LUK 1

1He chakhwang sw biuhmei Theophilas, aniu pang khou pat kanmei tuang pary tei meic mpeyna rui khuam kaduaina hy khang karamc kan the. 2Mi pat kanmei tei kahouh rap khou rui thauna kaniw mik kahak rui how kanmei, mi pary tei dinc ndauhmei nunc rui kaniw khou racloumei tei kaniw hy tu the. 3Hei tei kumcna, ai ni mi pary guay tei kabangbi khou rui thauna, mincna kathai lana, mi hei kadwan swna nang khang hymei gay the twna ning the. 4Ai rui mi hei hymei lam kiu thu, nang khou dinclou kanmei kalingmei pary guay tei kaling thay khang e.

Duiluploumei Jahon Puanhmei

5Judia kandih#Mi hei Palestin kandic kapwm ta e. tuang guangc Herod hak khou, kazanc Zekaria twna kawmei amuh gaanv khat nai khwan e. Kamei hei Abija kaengvmei e. Kumna kanow rui Aron kai luc, kazanc Elizabeth twna kaw e.#1 Ki 24.10 6Kaney hei Ravguangc hu khou ravchaptatmei, Poubauhmei tuang latdanv khatni kariak khou khanvbamv maekna lungc bammei nei khwan e. 7Kaney nac puanh mak khwan e, kalam thu Elizabeth tei nakamcpeic khwan e. Kumna kaney tei gaanvdaih khwan the.

8Kakaengmei tuang thouc liang guangna, kamei Ravguangc hu khou amuh thouc sw bam khou, 9amuh nunc rui sw bammei riak thei layna, kamei Poubauhmei tuang ravkai lungc khou gutna agaw nteina thouhsw khang kasan khou pat khwan the. 10Kumna agaw ntei bammei ganv khou tei meic kangdai kapaengc khou huayney bam khwan e. 11Khoutei Poubauhmei tuang baanchara akhat agaw ravchapaeng tuang baanzat biak thangc ding bammei ta kakhou lyanlou the. 12Hei tei how pwkhou Zekaria tei kaluang the, kumna kakhou pingmei pat the. 13Khoutei baanchara tei rui kakhou sa the, “Ping riu, Zekaria, nang rui neymei tei chulou the. Kumna nang now Elizabeth rui nang nac mpouh akhat puanc puni the. Nang rui kazanc Jahon twna kaw nina e.

14Kata puanclou pwkhou nang zaeng gay puni,

khatni meic mpeyna neihla puni;

15Kalam thu Poubauhmei mikzaw khou kamei daic puni,

kamei zouh zangv lak ge;

kamei kapui bung khou rui Bumaengh Nthanmei padik puni.#Sin 6.3

16Kumna Kamei rui Isaraelmei nac mpeyna ta,

Poubauhmei kaniw Racguangc khou tingalanc guanglou dat puni.

17Pu nunc khou nah nunc ta kadan thaymei lung tiilou khang,

khatni latliammei nunc ta,

ravchaptatmei chwn khou tingalanc guanglou khang,

kumna Poubauhmei khang chamdaanvloumei nunc ta,

tichamdaanvlou khang,

Elija tuang bumaengc khatni pumtan khou,

kamei Poubauhmei hu khou guang puni.”#Mal 4.5-6

18Khoutei Zekaria rui kauh baanchara khou tei sa the, “Mi kiu tabui khou rui ai lwm nina cho? Ai hei karacpouc di the, anow ni karacpeic di the.”

19Tiki kauh baanchara tei rui mundawna sa the, “Ai hei Ravguangc hu khou ding bammei Gabriel e. Kumna nang khou mi gaychamv hei salou o twna ata ndiu guang tuang e.#Dan 8.16; 9.21 20Kaganv tangc pwkhou guang tangc punimei alat ti hei nang lwm makpui zaeng rui, zauclo, mi hei guang tangh mak saanv, nang lat sa dat makna reih reina bam puni the.”

21Meic kangdai tei Zekaria ta nkhwan bam khwan e. Kumna kamei ravkai lungc khou bam saengc ti khou tei, akumh lana cho twna kaniw ning the. 22Kamei pat dat khou tei kaniw khou lat sa dat ngam mak khe. Khoutei kamei ravkai lungc khou ndawman how lana di the twmei kaniw thay the. Kamei kaniw khou kabaanc hailouna lat sa dat makna bam kan the. 23Kumna kamei amuh thouc taanc nimei ganv tei luailou lana kakai tat dat kan the.

