METTHIU 26
26
Jisu ta Swluai Nimei Raeng
(Mrk 14.1-2; Luk 22.1-2; Jhn 11.45-53)
1Jisu mi lat guay hei sa tang key lana kamei rui kaziap nunc khou sa the, 2“Zaeng neih nei tangv Kaanpatpui Ngai guang puni the twmei nangniw thay e, kumna Meic Nac Mpouh ta kros khou thaengcluai khang tii pat puni.”#Tat 12.1-27
3Mi tangv amuh daihmei nunc khatni charuangc gaanthaic nunc kazanc Kaiapha kawmei tingkuh kai khou guang kaduaina, 4Jisu ta nkamhna nymna swluai khang kaphianh the. 5Tiki nngay lungc khou thu hei tei sw ti thei lat geic lat lungc pat pungh di the twna kakhanh the.
Jisu khou Thauh Teyloumei
(Mrk 14.3-9; Jhn 12.1-8)
6Jisu Bethani khou mphaanhmei gay datmeipu Simon kai khou, 7nap tu bam khou meic pui gaanv khat alabastar haan khou loumei kamanv kunghmei mwndui thauc sin guangna kapy khou bunlou the.#Luk 7.37-38 8Hei tei how lana ziap nunc tei kaniw lungh puamcna, 9“Tabui khang mi hei swmaan bam tu cho? Mi hei kamanv mpeyna khang zuanc lana lungcsimei nunc khang tii nuh di ki,” twna sa the.
10Hei tei thay lana Jisu rui kaniw khou sa the, “Tabui swna nangniw mi pui ti hei sw kaguakc bam tu cho? Kamei rui akhang taanv gaymei akhat taanclou the. 11Lungcsimei nunc thu nangniw lev bam nchamc tanv tan bam puni de, tiki ai thu nangniw lev bam nchamc tanv tan bam ni tu hamh e.#Ria 15.11 12Kamei rui apumc khou thauh bunloumei hei ata mbeihlou ni khou swlou nimei tuang tei kamei rui swlou tuang the. 13Ai rui nangniw khou kaling siakna sa tuang e: Mi gaychamv hei dinc likloumei kandih kapwm khou, kamei rui taancloumei hei racna, kata ningtow bam puni.”
Jisu ta Tinym Nimei Raeng
(Mrk 14.10-11; Luk 22.3-6)
14Mi tangv ziap ruhna kanei pang khou gaanv khat, kazanc Juda Iskariot kawmeipu rui amuh daihmei nunc daeng thangc tatna, 15“Ai rui Jisu ta tinymlou e thei nangniw akhang tabui tii diw cho?” twna sa the. Khoutei kaniw rui kakhang daandi paek tamruc phuclou the.#Zek 11.12 16Mi tangv tei rui kata tinym nuh khang kadouchamei phu thau the.
Jisu Kaziap nunc lev Kaanpatpui Ngai Taektw Tumei
(Mrk 14.12-21; Luk 22.7-13,21-23; Jhn 13.21-30)
17Khay lou makmei Ngai tuang reymei nungc, Jisu daeng khou kaziap nunc guangna, “Kaanpatpui taektw nang khang tabui khou swloumei ta kahaw cho?” twna thanv the.
18Jisu rui kaniw ta kaidai khou tei ndiulouna, mi kumhmeipu khou tatna mi hei kumcna sa o twna sa the, “‘Dinhpouc rui katuang ganv guang the, kumna nang kai khou kaziap nunc lev Kaanpatpui taektw tu nchamclou ni twna sa e’ twna sa tio.”
19Jisu rui samei kumcna kaniw taanc the, kumna Kaanpatpui taektw tei chamdaanvlou the.
20Kumna, zingbangc key pwkhou Jisu kaziap ruhna kanei tei lev tu khang dungckey the. 21Kaniw tu bam khou Jisu rui kaniw khou sa the, “Ai nangniw khou kaling siakna sa tuang e: Nangniw gaanv khat rui ata zuanctu puni.”
