ROMMEI 2

Ravguangc Latzan

1Meickai ta latzan swpui mei nang, nang khang ley duakpui chaeng maek ge. Nang rui meickai ta swmei latzan tei rui nang ta ni sw puni, kalam thu nang rui nkhuai e twna samei kahak tei nang taanc bam e.#Met 7.1; Luk 6.37 2Ravguangc rui mi kumhmei guay ruc khou keyloumei latzan hei thu nchumhmei latzan e twmei aniu thay e. 3Nang rui mi kumhmei nunc ta tei latzan sw lana kaniw taanc bammei tei nang ni taanc bam muay e thei, nang Ravguangc latzan khou rui duak puni de twna ning nah cho? 4Ravguangc kazauzian daihmei paan rui khaengv saengcna kadyng kadyng khou latzan swlou ti makna, nang kata thouhsw makna bam tu cho? Kazauzian hei thu nang lungh laic kan khang e twmei nang thay mak nah cho? 5Nang lung tancna lungh laic zihna bammei hei Ravguangc tuang nchumhmei latzan tingmik nungc khang kalungpuam nang kachwn bam tuang e. 6Kalam thu Ravguangc rui meic kathuic na khang kamei kamei rui taancloumei taanvphy tii puni.#Kal 62.12; Lkd 24.12 7Hymdaihmei, champouhmei khatni theic dat makmei ringcpaan laatow khang khaengvthayna gaytaanv taanc bammei nunc khang Ravguangc rui ringcsuangmei ringcpaan tiilou puni. 8Tiki kakhang na ningna, nchumhmei ta laalou makna, nkhuaimei khou tat bammei nunc ruc khou Ravguangc lungpuam keylou puni. 9Simei taanc bammei nunc ruc khou tei ryanra ryanriumei keylou puni; reymei khou Jihudimei khang e, kumna Zentelmei khang ni e. 10Tiki gaytaanv taanc bammei nunc khang tei hymdaihmei, champouhmei khatni chuzaenghmei tii puni; reymei khou Jihudimei khang, kumna Zentelmei khang ni e. 11Ravguangc thu gahsw guhsw mak ge.#Ria 10.17 12Kaniw khang Mousi tuang Riakdanv maekna paapc taanhmei nunc tei ni Riakdanv kazauh makna maan puni, khatni kaniw khang Mousi tuang Riakdanv tei naina paapc taanhmei guay ta ni mi Riakdanv tei rui latzan sw puni. 13Ravguangc hu khou ravchaptatmei swmei hei Riakdanv tei chupui mei tei hamh e; piupui mei tei de. 14Zentelmei nunc khang Riakdanv hei maek ge; tiki Riakdanv khou naimei latdanv guay tei kaniw lung khou ni naina tat bam e. Hei tei kaniw khang riakdanv the. 15Riakdanv khou naimei latdanv guay tei kaniw lung khou hylou bam e twmei hei tei rui lyan e. Kaniw khou naimei si gay thaymei lungning rui sa bammei hei nchumh e twna dinc e; kalam thu kaniw lungning rui nkhuai e hamh e thei nchumh e twmei dinc e. 16Kumna Ravguangc rui meic guayna tuang meic thay makmei lungning ta, Jisu Khrista paan rui latzan swpui nungc kiu, mi hei kumcna sw puni twna ai rui nangniw khou dinc ndauh bammei Gaychamv rui sa e.

Jihudimei lev Riakdanv

17Jihudimei nang khang thu akumh puni cho? Ai Jihudimei e twna nang sa e; Riakdanv khou ngangvlouna Ravguangc mei e twna gaengh sw e. 18Ravguangc ningmei tabui tei cho twmei nang thay e, khatni nchumhmei tei laa khang Riakdanv khou rui nang thay the. 19Nang hei mik tiatmei ta chaengzay nimei mei e, zinghmei khou bammei nunc khang gaanhmei e, 20mpangmei ta nchamlou nimei mei e, khatni alauc nunc khang dinclou nimei mei e twmei nang thay e. Riakdanv khou tei rui ramh guayna thay the khatni mi khou tei nchumhmei nai the twmei nang thay e. 21Meickai ta nchamloupui mei, nang tabui swna nang rana nang ta thu ncham mak tu cho? “Kaihouc lak nina e” twna nang rui dinc e, tiki nang thu kaihouc e. 22“Lungcmaanv lak nina e” twna nang rui sa e, tiki nang lungcmaanv e. Nang ravmaengc ta nuh mak ge twna sa laki ravkai kwamtu tu cho? 23Nang khou Ravguangc tuang Kariak Latdyn nai e twna gaengh sw lana, Riakdanv swbakna Ravguangc zaw sw kasic bam tu cho? 24“Jihudimei nang zaeng rui Zentelmei rui Ravguangc zanc sa kasic e,” twna nthanmei latrik khou hylouna nai e.#Isa 52.5

25Nang Riakdanv piu e thei, nang gihruamhmei tuang kabac nai e; tiki nang Riakdanv piu mak ge thei, nang hei ni gihruamh makpui riath de. 26Gihruamh makmei Zentelmei rui Riakdanv ngaek ti thei, Ravguangc rui kata gihruamhpui riath di the twna laalou pu lakna cho? 27Kum e thei gihruamh mak laki Riakdanv piumei Zentelmei rui hyloumei latdanv tei sin khatni gihruamc laki Riakdanv thu piu mak twmei Jihudimei nang ruc khou latzan sw puni. 28Gihruamc changhmei, Jihudimei ling kiu thow tei cho? Meic pumc tuang khou gihruamhmei, kapaengc khou Jihudi swpui mei tei hamh e. 29Jihudimei ling kiu thu, kalung tei Jihudimei swpui mei tei e. Mi kiu thu hyloumei Riakdanv rui hamhna, Ravguangc Bumaengc rui kalung tei gihruamhpui mei tei e. Maansei rui hamhna, Ravguangc rui thuancloumei laa niipui mei kiu mi kumhpui mei hei e.#Ria 30.6

Currently Selected:

ROMMEI 2: RONGBSI

Highlight

Copy