24Mi tangv tei kanow Elizabeth kapumc nrit the, kumna bw panguh mpaeng pat makna bam khwan e. 25“Mi hei Poubauhmei rui akhang taancloumei tuang dyng the. Ntaw thu Poubauhmei rui ata nzianlouna meic nunc hu khou ai zak bammei tei laa ganclou dyng the!” twna kamei rui sa the.

Jisu Puanc Nimei ta Dinc Kasuakcloumei

26Elizabeth kapumc nritmei charukmei bw khou, Ravguangc rui baanchara Gabriel ta Galili tuang Nazareth kawmei kaidai khou, 27David kaikhwangmei kazanc Josep kawmeipu khaamv, kazanc Meri kawmei liuchang khat daeng khou ndiu guang khwan e.#Met 1.8 28Baanchara tei kadaeng khou guangna, “Dwan gay o, Ravguangc zauzian laatowmeipui, Poubauhmei rui nang ta bam nduanghlou bam e!” twna sa the.

29Mi kumcna saloumei khou tei kamei kalung mpeyna katuakc the, khatni mi kumcna sa bammei hei akumhmei tuang nai ni tina cho twna kamei kakhanh the.

30Khoutei baanchara tei rui kakhou sa the, “Ping riu, Meri, Ravguangc rui nang ta zauc nzianlou the. 31Zauclo, nang pumc nritna mpouh gaanv khat puanc puni, kumna nang rui kazanc Jisu kaw puni.#Met 1.21

32“Kamei hei daic puni, kumna kata Kauh Liangmei Nac Mpouh kaw puni; khatni Poubauhmei Ravguangc rui kapu guangh David bamvpaeng kakhang tii puni.#2 Sa 7.12,13,16; Isa 9.7 33Kumna kamei Jakob kai khou tingsaeng guanghtu bam puni, kaguangcdic kanganv nai dat lak khe.”

34Khoutei Meri rui baanchara khou tei, “Akumhna ai apumc nrit nina cho? Ai tunac di he,” twna mundaw the.

35Khoutei mundaw datna baanchara tei rui kakhou sa the, “Bumaengh Nthanmei nang khou keylou puni, kumna Kauh Liangmeipu tuang pumtan nang ruc khou sungclou puni; mi zaeng rui puanc nimei nthanmei nac ti hei Ravguangc Nac Mpouh kaw puni.

36“Zauclo, nang neic Elizabeth tei kamei karacpeic key pwkhou kapumc nritna mpouh phungc bam the. Nakamcpeic twna kaw bammeipui tei kapumc nritmei bw charuk tangc the. 37Ravguangc khang thu ngam mak tuang khat sini maek ge.”#Tha 18.14

38Khoutei Meri rui sa the, “Zauclo, ai hei Poubauhmei bangcpui e, nang rui samei heikum kan di tho.” Khoutei kauh baanchara tei kakhou rui tat pat dat kan the.

Meri Elizabeth ta Ariwmei

39Mi tangv tei, Meri katumcna chyngram thangc, Judia tuang kaidai thangc tat the. 40Kumna kamei Zekaria kai khou gutna Elizabeth ta kalum the. 41Meri rui kalummei tei Elizabeth chu pwkhou, kabung khou bammei angana tei neihlana kaluan thau the. Khoutei Elizabeth tei Bumaengh Nthanmei rui padikna, 42kauc ranvna sa the, “Ntumei guay pang khou rui sangaymeipui, nang khou naimei angana hei suaihiammei nac e! 43Apoubauhmei pui rui ai kumhmei daeng khou guang khang swlou pwmei hei akumhmei tuang cho? 44Kalam thu, zauclo, nang rui kalummei khwan anu khou chu pwkhou abung khou bammei angana hei neihlana kaluan thau the. 45Kumna Poubauhmei rui akhou salou kanmei tei guang tangc puni twna lwmmei pui tei sangaymei lev.”

46Khoutei Meri rui sa the:

“Poubauhmei ta alung syng rui thuanc e,#1 Sa 2.1-10

47khatni ata kanloumeipu Ravguangc khou ai neihla e;

48kalam thu kamei rui kabangcpui tuang liwmei lwnlung ti hei zauclou the,

kalam thu, zauclo,

ntaw khou rui thauna meickin guayna rui ata,

sangaymeipui twna kaw puni the.#1 Sa 1.11

49Kalam thu, Ngamparimeipu rui

akhou taanvdaih taanclou the;

kazanc hei nthanmei e.

50Kata pingmei guay khou kazauzian meickin meickin khou nai e.

51Kabaanc pwam rui pumtan taanv daih taanclou e,

daihriw lungning phunghmei nunc ta,

kamei rui nthau ganclou e.

