16Khrist thu chu pilna zousiah in nanguh ah tampiin umsah un; phatna la bang, Pathian la bang, huleh hagaulam la bang kizilsah in, kihilhtuah unla, na lungtang va hehpihna nei in Lalpa chu la sahsah un. 17Huleh na bawl photmah uh, thusoi in hileh natohin hileh, a bawnin Lalpa Jesu minin, amah jiaha Pa Pathian kawma kipaahthu soi kawmin bawl veh un.
Khristian innkuan umdan
18Jite, Lalpa a, a kilawm hun bangin na pasalte uh kawmah kituluut un. 19Pasalte, na jite uh lungsiat unla, a tungvah gilou sih un. 20Tate, sil zousiah ah na nulepate uh thu mang un; huchu Lalpa ah kipaahhuai ahi ngal a. 21Pate, na tate uh sunuaah in lungthahsah sih un, huchilou inchu a lungkekha diing uhi. 22Suaahte, sil zousiah ah, tahsa a na houtute uh thu mang un; mit natong a mihing kipaahsah diing giap hilou in; himahleh lungsim siangthoutahin leh Pathian laukawm zaw in. 23Huleh na bawl photmah uh mihingte diing a bawl bang hilou in, Lalpa a diing bangin lungluuttahin bawl un. 24Lalpa kawm apatin kipaahman diing gou chu na mu diing uh chih he in; ajiahchu Lalpa natohsah na hi uh. 25Hizongleh sil dihlou bawltu in chu a sil dihlou bawlman a mu kiit diing hi; kideihsahtuamna bangmah a um sih hi.
Currently Selected:
KOLOSSITE 3: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