22Khoutei kaniw tei lungh kabiu sih the, kumna gaanv khat gaanv khat swna, “Ata hamh e ni, Poubauhmei?” twna thanv thau the.
23Khoutei mundawna Jisu rui sa the, “Ai lev kamkuak akhat na khou num nchamcmei kamei tei rui ata zuanctu puni.#Kal 41.9 24Meic Nac Mpouh hei thu kakhang hyloumei thei layna tat bam tuang de, tiki Meic Nac Mpouh ti hei zuanctupui mei tei mu kasan si e dav! Mi pu tei mu puanclou lamc mak ge thei gay ni tuang e!”
25Khoutei kata zuanctu nimeipu Juda rui mundawna, “Ata ny, Rabbi?” twna sa the.
Khoutei, “Nang samei tei the,” twna Jisu rui kakhou sa the.
Poubauhmei Taektw
(Mrk 14.22-26; Luk 22.14-20; 1 Ko 11.23-25)
26Kaniw tu bam khou Jisu rui ntyan dwm akhat laana thuanckulou the, kumna hei tei by bakna kaziap nunc khou tiina sa the, “Nangniw laana tu tho; mi hei apumc the.”
27Mi tangv buangh akhat laana thuanckulou the, kumna hei tei kaniw khou tiina sa the, “Nangniw mathiucna mi hei zangv tho; 28kalam thu mi hei meic guay khuay kuaklou khang keyloumei azei the. Mi hei latdyng tuang zei the.#Tat 24.8; Jer 31.31-34 29Ai rui nangniw khou sa tuang e: drakha thai dui hei ai thu zangv dat ni tu hamh the; tiki aPu Guangcdic khou drakha dui kathanc nangniw lev zangv nchamc dat puni.”
30Mi tangv kaniw lu akhat suanlou lana Olive luangcbut thangc tat kan the.
Pitar rui Kamei Jisu Mei Hamh e Twna Sa Nimei ta Dinc Kasuakcloumei
(Mrk 14.27-31; Luk 22.31-34; Jhn 13.36-38)
31Khoutei Jisu rui kaziap nunc khou sa the, “Aseic zingbangc hei nangniw ata mpatlou puni, kalam thu, ‘Ai rui lauziu gaenghmeipu ta bailuai puni, kumna lauziu pang tei pak phak puni,’ twna hylou e.#Zek 13.7 32Tiki ata tiringcthaulou dat pwkhou ai nangniw suangc Galili thangc tat hu puni.”#Met 28.16
33Khoutei Pitar rui mundawna, “Meic guayna nang ta mpatlou pwsini ai thu mpat zat ni tu hamh e,” twna sa the.
34Khoutei, “Ai rui nang khou kaling siakna sa tuang e: seic zingbangc hei nruay khuangh mak khou, nang amei hamh e twna nang rui sa liang kathumh puni,” twna Jisu rui kakhou sa the.
35Khoutei Pitar rui Jisu khou sa the, “Ai nang lev theic nchamcloumei nganvna ai nang mei hamh e twmei sa zat ni tu hamh e.” Ziap baihmei guay tei rui ni hei tei kumcna sa the.
Jisu Gethsemani khou Huayneymei
(Mrk 14.32-42; Luk 22.39-46)
36Mi tangv tei Jisu kaniw ta nduanghna Gethsemani kawmei bamv khou guang the. Mi khou tei kamei rui kaniw khou sa the, “Mi thangc tei ai huayney khang tat ni he, nangniw mi khou hei dungc bam khwan o.” 37Kamei Pitar lev Zebedi nac mpouh nei ta nduangh tat the. Lungh ryanramei khatni pingmei kakhou guang the. 38Khoutei kamei rui kaniw khou sa the, “Lungh ryanramei rui ai theic ni kumc the, nangniw mi khou hei bamna ata rak nduangh bam o.”