52Kamei rui tancbauhmei guangc nunc ta,

guangh bamvpaeng khou rui zay keylou e,

khatni suanmei nunc ta,

zay kauh thaulou e.#Job 5.11; 12.19

53Ndaapc bammei nunc ta ti-ngulou e,

khatni lungcgaymei nunc ta,

kabaanc raeng thouc ganc e.

54Kamei rui aniu pu pouc nunc khou swloumei kalatryan tei ngaekna,

Kamei rui kabangc Isaraelmei ta nkhavlou the.

55Abraham khatni kakikta guay ta tingsaeng zauc nzianlou ni twmei tei,

Kamei ningtowlou the.”#Tha 17.7

56Kumna Meri Elizabeth daeng khou bw thumh dou bamlou lana kakai khou guang dat the.

Duiluploumei Jahon Puanhmei

57Elizabeth khang ganthianghpui ganv tangcna mpouh akhat puanc the. 58Kumna Poubauhmei rui kata daicna zauc nzianlou the twmei kaining kaigeimei khatni kariang kaluaicmei guay chu pwkhou kaniw ni kamei lev neihla nchamc the.

59Kumna zaeng tachatmei nungc angana ta tei gihruamh khang kaniw guang the. Kumna kapu zanc swna kazanc Zekaria twna phuak khang sw bam khwan e.#Lev 12.3

60Khoutei, “Kiuc hamh e, ‘Jahon’ twna kaw nina de,” twna kapui rui sa the.

61Khoutei, “Nang kai kaikhwang khou mi kumhmei zanc hei maek ge,” twna kaniw rui kakhou sa the.

62Kum ti khou, “Kazanc tabui kawmei ta laa nii cho?” twna kaniw rui kapu khou thanv the.

63Khoutei kamei rui hypui paek ney the, kumna, “Kazanc Jahon e,” twna hy pat the. Khoutei kaniw guay ngak the.

64Mi dyng khou tei kamwang khatni kabaley riclou dat the, kumna Ravguangc ta thuancna lat sa pat dat the. 65Khoutei kaining kaigeimei guay tei ping the, khatni Judia tuang chyngram kapwm khou tei mi pary hei rac lik sikh sik tat kan the. 66Mi chamv tei chumei guay, “Mi nac hei tabui tuang sw puni cho?” twna kaniw lung khou litlouna bam geic khwan e. Kalam thu Poubauhmei rui kakhou charynmei taanv taanclou khwan e.

67Khoutei kapu Zekaria tei Bumaengh Nthanmei rui padikna ravmundincna sa the:

68“Aniu Poubauhmei,

Isarael Racguangc ta thuanc kho!

Kamei nunc ta nkhavlou khang kamei guang the,

kumna aniu ta kanlou the.

69Kamei rui aniu khang tancbauhmei Kanloumeipu,

kabangc David kai khou tiilou the.

70Kamei rui rey douc nthanmei muhzwng nunc khou rui latryan swlou the.

71Aniu ta zauczihmei nunc khou rui,

kamei rui kanlou puni,

aniu ta karaengmei nunc baanc khou rui kanlou puni twmei latryan e.

72Kamei rui aniu pupouc nunc ta nzianlou puni,

khatni katuang nthanmei latryan ningtow bam puni,

twna kamei rui salou the.

73-74Kamei rui aniu ta zauczihmei guay khou rui kanlou puni,

kumna ramh ping tuang maekna kasiamruai sw khang swlou puni twna,

aniu pupouc Abraham khou nthukmei latryan swlou the,

75hei tei aniu panty saanvsaengh aniu kahu khou nthanna,

khatni ravchap tatna bam khang e.

76Ngasatna, nang ti hei,

Kauh Liangmeipu muczwng kaw puni;

kalam thu nang Poubauhmei khang chaeng sw khang,

kahu tat kasuakc puni.#Mal 3.1

77Kumna aniu paap guay kuaklouna Kanloumei lam khou,

kamei rui Poubauhmei mei nunc khou dinclou puni.

78Kalam thu aniu Racguangc hei zauzian thaymeipu e.

Kamei rui aniu khang gaanc gaymei ringhbamv ting tigaanclou puni.

79Kumna theihmei lim zinghmei khou bammei nunc khou,

tingkauh thangc rui gaanhmei tiilou khang,

kumna aniu phaykaamv chuzaenghmei chaeng khou zaylou khang e.”#Isa 9.2

80Kumna mi nac tei daic thau the khatni bumaengh khou tanc thau the, kumna charuangc khou patna taanv sw thau mak saanv kamei tazikramv khou bam khwan e.

Currently Selected:

LUK 1: RONGBSI

Highlight

Copy