MARK 10
10
Now Mumei lam khou Jisu rui Dincloumei
(Met 19.1-12; Luk 16.18)
1Jisu mi bamv tei mpatlouna, Judia ramv thangc tat the. Kumna Jordan duiriang kaan pat the. Mi khou tei ni meic kangdai kadaeng khou huamc guang dat khwan the. Mi khou tei ni kamei rui kaniw khou nchamlou dat khwan e.
2Khoutei Pharisimei nunc Jisu daeng khou guangna kata nchanvna, “Meic gaanv khat rui now mumei hei Riakdanv thei layna nuh daih cho?” twna thanv the.
3Khoutei mundawna Jisu rui kaniw khou sa the, 4“Mousi rui nangniw khou tabui kumhna sa bu cho?”
Khoutei kaniw rui sa the, “Mousi rui thu nggaanvmei rui kanow ta mulou the twmei latrik hyna nsinlouna mu ganc khang nuhlou e.”#Ria 24.1-4; Met 5.31
5Khoutei Jisu rui kaniw khou sa the, “Nangniw lungning tanc tipui zaeng rui, kamei rui mi riak hei nangniw khang rui hylou tuang e. 6Tiki puakthau puaksiak khou Ravguangc rui kaney ta ntumei khatni nggaanvmei swna damclou the.#Tha 1.27; 5.2 7Hei zaeng rui nggaanvmei rui kapui kapu ta ganclouna kanow lev kariu nina e,#Baanhhy baibal asaekc khou thu kanow lev kariu nina e twmei hei maek ge. #Tha 2.24 8kumna gaanv nei tei akhat sw puni. Kumna kaney tei kanei hamh the, akhat di the. 9Hei zaeng rui Ravguangc rui tikariulou kanmei ta tei maansei rui sw ntamv dat lak nina e.”
10Kaniw kai khou bam dat khou, Jisu khou kaziap nunc rui mi lam khou hei thanv khwan e. 11Khoutei Jisu rui kaniw khou sa the, “Thow pw ni kanow ta mu ganc lana baihmei ta kaw datpui mei tei kanow ma nymna lungcmaanvmei e;#Met 5.32; 1 Ko 7.10-11 12khatni ntumei akhat rui kagaanv ta mu gancna baihmei now sw dat re thei kamei lungcmaanvmei e.”
Alauc nunc ta Jisu rui Suaihiamloumei
(Met 19.13-15; Luk 18.15-17)
13Kumna Jisu rui kahilou khang meic nunc rui alauc nunc ta kadaeng khou nduangh guang geic khwan e. Khoutei kaziap nunc rui kaniw ta luh khwan e. 14Jisu hei tei how lana kalung puamc the, kumna kaniw khou sa the, “Alauc nunc ta tei adaeng khou tiguang o, kaniw ta khaam riu. Ravguangc guangcdic kiu mi kumhmei nunc khang e. 15Ai rui nangniw khou kaling siakna sa tuang e: Thow pw ni Ravguangc guangcdic tei alaucna kumcna laalou mak ge thei, mi khou tei kamei gut zat ni tu hamh e.”#Met 18.3 16Khoutei kamei rui alauc nunc ta puanc thauna kaniw kathuic khou kabaanc bouclouna suaihiamlou the.
Lungcgaymei Chabwan Gaanv Khat
(Met 19.16-30; Luk 18.18-30)
17Mi tangv Jisu chaeng kaamv akhat khang tat pat khou, meic gaanv khat pak guangna kahu khou khuksun keyna, “Meicgaymei dinhpouc, ringcsuangmei laa khang ai tabui tuang sw nina cho?” twna thanv khwan e.
