SINGCHAKH 6
6
Nazir Swmei
1 Ringhpouc rui Mousi khou sa the; 2Isaraelmei nunc khou kumna sa o; Ntumei pwni, nggaanvmei pwni nazir sw ni the twna latdyng sw lana kata Ringhpouc khang katlou kan e thei; 3kamei tei zouh twmei zaat guay thiangc nina the. Kamei tei drakha khou rui kasiamhmei dui zaat kaguayna zangv nuh mak ge khatni drakha thai kakang pwni kanah pwni tu nuh mak ge.#Luk 1.15 4Kamei nazir swna bam saanv drakha bang khou rui patmei zaat twmei kaguayna— kathw khatni kagi na nganvna mbap nuh mak ge.
5Kamei rui nazir swmei tuang latdyng tei swna bam saanv kasam tiap nuh mak ge, kamei rui kata Ringhpouc khang tiilou kanmei dak khou tei thu kasam thauna saengcbam kandiu khatni kamei tei nthanmei sw nina e. 6Kamei rui kata Ringhpouc khang tiilou kanmei dak khou tei thu theihmei pumc daeng khou tat nuh mak ge. 7Kapui kapu, kachaic kakainac nganvna theic pwkhou kamei mi bamv khou tei tatna kapumc sw tanac nuh mak ge. Kasam tei rui kamei hei Ravguangc khang katloumei di the twmei lyanmei tuang e. 8Kamei tei nazir swna bam saanv kamei tei Ringhpouc khou katlouna bammei tuang di the.
9Thay mak daekna theic palapmei daeng khou bamlouna nazir swmei tuang katloumei sam tei sw tanacloumei tuang nai e thei, kamei kasam khatni kamwang hiw zaeng chanei tangv guat lana sw nthan dat nina e. 10Kamei rui zaeng tachatpui nungc aphyna kanei hamh e thei akhouhna kanei Ringhpouc tuang pheykai kaimun khou tei phungc guang nina e. 11Kamei rui theihmei ta kahiloumei tuang tanacmei tei sw nthan dat khang amuh rui akhat tei paapc khang khaeng nina e khatni akhat tei rui rawna khaeng nina e. Mi nungc kahak tei kamei kasam tei katgutlou dat nina e 12khatni katuang ganv tei Ringhpouc khang nazir swna katgutlou dat thanh nina e. Tat kanmei ganv ta tei chak dat ni tuang hamh the kalam thu katloumei kasam tei sw tanac the. Khaeng datmei puatkat swna tingkwm akhatmei lauziu kamei rui phungc guang nina e.
13Nazir swmeipu tei latdyng swloumei ganv tei luai e thei thouh akhat sw nina e. Kamei rui Ringhpouc tuang kalummei pheykai kaimun khou tei guangna#Lat 21.23,24 14hiaksuimei khouringc kathumh: rawna khaeng khang tingkwm akhat mei lauziuchiclauna akhat, paapc khang khaeng khang lauziunay akhat khatni alamvpuatkat khang lauziuchic akhat phungc guang nina e. 15Khay loumakmei ntyan rui kasiamhmei ntyan nggiuh akhat ni kat nina e. Mi ntyan tei Olive thauc teyloumei ntyan phuimei ni tii nimei tuang ntyan khatni drakhadui khou tei louhaap nina e.
16Amuh rui mi guay hei Ringhpouc khang tii nina e khatni paapc khang khaengmei lev rawna khaengmei tei kat nina e. 17Amuh rui lauziuchic tei alamvpuatkat swna Ringhpouc khang khaeng puni. Hei tei lev kazauhna ntyan giuc tei khatni zangv khang drakha dui lev twna kat puni. 18Kalummei pheykai kaimun khou tei nazir swmeipu tei rui kasam tei guat lana alamvpuatkat raw bammei mai khou tei mi sam tei ntei nina e.
19Nazir swmeipu rui py sam tei kat gutna guatdat tang pwkhou Lauziuchic tuang hupwam tei loucminc lana amuh tei rui hei tei laana nggiuh khou naimei ntyan dwm nsumei akhat khatni ntyan phuimei akhat laana hei tei nazir swmeipu baanc khou tei mbaenglou nina e. 20Mi tangv tei amuh tei rui mi guay tei nkunmei puatkat swna Ringhpouc khang kat nina e; mi hei amuh nunc khang nthanmei puatkat re. Latdanv theilayna lauziu ngaengv khatni theinaeng tiimei ruc khou tei mi hei haaploumei tuang e. Mi tangv tei nazir swmeipu tei drakhadui zangv dat nuh the.
21Mi guay hei nazir sw nimei thiak the, nazir swmeipu tei katuang latdyng cham tii nimei ruc khou rui mbuna tii ni twna nrianhlou e thei, katuang latdyng tei kamei taanc nthuihlou nina e.
Amuh tuang Suaihiam
22 Ringhpouc rui Mousi khou kumna sa the, 23Isaraelmei nunc khang suaihiamlou pwkhou mi lat hei suaicna suaihiamlou o twna Aron khatni kanac nunc khou sa o,
24“Ringhpouc rui nang ta suaihiamlou
pwdiu khatni makalou pwdiu;
25 Ringhpouc rui nang ta kadanna zauc
nzianlou pwdiu;
26 Ringhpouc rui nang ta nzianna
zauclou pwdiu kumna nchu-nzaenghmei tiilou pudiu.”
27 Ringhpouc rui kumna sa the, “Kaniw rui Isaraelmei ruc khou azanc hei saancna suaihiamlou pwkhou, Ai rui kaniw ta suaihiamlou puni.”
Currently Selected:
SINGCHAKH 6: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
