ROMMEI 4

Abraham ta Champancloumei

1Kum e thei aniu pupouc Abraham ta akumhna laalou kan tu cho? 2Kati hei kataanv paan rui ravchaptatmei swna chaklou tuang e thei, kamei kagaengh sw khang kalam asaekc nai ni tuang e. Tiki Ravguangc hu khou kagaengh sw khang maek ge. 3“Abraham Ravguangc khou lwmlou the, kumna karam lum paan rui kata ravchaptatmei khang chaklou the,” twna nthanmei latrik rui sa e.#Tha 15.6; Gal 3.6 4Taanv taanclou tina tiimei tei thu taanv phy e, hei tei kaipat hamh e; kamei rui ntaanvna laa tuang de. 5Kataanv khou hamhna, nkhuaipui mei ta nkhuai makmei e twna chakloumei Racguangc khou lwmpui mei ta tei, karam lum paan rui Ravguangc rui ravchaptatmei khang chaklou e. 6Taanv paan rui hamhna, Ravguangc rui kata ravchaptatmei e twna chakloupui mei tei sangaymei e twna David rui mi kumna salou e:

7“Kakhuay guay kuakloupui mei tei,

kapaap guay gumbinloupui mei tei sangaypui mei e!#Kal 32.1-2

8Poubauhmei rui kapaap guay tei

chaklou makpui mei tei sangaypui mei e!”

9Mi David rui sangaypui mei e twna sa bammei hei, gihruamhmei nunc khang na cho? Hamh e, gihruamh makmei nunc khang ni de. Abraham ta karam lum paan rui ravchaptatmei swna chaklou the twna aniu rui sa bam e. 10Mi kiu akumhmei ganv khou cho? Kamei gihruamc tang khou ni, ruamh mak khou cho? Hei tei gihruamh mak khou de; gihruamhmei tangv hamh e. 11Mi tangv tei rui kamei gihruamh tuang de. Lwmpui paan rui kata ravchaptatmei swna chaklou the twmei madanhmei tuang swna kata gihruamh tuang de. Hei zaeng rui, Abraham hei Ravguangc khou lwmmei guay khatni gihruamh mak sini ravchaptatmei e twna Ravguangc rui chakloumei guay pu e.#Tha 17.10 12Kamei hei gihruamhmei nunc pu nii e; twmei thu—gihruamhmei na hamhna, aniu pupouc Abraham kamei gihruamh mak khou lwmna lungc kanmei tei kumcna, lwmmei panty khou lunghmei gihruamhmei nunc pu e.

Ravguangc rui Nrianhloumei tei Lwmmei Paan rui Laatow tuang e

13Mi kandic hei kaniw khang tii puni twna Abraham khatni kakikta khou Ravguangc rui nrianhlou kanmei tei kamei Riakdanv piupui paan rui hamh e; tiki lwmpui paan rui ravchaptatmei swna chakloupui paan rui de.#Tha 17.4-6; 22.17-18; Gal 3.29 14Ravguangc rui nrianhloumei tei Riakdanv piumei nunc khang tiilou ni tuang khwan e thei, lwmmei hei nsa di the, khatni Ravguangc latryan hei kabah maek khe.#Gal 3.16 15Riakdanv rui Ravguangc lungpuam phungc guang e; tiki kariak maek ge thei, kariak twan lyammei ni maek ge.

16Mi nrianhloumei hei lwmmei paan rui laatow khang e, kalam thu Abraham kikta guay khang zauzian swna tiilou khang rui, Kariak Latdanv piumei nunc khang na hamhna, Abraham kumcna lwmmei guay khang e. Kalam thu kamei hei meic guayna pu e.#Gal 3.7 17Kalam thu, “Ai rui nang ta zaatc guayna pu tiswlou the,” twna nthanmei latrik rui salou the. Mi latryan hei Abraham rui lwmmei Racguangc, theihmei ta tiringcthaulou datmei khatni maekmei ta kalatdanv rui tinailoumei Racguangc mikzaw khou gay e.#Tha 17.5 18Rigwn nuhmei lwnlung lungc twan khwan sini, Abraham tei lwmpui paan rui, “Nang kikta gaanchuangcna zu cha pat puni,” twna saloumei kumcna kamei zaatc mpeyna pu sw the.#Tha 15.5 19Kamei tingkwm phay khat dou tangc the, kanow Sara ni karacpeicna, kaney pumc khou rui meic cha nuhpui ganv twan the. Tiki karam lum kachanh mak ge.#Tha 17.17 20Karam lum maan mak ge, khatni Ravguangc latryan ta lwmsi mak ge. Kamei lwmmei tanc thauna, Ravguangc ta thuanc khwan e. 21Ravguangc thu kamei rui taanclou ni twna nrianhlou kan e thei taanclou ngam de twmei kamei lwm tiph tip bam khwan e. 22Hei zaeng rui, “Kata lwmmei paan rui Ravguangc rui ravchaptatpui mei e twna chaklou tuang e.” 23“Kata ravchaptatmei e twna chaklou the,” twmei lat hei kakhang na hylou tu hamh e; 24aniu Kaipouc Jisu ta theihmei khou rui tiringcthaulou datmeipu kakhou lwmmei paan rui ravchaptatmei e twna laalou punimei nunc aniu khang ni e. 25Aniu paap zaeng rui kata theih khang tii pat the, kumna aniu ta ravchaptatmei tiswlou khang kata tiringcthaulou dat the.#Isa 53.4-5

Currently Selected:

ROMMEI 4: RONGBSI

Highlight

Copy