METTHIU 28
28
Jisu Ringcthau Datmei
1Sabbathneic tangv, neidak tuang reymei nungc khwanpaengc pat pwkhou Magadaleni Meri lev baihmei Meri tarou zauh khang tat the. 2Khoutei baengla daih zay the, kalam thu Poubauhmei tuang baanchara tingkauh thangc rui keyna ntauh tei luangc patlouna, mi ruc khou tei dungc the. 3Kazaw tingpalikmei riw kumc e khatni kapheybaan gunh kumc mphwan e. 4Rigaanvmei nunc tei kata pingna kadunh the khatni theic key the.
5Khoutei baanchara tei rui mi pui nei khou tei sa the, “Ping riu, kros khou thaengc luai kanmei Jisu ta tei nangney phu bam tuang e twmei ai thay e. 6Kamei mi khou hei bam mak khe, kamei rui saloumei kumcna kamei ringcthau kan the. Kata nziloupui bamv hei guang zauc o. 7Nangniw katumcna tat lana, ‘Kata tiringcthau kan the, kamei Galili thangc nangniw suangc tat hu kan puni the. Mi khou tei nangniw kata how puni the,’ twna kaziap nunc khou tei salou ti tho. Mi hei ai rui nangney khou kadyloumei tuang the.”
8Pingmei khatni neihlamei rui padikna, kaziap nunc khou dinclou khang kaney katumcna tarou bamv khou tei rui pak tat kan the.
9Zauclo, Jisu kaney ta ariwna, “Nangney khou chuzaenghmei nai diu,” twna sa the. Khoutei kaney kadaeng khou guangna kaphay sinna kalum the. 10Khoutei Jisu rui kaney khou sa the, “Ping riu; nangney tatna achana nunc ta tei Galili thangc guang tho twna salou o. Mi khou tei kaniw ata ariw puni the.”
Rigaanv nunc rui Pouloumei
11Mi pui nei tei kaney tat nipui chaeng tat kan khou, rigaanvmei nunc gaanvsaekc kaidai khou gutna pat kanmei guayna tei amuh daihmei nunc khou salou the. 12Amuh daihmei nunc tei gaanvthaih nunc lev kaphianh lana syan rihmei nunc khou tei tiina, 13“‘Aniw zip kan khou zingbangc kaziap nunc guangna kata houc tat kan the,’ twna meic nunc khou sa o. 14Mi hei guanghkhyn rui chu pwsini, nangniw ping khang maek ge, aniw rui kata thu sa thimlou kan ni de,” twna sa the.
15Rigaanvmei nunc tei syan tei laa lana kaniw ta sa o twmei tei kumcna kaniw sa the, kumna mi pary hei Jihudimei pang khou ntaw nganvna mi hei kumcna rac bam e.
Jisu Kaziap nunc ta Ariwmei
(Mrk 16.14-18; Luk 24.36-49; Jhn 20.19-23; Lat 1.6-8)
16Ziap ruhna khat tei Jisu rui kaniw ta guang o twna saloumei bamv Galili khou naimei chyngbut thangc tei tat the.#Met 26.32; Mrk 14.28 17Kata how pwkhou kaniw kata kalum the; tiki gaanvsaekc rui thu lwmsi the. 18Khoutei Jisu guangna kaniw khou sa the, “Tingpuk khatni kandih kapwm ruc khou ngamv akhou tiilou the. 19Hei zaeng rui, nangniw tatna zaatc kapwmna ta aziap kasiamh o: kaniw ta Pu, Nah Mpouh, khatni Bumaengh Nthanmei zanc khou duiluplou o;#Lat 1.8 20ai rui nangniw khou tiilou kanmei latdanv guay tei piu khang kaniw khou nchamlou o. Kumna zauclo, kandih zuk luaimei nganv ai nangniw ta kaganv kathuic bam nduangh bam puni.”
Currently Selected:
METTHIU 28: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.