39Kumna kamei hu tat kasuakc khath tw gutna nkhum laamv keyna huayneyna, “Apu, nuh e thei mi buangc hei akhou tii guanglou rio; tiki ai rui ningmei hamh e, nang ningmei de” twna sa the,
40Mi tangv Jisu kaziap nunc daeng khou guang dat pwkhou, kaniw zip bam khwan the. Khoutei kamei rui Pitar khou sa the, “Nangniw ganvdak akhat na sini ai lev rak nchamc ngam mak khe nah cho? 41Nthiammei khou keylou mak khang nangniw ntak nrakna bam o, kumna huayney o. Bumaengh rui thu kahaw e, tiki pumh thu suan the.”
42Jisu tat pat datna huayneyna sa the, “Apu, mi buangc hei ai zangv mak nuh makpui tuang di the tw e thei, nang ningmei sw kan di tho.” 43Kamei pat dat pwkhou kaniw zip bam dat muay khwan the. Kaniw zip niimei rui khaengv ngam mak khe.
44Jisu kaniw ta ganclouna tat pat datna mi lat kahak tei sa luan thumhmei swna huayney the. 45Mi tangv tei kamei kaziap nunc daeng khou guang datna sa the, “Nangniw zipna nthaekc bam di hai? Zauclo, Meic Nac Mpouh ta paapcmei nunc baanc khou tiilou nipui ganv guang tangc the. 46Thau tho, tat di kho, ata zuanctu nimeipu guang the.”
Jisu ta Nymmei
(Mrk 14.43-50; Luk 22.47-53; Jhn 18.3-12)
47Jisu mi lat hei sa bammei dyng khou, ziap ruhna kanei pang khou kazauhmei Juda tei amuh daihmei nunc khatni charuangc gaanthaic nunc rui ndiuloumei baengsaeng khatni thingdangv sinmei meic kangdai ta nduanghna guang the. 48Kaniw rui nym nipuimei kiu, kamei rui kaput nimeipu tei the twna kata zuanctu nimeipu tei rui kaniw khou tei salou the.
49Juda tei Jisu daeng khou nzut phut guangna, “Chuzaenghmei nai diu, Rabbi,” twna sana kaput he.
50Khoutei Jisu rui kakhou, “Champanv, nang taanc nimei kiu katumcna taanc tho,”#nang taanc nimei kiu katumcna taanc tho; hamh e thei tabui sw khang nang mi khou hei guang tu cho? twna sa the.
Khoutei kaniw guangna Jisu ta nym the. 51Khoutei Jisu lev bammei gaanv khat rui katuang baengsaeng sat patna tingkuh bangcpu ta dow tina kanukuanc akhat siap ganc the. 52Khoutei Jisu rui kakhou sa the, “Nang tuang baengsaeng tei kabamv khou lou dat kan tho. Baengsaeng sinmei nunc tei baengsaeng hu theic puni. 53Ai rui nkhavlou khang aPu khou ney ti thei kamei rui kauh baanchara tuang rihmei kang ruhna kanei suangc sini geicna kadyng khou ndiu guang nuh de twmei nang thay mak nah cho? 54Kum khwan e thei akumhna hyloumei tei guang tangc nina cho?”
55Mi dyng khou tei Jisu rui meic kangdai khou tei sa the, “Kwamtupui mei ta nym ni kumcna baengsaeng khatni thing dangv sinna ata nym khang guang tu cho? Tingmik pum ai Ravkai khou nangniw lev dungcna nchamlou bam tu de; nangniw ata nym mak ge.#Luk 19.47; 21.37 56Tiki muhzwng nunc rui hyloumei tei guang tangh khang mi guay hei pat tuang de.”
Khoutei ziap guayna tei kata ganclouna pak kan the.
