NDAUHLOUMEI 2
2
Ephisiamei Phwamling khang Hymei Tatdyn
1“Ephisiamei phwamling tuang baanchara khou tei mi hei hy o:
“Mi hei kabaanzat khou gaanchuangcna chanei sinna kachaekc tuang thauhmai hyang chanei pang khou tat bammeipu rui sapui lat re. 2Nang taanv guay tei ai thay e; nang taanc ranvna taanc kanmei khatni khaengv tancna khaengv kanmei tei thay e. Meicgay makmei nunc ta nang khaengv bam ngam mak ge khatni kaniw rana kaniw ta latdiutatmei nunc e twna sa laki kiuc thu kiuc hamhmei nunc ta tei nchanv lana kaniw saraamhmei nunc e twmei nang thay kanmei tei ai thay e. 3Nang khaengv thay e, nang akhang rui ryanramei khaengv the, kumna liat lak khe twna mpat mak ge.
4“Kum e tiki nang ruc khou ai nuh makmei kiu mi hei e: thaurey khou nang ata nzianmei ramzian tei ntaw nang khou maek khe. 5Nang asaanh ducna tangkhyn key the cho twmei makumh o! lungh laic datna nang thaurey khou sw bammei kumcna sw dat ro. Nang lungh laih mak ge thei, ai guangna nang tuang thaucmai hyang tei laa pat kan puni. 6Tiki ai karaengmei Nikolaitimei nunc tuang taanv ta tei nang ni karaengmei khang tei thu nang ruc khou neihlalou khang nai e.
7“Bumaengh rui phwamling guay khou smei hei nukuanc naimei kathuic chu la tho!
“Rihngamna guangmei kathuic Ravguangc tuang paradais pikwan khou naimei ringhmei thingbang thai tei tu puni.#Tha 2.9; Nda 22.2; Eze 28.13; 31.18
Smirnamei Phwamling khang Hymei Tatdyn
8“Smirna phwamling tuang baanchara khou mi hei hy o:
“Mi hei reymei khatni nkhamhmeipu, theiclouna ringc datmeipu kamei rui sapui lat re.#Isa 44.6; 48.12; Nda 1.17; 22.13 9Nang ramrianra tei ai thay e; nang ramlungsi ai thay e; tiki kaling thu nang lungcgay de! Kaniw rana kaniw ta Jihudimei e twna sa laki kiuc thu kiuc hamhmei, Seitaan tuang sinagogmei nunc rui nang ta sakasicna sa bammei guay tei ai thay e. 10Nang ariw punimei ryanramei khang tei ping rio. Zauclo, nangniw gaanvsaekc ta ravsic rui kangkai khou louna nang ta nchanv puni, kumna nang zaeng ruh ryanra khaengv puni. Theihmei nganvna lwmnuhmei sw o, kumna nang khang ringhmei swanpyrun tii puni.
11“Bumaengh rui phwamling khou samei hei nukuanc naimei kathuic chu la tho!
“Rihngampui mei ta tei theic kaneimei tei rui kabiu dat lak khe.#Nda 20.14; 21.8
Pargamamei Phwamling khang Hymei Tatdyn
12“Pargama phwamling tuang baanchara khou mi hei hy o:
“Mi hei kalat ntukmei kamun kaneimei baengsaeng kumhmeipu tei rui sapui lat re. 13Nang bammei bamv tei Seitaan tuang guangc bamvpaeng naipui bamv e twmei ai thay e. Nang ata mpat mak ge, kumna atuang lwmnuhmei sakhi— Antipas ta mi Seitaan bampui bamv khou tei swluaipui ganv khou tei nganvna nangniw akhou lwmmei mpat mak ge.
14“Tiki ai rui nang ruc khou nuh makmei tuang asaekc naimei kiu thu: Isaraelmei ta ravkhaengmei zanc tu khang nthiam patna nthah boulahpui taanv titaanclouna paapc khou tikeylou khang Balak ta nchamloumei Balaam tuang latdyn laamei gaanvsaekc nang khou nai e.#Sin 22.5,7; 31.16; Ria 23.4; Sin 25.1-3 15Hei tei kumcna Nikolaitimei nunc tuang latdyn laamei nunc nang khou nai e. 16Hei zaeng rui, nang lungh laic o! Lungh laih mak ge thei, ai asaanh mak khou, nang khou guangna amwang tuang baengsaeng rui kaniw ta adow puni.
17“Bumaengh rui phwamling guay khou samei hei nukuanc naimei kathuic chu la tho!#Tat 16.14-15; 16.33-34; Jhn 6.48-50; Isa 62.2; 65.15
“Rihngammei nunc khang tei ryloumei manna tii puni. Ai rui kaniw khang zanh thanh hyloumei ntauh mphwanmei tii puni. Hei tei laatowmei kamei na hamhna, mi zanc tei meic baihmei gaanv khatna sini thay mak ge.
Thuatiramei Phwamling khang Hymei Tatdyn
18“Thuatiramei phwamling tuang baanchara khou mi hei hy o:
“Mi hei kamik maibwang kumhmei, kaphay thaamc karangloumei kuanzinc kumhmei, Ravguangc Nac Mpouh rui sapui lat re. 19Nang taanv guay tei ai thay e. Nang ramzian, nang ramlum, nang taanv, khatni nang ramkhaengthai tei ai thay e. Thaurey khou khang tei suangc ntaw thu nang taanc mbu the twmei ai thay e. 20Tiki ai nang ruc khou nuh makmei kiu mi hei e: Jezebel tei rui Ravguangc lat re twna dincna amei nunc ta nthah boulahmei paap khou zaylou bammei khatni ravmaengc khang katloumei taektw titu bammei ta tei nangniw nuhlou bammei tei ai nuh mak ge.#1 Gu 16.31; 2 Ki 9.22,30 21Kamei lungh laih khang ai kaganv tii kan the, tiki kamei nthah boulahmei khou tei rui lungh laih mak khe. 22Hei zaeng rui, mi pui ta tei nnaumei laeng khou ganckeylou puni the, kumna kamei khatni kamei lev lungcmaanv lungcmowmei taanv taanhmei guay tei taraina makmei ramrianra ariw puni. Kaniw kamei lev taanc bammei simei taanv khou tei rui lungh laih mak ge thei, mi hei ai taanc puni the. 23Kanac guay ta tei ni swluai puni. Mi khou kiu, ai hei maansei guay ta kalungc kapaengc thay ngammeipu e twmei phwamling guay thay puni. Ai rui meic kathuicna khang kataanv kataanv thai tii puni.#Kal 7.9; Jer 17.10; Kal 62.12
24“Tiki Thuatiramei, mi simei latdyn khou hei tat makmei; ‘Seitaan tuang ningting’ twna meic nunc rui kawmei tei thay makmei nangniw khou thu ramh baihmei sahaaplou lak khe; 25nangniw khou naimei tei ai guang mak saanv ntipna sin bam o. 26-27Rihngamna guangmei nunc, ai rui nsinloumei taanv nkhamhmei tingmik nganvna taanc suakmei nunc khang, apu rui akhou tiiloumei ngamv tei ai rui tiilou puni: zaatc guay ta kaniw baanc khou tiilou puni; ntanh builwang rui kaniw ta sian khang, kumna nianglai ta kumc bai puat paruatlou khang tiilou puni.#Kal 2.8-9 28Ai rui kaniw khang laukhwan gaanphiu ni tiilou puni.
29“Bumaengh rui phwamling guay khou samei hei nukuanc naimei guay chu la tho!
Currently Selected:
NDAUHLOUMEI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
