LEVITHOUC 4
4
Taanc Maanvmei Paap khang Khaengmei
1 Ringhpouc rui Mousi khou sa the, 2Isaraelmei khou heikumna sa o thowkumhmei rui maanvna khatni Ringhpouc tuang latdanv taanc lak nimei tei taanc e thei
3Amuh rui paapc taancna kumna mi nwan tei meic nunc ruc khou phungc guangmei tuang nai e thei, kamei rui hiaksuimei guaituamchic launa phungc guangna kapaap khang rui Ringhpouc khang khaeng nina e. 4Amuh rui guaichic tei kalummei pheykai chaengmun khou tei zay guangna, guaih py khou tei kabaanc mbaenglouna Ringhpouc hu khou mi bamv khou tei dowluai nina e. 5Amuh kamei rui zei tei laana kalummei pheykai lungc khou tei phungc gut nina e. 6Zei khou tei kabaanczung ntin lana nthanmei khamthinghphey hu khou tei kazinh liang chaneilou nina e. 7Kalummei pheykai lungc khou naimei agaw ravchapaeng tuang chei guay khou tei zei tei teylou nina e. Nsaekcmei zei guay tei kalummei pheykai chaengmun daeng khou naimei ravkhaeng puat rawmei ravchapaeng phaybi khou tei bunlou nina e. 8Mi guaic tuang thav guay, karav guay, 9kaki nei khatni mi khou tei naimei thav guay, khatni kathyn khou gay liangmei langv guay tei laa pat nina e. 10Kumna alamvpuatkat khou katmei tei kumna kamei rui mi guay tei ravchapaeng khou tei rawna kat nina e. 11Kamei rui kagic, katei guay, kapy, katan, kalungcna guay tei laana 12mbut bowloumei bamv Nthanmei bamv khou tei mi guay tei phungc pat lana thing tuang mai khou raw nina e.
13Isaraelmei zaat kapwm rui maanvna Ringhpouc tuang latdanv piu makna paapc taancloumei tuang nai khwan e thei, 14mi paap tei thay patpui lev katumcna meic guayna rui paapc khang khaeng khang guaituamchic launa akhat phungc guang nina e. Kaniw rui hei tei Ringhpouc tuang pheykai khou tei phungc guang nina e; 15kaniw tuang gaanvthaih nunc tei rui kaniw baanc mi guaichic py khou tei mbaenglouna hei bamv khou tei dowluai nina e. 16Amuh tei rui zei asaekc tei laana kalummei pheykai lungc khou tei gut nina e. 17Zei khou tei kabaanczung ntinna khamthinghphey hu khou tei kazinhlou liang chaneilou nina e. 18Kalummei pheykai lungc khou naimei agaw ravchapaeng tuang chei guay khou tei zei asaekc tei teylou nina e, kumna nsaekcloumei tei rui kalummei pheykai kaimun khou naimei rawna khaengmei ravchapaeng kabamv khou tei bunlou nina e. 19Hei tangv tei kamei rui kathav guay tei laana ravchapaeng khou tei raw nina e. 20Kamei rui paapc khang khaengmei guay khou swmei thak kahak tei meic nunc tuang paapc khang rui khaengmei ganv khou ni sw nina e, kum pwkhou kaniw paap tei kuaklou puni. 21Mi tangv tei kamei rui mi guay tei kapaengc thangc laa patna kapaap khang khaeng khou swmei thak tei kumcna raw nina e. Mi hei kandihmei paap laa ganclou khang khaeng nimei tuang kiu the.
22Thowkumhmei kandih kaipouc akhat rui maanvna Ravguangc latdanv swbakna paapc taanclou e thei, 23kamei rui taancloumei paap tei tithay patpui lev kapaap khang khaeng khang katumcna hiaksuimei ziuchic akhat phungc guang nina e. 24Kamei rui kabaanc ziuchic py khou tei mbaenglouna ravchapaeng tuang dihpy biak khou naimei rawna khaeng nimei khouringh dowluaimei bamv khou tei dowluai nina e. 25Amuh tei rui zei khou tei kabaanzung ntin lana ravchapaeng chei khou tei teylou nina e kumna nsaekcloumei guay tei ravchapaeng phaybi khou tei bunlou nina e. 26Alamvpuatkat khou khouringh thav rawmei tei kumcna kamei rui mi thav guay tei ravchapaeng khou raw nina e. Heikumna amuh rui kandih kaipouc tuang paap khang tei khaeng pwkhou kapaap tei kuaklou puni.
27Thowkumhmei gaanv khat rui maanvna Ravguangc tuang latdanv swbakna paapc taanclou e thei,#Sin 15.27,28 28kapaap tei tithayloupui lev khaeng khang hiaksuimei ziuhnay phungc guang nina e. 29Kamei rui kabaanc ziuh py khou tei mbaenglouna ravchapaeng tuang dihpy biak thangc naimei rawna khaeng nimei khouringh dowluaimei bamv khou tei dowluai nina e. 30Amuh tei rui zei khou tei kabaanczung ntin lana ravchapaeng tuang chei guay khoutei teylou nina e, kumna nsaekcloumei guay tei ravchapaeng kabamv khoutei bunlou nina e. 31Alamvpuatkat khou kathav laapatmei tei kumcna kathav guay tei laa pat nina e. Kumna karym tei rui Ringhpouc ta tipianlou khang kamei rui mitei ravchapaeng khou tei raw nina e. Heikumna amuh tei rui meic akhat paapc khang khaeng pwkhou, paapc tei kuaklou puni.
32Thowkumhmei rui kapaap khang lauziu phungc guang nii e thei, hei tei hiaksuimei lauziunay nina e. 33Kamei rui mi lauziunay py khou tei kabaanc mbaenglouna ravchapaeng tuang dihpy biak thangc naimei, rawna khaeng nimei khouringc swluaimei bamv khou tei swluai nina e. 34Amuh tei rui zei khou tei kabaanczung ntin lana hei tei ravchapaeng tuang chei guay khou tei teylou nina e, kumna nsaekcloumei guay tei ravchapaeng phaybi khou tei bunlou nina e. 35Kumna alamvpuatkat khou kathav laapatmei tei kumcna kamei rui kathav guay tei laa pat nina e, kumna hei tei Ringhpouc khang rawna khaengmei pang khou tei rawna khaenglou nina e. Heikumna amuh rui meic akhat paap khang khaenglou pwkhou, paapc tei kuaklou puni.
Currently Selected:
LEVITHOUC 4: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