Jisu ta Pei Mav khou Zay Guangmei
(Mrk 14.53-65; Luk 22.54-55,63-71; Jhn 18.13-14,19-24)
57Jisu ta nymmei nunc tei rui kata Riakdanv dinhpouc nunc khatni gaanvthaih nunc bam kaduai bammei bamv tingkuh daeng thangc zay tat the. 58Pitar tei mpaan hiauh hiauna kathei layna tingkuh kai tuang kaimav nganv lay guang the. Kamei kaimav lungc khou gutna akumh sih puni cho twmei zauh khang kamei rigaanv nunc pang khou lay dungc kazauh bam khwan e. 59Amuh daihmei nunc khatni pei kapwm tei Jisu ta swluai nuh khang karuc khou saraamhmei sakhi phungc guang khang phu the. 60Khoutei saraamhmei sakhi sw khang meic mpeyna guang khwan e, tiki kata swluai biuhmei khuay dinc ngammei kaniw phu tow mak khe. Nkhamh khou gaanv nei guangna 61“‘Ai Ravguangc tuang Ravkai hei ra key lana zaeng neih thumh khou sw thaulou dat ngam e,’ twna mi pu hei rui sa the,” twna sa the.#Jhn 2.19
62Khoutei tingkuh tei ding thauna, “Mi pu nei hei rui nang ruc khou sa bammei khou hei nang daw pat khang maek khah?” twna sa the. 63Tiki Jisu lat sa mak ge. Khoutei tingkuh tei rui sa the, “Ringhmei Racguangc zanc khou ai rui nang ta syangdyng tiswpui tuang e: Nang hei Ravguangc Nac Mpouh Khrista kiu cho? Sa o.”
64Jisu rui kakhou sa the, “Nang samei tei the. Tiki ai rui nangniw khou sa tuang e: Ntaw tangv thu Meic Nac Mpouh hei Ngamparimeipu baanzat thangc dungc bammei khatni muangh khou tuangcna keymei ta nangniw how puni.”#Dan 7.13
65Khoutei tingkuh tei katuang pheychuanh siatna sa the, “Kamei Ravguangc ta thouhsw thouhsak makpui lat sa the. Tabui baihmei sakhi aniu kage nai dat hena cho? Kamei rui Ravguangc ta thouhsw makna sa kanmei tei ntaw nangniw chu kan the!#Lev 24.16 66Nangniw akumhna kakhanh tu cho?” Khoutei, “Kamei theic biuc the,” twna kaniw rui daw the.
67Khoutei kaniw rui kazaw khou nteih nsuklou the khatni bai the. Gaanvsaekc rui kata kaphina,#Isa 50.6 68“Khrista, nang ta kaphimei hei thow cho, dinc pat ro,” twna sa the.
Pitar rui Kamei Jisu Mei Hamh e Twna Samei
(Mrk 14.66-72; Luk 22.56-62; Jhn 18.15-18,25-27)
69Khoutei Pitar tei kaimav khou dungc bam khwan e. Kumna banghpui gaanv khat kadaeng khou guangna, “Nang ni Galilimei Jisu thei laymei e.” twna sa the.
70Kamei hei tei meic guayna hu khou nuh makna sa the, “Nang sa bammei hei ai thay mak ge.” 71Kamei kaimav raengv mun khou tat pat pwkhou, banghpui baihmei gaanv khat rui how lana, kadaeng khou ding bammei nunc khou, “Mi pu hei Nazarethmei Jisu thei laymei de,” twna sa the.
72Khoutei ni kamei nuh makna, “Mi pu ta kiuc ai thay mak ge,” twna syangdyng swna sa the.
73Kanakmei tangv, mi khou tei ding bammei nunc Pitar daeng khou guangna, “Nang ni kaniw pang khou kazauhmei changh de, nang lat gwan khou rui thay de,” twna sa the.
74Khoutei, “Ravguangc rui thay kan dio! Ai mi pu ti hei thay mak ge,” twna sa the.
Mi dyng khou tei nruay khuangc the.
75Khoutei, “Nruay khuangh mak khou, nang amei hamh e twna sa liang kathumh puni,” twna Jisu rui kakhou saloumei tei Pitar mi dyng khou tei ningtow the. Kamei kapaengc patna kap ranv sihna kap the.
Currently Selected:
METTHIU 26: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.