18Khoutei Jisu rui kakhou sa the, “Tabui swna ata meicgaymei kaw tu cho? Meicgaymei khat sini maek ge; Ravguangc na de gaymei. 19Riakdanv guay: ‘Meic dow lak nina e, Lungcmaanv lak nina e, Kaihouc lak nina e, Saraamhmei sakhi tii lak nina e, Meicguat lak nina e, Nang pui nang pu ta chakhwang sw nina e,’ twmei guay hei nang thay the cho!”#Tat 20.12-16; Ria 5.16-20
20Khoutei, “Dinhpouc, mi guay hei ai alauc khou rui ngaek bam di the,” twna sa the.
21Khoutei Jisu rui kata zauc pwkhou nzian the, kumna kakhou sa the, “Nang khou ntangh mak tuang akhat nai e: Nang tuang naimei guayna zuancna lungcsimei nunc khang tii tio, tingkauh thangc nang tuang lanv nai puni; kumna guangna athei lay o.” 22Mi lat tei chu pwkhou kazaw kamv meih mei key the, kumna kalung ryanrana tat pat kan the. Kalam thu katuang lanv mpeyna nai khwan e.
23Khoutei zauc kari kariangna, “Lungcgaymei nunc Ravguangc guangcdic gut khang adih kungc puni cho!” twna Jisu rui kaziap nunc khou sa the.
24Mi lat tei chu pwkhou, kaziap nunc tei ruph rup the. Khoutei Jisu rui kaniw khou sa dat re, “Alaucthiu, Ravguangc guangcdic gut khang chiwmei tuang hamh e! 25Lungcgaymeipu rui Ravguangc guangcdic khou gutmei suangc thu guaikuan rui mpinh mai khou gutmei rui chiw e.”
26Khoutei kaniw tei ngakna, “Kum e thei thow rui kanloumei laa ngam nina cho?” twna kakhou sa the.
27Khoutei kaniw ta zaucna Jisu rui sa the, “Mi hei maansei khang ngam lakmei tuang bam sini Ravguangc khang thu ngam mak tuang maek ge. Ravguangc thu ngam tu rana de.”
28Khoutei, “Zauclo, ramh guayna ganclouna aniw nang thei lay the,” twna Pitar rui Jisu khou sa the.
29Mundawna Jisu rui sa the, “Ai rui nangniw khou kaling siakna sa tuang e: Thow pw ni akhang rui khatni gaychamv khang rui kakai kalau, kachaic kakainac, kapui kapu, khatni kanac ta gancloupui mei tei, 30mi panty khou ni rairiumei lev kazauhna kai lau, kachaic kakainac, kapui kapu, khatni kanac kadam phay khatni guang nimei panty khou ringcsuangmei laa puni. 31Tiki ntaw reymei sw bammei nunc hei nkhamhmei sw puni, khatni ntaw nkhamhmei sw bammei nunc hei reymei sw puni.”#Met 20.16; Luk 13.30
Jisu rui Kamei Theic nimei lam khou Dinc Kasuakcloumei Kathumhmei
(Met 20.17-19; Luk 18.31-34)
32Mi tangv, kaniw Jerusalem thangc tat nganghmei chaenglwan khou Jisu rui kaniw suangc tat huna tat kan khwan e. Khoutei kaniw tabui tuang cho twna ning the khatni kathei lay tatmei nunc tei ping the. Khoutei ruhna kanei ta tei nduangh ranc patna kakhou pat punimei tei kaniw khou raclouna sa the, 33“Zauclo, aniu Jerusalem thangc ngangh puni the. Kumna Meic Nac Mpouh ta amuh daihmei nunc khatni Riakdanv dinhpouc nunc khou tii pat puni, kumna kaniw rui kakhou theic biuhpui khuay nkhamlouna Zentelmei nunc khou tii pat puni. 34Kaniw rui kata sinnui puni, kakhou nteih nsuklou puni, kata bai puni kumna swluai puni; tiki zaeng neih thumh tangv kamei ringcthau dat puni.”
Jakob lev Jahon khang Kapui rui Bamv Neymei
(Met 20.20-28)
35Khoutei Zebedi nac mpouh nei-Jahon lev Jakob Jisu daeng khou guangna sa the, “Dinhpouc, aney rui nang khou ney niimei hei taanclou pu tu kahaw e.”
36Khoutei Jisu rui kaney khou, “Mi kiu tabui cho?” twna thanv the.
37Khoutei kaney rui sa the, “Nang hymdaic pwkhou, aney gaanv khat rui nang tuang baanzat khou khatni gaanv khat rui nang tuang baandaw khou dungc nuh khang aney khou tiilou o.”
38Jisu rui kaney khou sa the, “Nangney tabui tuang ney bam tu cho twmei nangney thay mak ge. Ai zangv nimei buangc hei nangney zangv diw nah cho khatni ata lup nimei khou hei nangney lup diw nah cho?”#Luk 12.50
39“Aney diw e,” twna kaney rui daw the.
Khoutei Jisu rui kaney khou sa the, “Ai zangv nimei buangc tei nangney ni zangv puni khatni ata lup nimei khou tei nangney ta ni lup puni. 40Tiki atuang baanzat baandaw khou dungh khang thu ai rui tii nina hamh e. Mi bamv hei thu chamdaanvlou tangpui mei khang tei di the.”
41Kaziap ruh tei hei tei chu pwkhou Jakob lev Jahon ta kaniw lungh puamc the. 42Khoutei kaniw ta kaw guangna Jisu rui kaniw khou sa the, “Zentelmei nunc tuang dihsinpouc nunc tei meic nunc ruc khou kaipouc sw e khatni kaniw tuang meicdaihmei nunc tei meic nunc ruc khou ngamv sin e twmei nangniw thay e.#Luk 22.25-26 43Tiki nangniw lungc khou thu hei tei kumc nina hamh e. Nangniw pang khou thowkumhmei meicdaihmei sw nii e thei kamei meic guayna siamruaimei sw nina e,#Met 23.11; Mrk 9.35; Luk 22.26 44khatni thowkumhmei kapy sw nii e thei, meic guayna bangc sw nina e. 45Kalam thu Meic Nac Mpouh nganvna meic nunc rui kasiamruai swlou khang guang tu hamh e, tiki siamruai sw khang khatni meic mpeyna ta thuaklou khang kapanty tii pat khang guang tuang de.”
Mik Tiatmei Bartimai ta Tigayloumei
(Met 20.29-34; Luk 18.35-43)
46Khoutei kaniw Jeriko khou guang the. Kumna kamei Jeriko khou rui kaziap nunc khatni meic kangdai lev tat pat khou, mik tiatna ney tu bammei Timai nac mpouh Bartimai chaeng daeng khou dungc bam khwan e. 47Hei tei Nazarethmei Jisu e twmei kamei chu lana, “David Nac Mpouh Jisu, ata zauc nzianlou o!” twna kauc thau the.
48Khoutei, “Rey rei o,” twna meic mpeyna rui kata luh the. Tiki, “David Nac Mpouh, ata zauc nzianlou o!” twna kauc ranv hay hay thau the.
49Khoutei Jisu ding the, kumna, “Kata kaw guang o,” twna sa the.
Khoutei, “Thau tho! Neihla tho! Kamei nang ta kaw bam the!” twna sana kaniw rui mik tiatmeipu ta tei kaw the.
50Khoutei kaphey ganc keylouna ding palup thauna Jisu daeng khou guang the.
51Khoutei Jisu rui kakhou, “Ai rui nang khang tabui tuang swloumei ta kahawna cho?” twna sa the.
“Rabbi, amik how dat nii e,” twna mik tiatmeipu tei rui Jisu khou sa the.
52Khoutei Jisu rui kakhou sa the, “Tat tho, nang ramlum rui nang ta tigaylou the.”
Khoutei kadyng khou kamik how dat the, kumna Jisu thei lay tat the.
Currently Selected:
MARK 10: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
